54
Yʼomutangirisi wʼabembi owemba nʼebivuga ebyʼewaaya. Ezabbuli ya Dawudi. Olu Abazifayiti batiina eyiri Sawulo bamuloma baati, “Dawudi atwehwehiremo.”
1 O Hatonda, noŋole olwʼobuŋangi wuwo
era nunule olwʼamaani gago.
2 O Hatonda, ŋulira ohusaba hwange
ŋulira ebi kusunga.
3 Abamalimbe banumba
abaatu abahambwe bendula obulamu wange
abaatu abo sibatya Hatonda.
4 Mu butuufu Hatonda njʼobunjeeda
era Musengwa njʼobukuuma.
5 Leha ebi balabe bange bategeha ohukola bibagobolere abeene.
Basihiirise olwohuba oli mwesigwa.
6 Nja huhuŋongera nʼesangaalo,
O Musengwa, nja huhujumirya olwohuba ehyo hiraŋi.
7 Hiri hiityo olwohuba gaanunula mu bigosi byange byosibyosi
era neboneyeho nʼemoni jange abalabe bange ni baŋooye amaani.