62
Yʼomutangirisi wʼabembi. Ezabbuli ya Dawudi. Ohwembera hu janjaasi lya Yedusuuni.
1 Nindirira Hatonda nʼobugumiikiriza ohunoŋola
era niye yeŋene njʼoyu nesiga.
2 Niye yeŋene njʼolwanda lwange
era njʼobunoŋosi wange njʼobutaasa era sinja hutya.
3 Mulyosa ŋeena ohunumba, ese aŋuma ehi ndi
era omunafu hyʼolukomera olwagwa ŋaasi?
4 Musala amagesi ohungwisa ŋaasi, mundomaho ebyʼobudulingi
era mwefuula ohuba abanyendesa ehiraŋi
aye mu myoyo jenywe jejuuye obucaayi.
5 Hatonda nje yeŋene owuupa emiyaaya
era njʼesuubi lyange.
6 Hatonda yeŋene njʼolwanda lwange era omunoŋosi wange
nja gakuuma olwʼehyo sinja hutya.
7 Obuŋangusi nʼeŋono lyange biŋwa eyiri Hatonda
njʼomuhuumi wange owʼamaani njʼolwanda era omu neŋogoma.
8 Abaatu bange mwesige Hatonda ehiseera hyosihyosi
humuŋambye emyoyo jeefe olwohuba njʼomuhweŋogoma.
9 Abaatu hwesihwesi huli muuya buuya,
ŋaŋuma owʼamaani hu begingihiriri nʼabaŋaasi
singa batupima hu mizaani huli muuya buuya.
10 Siwesigamanga hu biitu ebi osunire mu magira amabi
oba ohwenyumirisanga mu biitu ebyʼowiibi
era wayire obuŋinda buwo weyongera, sobutangaho mwoyo gugwo.
11 Hatonda aloma lwatu
era emirundi mingi kiŋuliiye ti Hatonda njʼomwene obuŋangi.
12 Era ti Musengwa ohwenda huhwo sihuhoma.
Mu butuufu oja huŋa hiisi muutu omuhemba ni weema hu bikolwa bibye.