68
Yʼomutangirisi wʼabembi. Ya Dawudi. Ezabbuli. Olwembo.
1 Leha Hatonda genyohe,
abalabe babe basalaanihe
leha abamucaawa bafulumuhe embiro.
2 Hyʼolu mbeŋo ehubba eriisi, babbinge baŋweŋo
hyʼolu musubbaawa gusaanuha mu muliro
nʼabahosi bʼebibi basihiirihire mu moni ja Hatonda.
3 Aye abagwalaafu basaŋalye
era basangaalire mu moni ja Hatonda
leha basangaale era basaŋalye.
4 Mwembere Hatonda,
mumwembere ni mumujumirya.
Mulongose engira yʼoyo agendera hu bireri,
esiina lirye nje Musengwa
era musangaalire mu moni jije.
5 Nje Bbaabba wʼabafuubbi agayira abanamwandu.
Nje Hatonda aba mu hifo hihye ehyawufu.
6 Hatonda aŋamba abali mu hiŋubaalo gabaŋa amago.
Gejeerese abasibe emisango
aye aŋamba abajeemu gabata mu hyalo ehiduleere.
7 O Hatonda, ni wanunula
abaatu babo ohuŋwa e Misiri
wabatangirira basobola ohubita mu lulafu,
8 ehyalo hyateetema
efula yajofumuha mu moni ja Hatonda owʼe Sinaayi mu moni ja Hatonda,
Hatonda wa Yisirayiri.
9 O Hatonda, Watonyesa efula eyʼamaani
yahubba eroba lyagobolaŋo bunyaaha.
10 Ngʼabaatu babo bamenyamo
era wayeeda abagadi olwohuba oli mulaŋi.
11 Musengwa gaaŋa ehiragiro
nga bangi babuulira amaŋuliro amalaŋi.
12 “Abahabaha nʼamaŋe gaawe
baduluma baleha ebi banyaga.
Ngʼabahasi abasigala mu kambi babyegabanira.
13 Ni naabo abasigala mu mago ohuhuuma ebyayo
besunira enjiiwa ni jiri nʼamabaŋa agʼefeeza nʼamooya agʼezaabbu agameregenya.”
14 Omwene Buŋangi ni gasasaania abahabaha nʼamaŋe gaawe
hyali hyʼamabaale gʼefula hu lusozi Zalumooni.
15 Ngʼesozi jʼe Bbasani mbala
era jiriho emitwe mingi bugali!
16 Lwahiina enywe esozi jʼe Bbasani
muheja hu lusozi Sayuuni nʼesaalwa,
olusozi olu Hatonda gatobola ohuba amago gage?
Musengwa aja humenya ohwo emirembe nʼemirembe.
17 Musengwa atiina mu hifo hihye ehyawufu
nʼaŋwa e Sinaayi nʼali nʼamagaali ekumi nʼekumi.
18 Musengwa ni watiina mu hifo ehya ŋamugulu obugali waŋira abasibe bangi
era wasuna ebirabo ohuŋwa nomu bajeemu
era omenyenga mu hifo ehyawufu.
19 Oŋeewe eŋono Musengwa Hatonda omunoŋosi weefe
atulaga ehyere habuhyabuhya.
20 Hatonda weefe nje Hatonda anoŋola.
Musengwa atununula mu hufa.
21 Mu butuufu Hatonda aja hutetenula emitwe jʼabalabe babe
abo abeyongera ohuhola ebibi.
22 Musengwa galoma ati, “Nja huleeta abalabe babo ohuŋwa e Bbasani
nja hubaleeta ohuŋwa mu nyanja ŋaasi,
23 muja husaaba amagulu nʼamafugi gaawe
nʼembwa jeefe jija huba nʼomugabo gwajo.”
24 Huweene ehiŋindi hyʼabaatu ni bahumba
ni batiina mu hifo ehyawufu ohujumirya Hatonda wange era habaha.
25 Abembi batangiriiye nʼabebivuga ni balondaho
ŋalala nʼabahaana ni bacakasa etambulini.
26 Gebasiwe Hatonda mu luhumbaano
gebasiwe Musengwa mu luhumbaano lwʼAbayisirayiri.
27 Ehiha ehitotono ehya Bbenjamini njʼehibatangirira,
nga hulondaho abatangirisi ohuŋwa mu hiha hya Yuda,
nga hulondaho abatangirisi ohuŋwa mu hiha hya Zebbulooni ni Nafutaali.
28 O Hatonda weefe, laga obuŋangi wuwo
O Hatonda, nindi tulage ngʼolu watulagaho ahale.
29 Abahabaha baja huhuleetera ebirabo
olwa Yekaalu yiyo mu Yerusaalemu.
30 Hangavula esolo eyimenya mu hiiho,
egwanga eriri nʼabatangirisi ko nʼabaatu abali hyʼeŋombe ebunwa bahuŋe efeeza.
Salaania abo abanyumirwa ohuhola etalo.
31 Leha Abamisiri bahuleetere ebirabo ebyʼebihomo
era leha abaatu bʼEsopiya bagolole emihono eyiri Hatonda.
32 Amawanga gosigosi hu hyalo mwembere Hatonda,
mwembere Musengwa.
33 Mwembere oyo agendera mu bbanga,
muŋulire ejanjaasi eribbwabbwanuha nʼamaani.
34 Mulangirire ebiŋamba hu buŋangi wa Hatonda,
abaatu bamuŋa eŋono mu Yisirayiri era njʼaŋuga ebireri mu bbanga.
35 Nga Hatonda otiisa nʼoli mu hifo hihyo ehyawufu!
Hatonda wa Yisirayiri aŋa abaatu babe amaani. Hatonda gebasiwe.