60
Yʼomutangirisi wʼabembi. Ohwemba ni batiinira hu janjaasi “Ehimuli hyʼEndagaano.” Mikitamu ya Dawudi. Olwʼohusomesa. Ni gasoola ni Alaamu Naharayimu ni Alaamu Zoobba era ni Yowaabbu olu gaali ni gagamayo nga geeta abaatu bʼEdomu omutwalo nʼekumi ebiri mu hiiho ehi balanga baati Cumbi.
1 O Hatonda, otuhubbire omugongo era watudanyirira
watuluŋira ale ŋaahani tugobose bunyaaha.
2 Otengehisye ehyalo wahyadisamo
aye ŋaahani hidabirise olwohuba hiri huyuuga.
3 Olehire abaatu babo ohubonaabona bugali
era hugenda ni hutagataga oti hunyooye mwenge.
4 Aye eyiri abo abahutya obaaye buŋonere waawe
baŋone ohusihiiriha.
5 Twanuhule otununule nʼotambisa omuhono gugwo omulungi,
oŋonie abo aba wenda.
6 Hatonda nʼali mu hifo hihye ehyawufu gasuubisa ati,
“Nja husalamo mu hibuga Sekemu
era ngabe ehiiho hyʼe Sukosi mu butundutundu.
7 Ehyalo hyʼe Giliyaadi hyange
nehya Manase hyosi hyange,
ehyalo hyʼEfulayimu njʼekofiira yange eyʼohwambala mu lutalo
ehyalo hya Yuda njʼesimbo yange eyʼobuŋugi.
8 Ehyalo hyʼe Mowaabbu njʼebbaafu omu saabira.
Ehyalo hyʼEdomu pohuuta amagulu.
Abafirisuuti baŋeega baati basobola ohupangula?”
9 Njʼani aja huupira mu hibuga ehyʼamaani?
Njʼani aja hutangirira ohutiina mu Edomu?
10 Hatonda, sindiiwe otuhubbire omugongo
era otenda hutiina ni neefe mu lutalo?
11 Tuŋe obuyeedi ohuŋangula abalabe.
Hiri hiityo olwohuba obuyeedi wʼomuutu obuutu buŋuma mahulu.
12 Hatonda nʼali hu lubega lwefe huja huŋangula
era aja hutyakirira abalabe beefe.