56
Yʼomutangirisi wʼabembi. Ohwemba ni batiinira hu ejanjaasi “Eŋuusi hu mutumba.” Mikitamu ya Dawudi. Olu Bafirisuuti baŋamba Dawudi e Gaasi.
1 O Hatonda, pambire ehisa
olwohuba omulabe gakiyaania hiisi hiseera.
2 Abalabe bange bapiima oludaalo lwosirwosi
era mu hwepaahapaaha hwawe, bangi abanumba.
3 Ne wayire mbatiiye
nja huhwesiga.
4 Nesiga Hatonda olwʼebi gasuubisa.
Nesiga Hatonda era ŋaŋuma ehija hutiisa.
Omuutu buutu aŋanga hukola hi?
5 Oludaalo lwosirwosi baba muhucuusacuusa bibono byange
era baba mu husala magesi ohukenaŋo.
6 Behobana era behweha aŋaatu
babone hiisi ehi kola ni basuubira ohunjita.
7 O Hatonda, otabaleha huŋunuha hiruŋi hihyo
aye basihiirihise erala.
8 Ŋandiiha ohweririgana hwange,
ŋamba amasiga gange ogajuhe mu cupa yiyo,
amasiga gage gali hu lukalala lulwo.
9 Ohuhweriririra hwange huja hugima abalabe bange bagamirirayo enyuma.
Kimanyire ti Hatonda ali hu luuyi lwange.
10 Jumirya Hatonda olwʼebyo ebi gasuubisa
jumirya Musengwa olwʼebyo ebi gasuubisa.
11 Nesiga Hatonda era sinja hutya hiitu hyosihyosi.
Omuutu buutu aŋanga hukola hi?
12 O Hatonda, nja hwoheresa ebi nasuubisa
era nja huleeta ebirabo ohuhweyaasa.
13 Hiri hiityo olwohuba waponia ohufa
nʼamagulu gange ohutaterera olwʼehyo nja hugendera mu moni ja Hatonda
ngendere mu njase eyi leeta obulamu.