57
Yʼomutangirisi wʼabembi. Ohwemba ni batiinira hu janjaasi “Otasihiirisa.” Mikitamu ya Dawudi. Olu gatiina gehweha mu pungulu nʼaduluma Sawulo.
1 O Hatonda, pambire ehisa,
pambire ehisa olwohuba neŋogoma mu ndiiwe.
Nja hweŋogoma mu hisisigo hyʼamabaŋa gago
ohwola olu bugosi buliŋwaŋo.
2 Neŋunderera Hatonda Ali Ŋamugulu Obugali,
eyiri Hatonda owoheresa ehigendererwa hihye mu bulamu wange.
3 Gapeeresa obuyeedi ohuŋwa mwigulu era ganoŋola
ne aja huleeta ebigosi hu abo abanumba.
Hatonda mwesigwa era aja hundaga ohwenda huhwe ohubitiirifu.
4 Ndi ŋagati wʼepologoma mu meeno ga nasaŋa
mu baatu abali nʼameeno amoogi oti fumo nʼobusaale
ebibono byawe byogi hyʼepiima.
5 O Hatonda, laga etendo liryo hiisi ŋaatu mwigulu
era leha eŋono liryo libe hu hyalo hyosihyosi.
6 Abalabe bange bategire olutuula lupambe amagulu, omwoyo gwange gweŋunamiiye!
Banjabira eroŋo mu ngira yange aye abeene baliguyeemo.
7 Olwʼewe Hatonda ndi mugumu bugali
ndi mugumu era nja hwemba.
8 Nja hwinyoha, nja hwinyoha pambe ogutongooli nʼahatongooli,
nja husisimuha pwipwipwi nembe!
9 O Musengwa, nja huhweyaasanga ni ndi mu baatu abangi,
nja huhujumiryanga ni ndi mu mawanga.
10 Hiri hiityo olwohuba ohwenda huhwo hubitiirifu era hwola hwigulu.
Owesigwa wuwo bubitiirifu ohwola hu bireri.
11 O Hatonda, laga etendo liryo hiisi ŋaatu mwigulu
era leha eŋono liryo libe hu hyalo hyosihyosi.