59
Yʼomutangirisi wʼabembi. Ohwemba ni batiinira hu janjaasi “Otasihiirisa.” Mikitamu ya Dawudi. Olu Sawulo gaŋindiha abaatu ohwitira Dawudi mu nyumba yiye.
1 O Hatonda wange, nunule ohuŋwa mu balabe bange
ngadirire eyiri abo abanjinyoheraho.
2 Nunule ohuŋwa mu bahosi bʼebibi
era njeede abatemu batanjita.
3 O Musengwa, bona ngʼolu banjeteega ohunjita,
nʼobuhambwe behobana ohuukosa ni ŋaŋuma hisobyo oba ehibi ehi mbaholire.
4 Eŋuma hibi ehi mbaholire aye betegeha ohunumba.
Yinyoheramo wunjeede banyendesa bigosi.
5 O Musengwa Hatonda Omwene Maŋe,
Hatonda wa Yisirayiri yinyoha obonerese amawanga gosigosi
era abo abahosi bʼebibi otabasasira.
6 Bagaluha ehyegulo ni bahiritira hyʼembwa
bagenda ni betoloola ehibuga.
7 Bona ebi bahaasa ohuŋwa mu hanwa haawe bahaasa ebibono ebiri hyʼepiima.
Era baloma baati, “Ŋaŋuma aŋulira ebi huloma.”
8 Aye O Musengwa obajeherera,
ojeherera ababi abo bosibosi.
9 Ewe ndiiwe amaani gange
era Hatonda neŋogoma mu ndiiwe.
10 Hatonda wange ganyenda aja huuja eyi ndi,
aja hutangirira naŋangula abalabe bange.
11 Ne ewe Musengwa engabo yeefe,
kusunga otabeeta olwohuba abaatu bange bahanda bebirira.
Basasaanie nʼamaani gago era obaŋangule.
12 Olwʼebibono ebibi ebi baloma,
leha ohwepaahapaaha hwawe hubafuhumire.
Olwʼebiŋwabo nʼobudulingi obu baloma,
13 basihiirise nʼehiruŋi era basihiirise baŋwereŋo erala
abaatu bosibosi baja humanya baati Hatonda aŋuga Yisirayiri.
14 Bagaluha ehyegulo ni bahiritira hyʼembwa
bagenda ni betoloola ehibuga.
15 Bendula ebyohulya
aye batiina ohuŋenyuha ni ŋaŋuma ehi badanyire mu hida.
16 Aye nja hwemba hu maani gago.
Mu mugamba nja hwemba hu hwenda huhwo ohubitiirifu
olwohuba neŋogoma mu ndiiwe mu biseera ebigosi.
17 Ndiiwe amaani gange era nja hwemba ni kujumirya
Hatonda ndiiwe owukuuma era obunyenda.