58
Yʼomutangirisi wʼabembi. Ohwemba ni batiinira hu janjaasi “Otasihiirisa.” Mikitamu ya Dawudi.
1 Enywe abaŋugi muloma amazima?
Era musala emisango ni mutehubbira?
2 Mbe! Muŋeega hu huhola bibi byoŋene,
era muba muhuleeta mivuyo hu hyalo.
3 Ohuŋwa mu husaaliwa, omuhosi wʼebibi gabbaama
era ohuŋwa mu hida hya nyina aloma byʼobudulingi.
4 Bejuuye obusagwa hyʼomusota
basiŋa hyʼekolokima etaŋulira,
5 seŋulira janjaasi lyʼomuŋeŋa ahongeresa emisota,
aŋamba emisota gajiŋa obulesi jagonda wayire mukugu mu mulimo ogwo.
6 O Hatonda, babbwagebbwageemo ageeno,
O Musengwa, babbwagebbwageemo ageeno agali oti gʼepologoma.
7 Leha baŋwereŋo erala hyʼamaaji agomubando agatalwaŋo
leha ebisoosa byawe biŋume mugaso.
8 Leha bomeetane hyʼagasooko aga bajuhire hu woomu
era leha babe hyʼomwana afa nataweene hu lyuba.
9 Leha babaheneŋo mangu
hyʼenyaasi eri muliro gududumusa.
10 Abagwalaafu baja husangaala ohubona abahosi bʼebibi ni basuna omugabo ogu basaanira,
ni basaaba amagulu mu mafugi gʼabahosi bʼebibi.
11 Ngʼabaatu baloma baati, “Mu butuufu abagwalaafu babaŋaaye omuhemba.
Era mu butuufu Hatonda asala emisango nʼatehubbira, aliŋo!”