63
Ezabbuli ya Dawudi olu gaali mu lulafu mu Buyudaaya.
1 O Hatonda, ndiiwe Hatonda wange,
kwendula nʼomwoyo gwange.
Nesunga bugali ohuba ni neewe
ngʼolu muutu aŋemba hu maaji nʼali mu hyalo ehiŋumamo maaji.
2 Kuweene mu hifo ehyawufu
era mbwene ngʼolu oli nʼamaani nʼeŋono.
3 Ohwenda huhwo ohubitiirifu husingira obulamu
era nja huhujumirya.
4 Ni kiiri mu bulamu buno nja huhwebasanga
era nja hugololanga emihono jange ni saba.
5 Wunjigusa ohuhiraho emere endaŋi eyijuuye ebirungo,
nja hwemba ni kujumirya nʼesangaalo.
6 Ni ndi hu hitanda hyange kuhebulira,
era kuŋeegaho owiire wosiwosi.
7 Olwohuba oli muyeedi wange
nembera ŋaasi wʼehisisigo hyʼamabaŋa gago.
8 Nediiye hu ndiiwe
era omuhono gugo omulungi gunjeeda.
9 Abo abenda ohunjita balibasihiirisa,
baja hutiina emagombe.
10 Balibeeta nʼepiima,
balibadanyira embwa ejomwisugu.
11 Aye habaha aja husangaala olwohuba Hatonda amuŋa obuŋangusi.
Abo bosibosi abeyama mu siina lya Hatonda baja humujumirya
aye abo abadulingi baliŋuma hya huloma.