55
Yʼomutangirisi wʼabembi owemba nʼebivuga ebyʼewaaya. Ezabbuli ya Dawudi.
1 O Hatonda, ŋulira ohusaba hwange
otagaana hwegayirira hwange.
2 Ganya wupuliirise era wungobolemo,
ebiŋeego bikenireemo.
3 Neŋendeherera olwʼebibono byʼabalabe bange.
Banjohise hu bigosi era bandiho ehiruŋi ehyʼamaani.
4 Omwoyo gwange guhubbahubba
era noleheeye ohufa.
5 Teetema olwʼobuti era mbula ngeri
eyʼohuleheramo ohuteetema.
6 Naloma ti, “Singa naali nʼamabaŋa hyʼeŋuusi
nahaguluhire natiina eyi tiina nesunira emiyaaya.
7 Nahaguluhire natiina ŋaleeŋi
namenya eyo mu lulafu.
8 Nahanguŋire mangu nasuna aŋa neŋogoma
naŋona hibuyaga owʼamaani nʼefula eyʼamabaale.”
9 O Musengwa, tabuujula tabuujula olulimi lwʼabahosi bʼebibi
hiisi muutu atategeera ehi wahye aloma.
Hiri hiityo olwohuba mbona abaatu mu hibuga bahola ebikolwa ebibi era begugunga.
10 Omuusi nʼowiire basiiba hugenda ni betoloola ehibuga,
ni bahola emivuyo nʼebiitu ebyenyinyasa.
11 Hiisi ŋaatu ŋaliŋo husihiiriha
era mu nabiŋwera mwejuuye budulingi nʼohulyakula.
12 Singa omulabe ganduula, nahamwehalirihire.
Era singa omulabe ganjinyoheraho nahamwehwehire.
13 Aye omuutu oyo ndiiwe omuutu hyange
oyu ndya ni naye mu swa ndala era meeri yange,
14 oyu naali nʼomuhumba ni naye
ni hutiinanga huutyo mu nyumba ya Hatonda.
15 Leha ohufa hugwe hugwa hyʼomwibi hu balabe bange
era amagombe gabamire balamu olwohuba ehibi himenyire mu bulamu waawe.
16 Aye ndanga Hatonda,
era Musengwa ganoŋola.
17 Mu mugamba nomu muusi nʼegulo, neririgana enaku yange
era gaŋulira ejanjaasi lyange.
18 Aja hungobosa miyaaya ohuŋwa mu lutalo
wayire ndi nʼeduuli lyʼabalabe.
19 Hatonda aŋuga emirembe nʼemirembe
era oja huŋangula abalabe bange
olwohuba bageene ohucuusa ebikolwa byawe bahujumirye.
20 Oyu ndya ni naye mu swa ndala alumba meriiwe
gebirira endagaano eyi gahola.
21 Endoma yiye ndaŋi ohuhiraho omuzigo
aye omwoyo gugwe gwijuuye talo njereere.
Ebibono bibye bigonda hyʼamafuta agahaloosa ngʼolu gagondya omubiri
aye bisala hyʼepiima.
22 Yanjuliranga Musengwa ebigosi bibyo aja huhuyeeda
saaja huleha baŋangule abagwalaafu babe.
23 Aye ewe Hatonda oja huŋindiha abahosi bʼebibi mwiroŋo ereeŋi basihiirihe,
abatemu nʼabadulingi sibaja huŋesa nʼehitundu hyʼemyaha jaawe ejʼobuhulu
aye ese nesiga ndiiwe.