69
Yʼomutangirisi wʼabembi. Ohwemba ni batiinira hu janjaasi “Ebimuli.” Ezabbuli ya Dawudi.
1 O Hatonda, noŋole
amaaji ganjolire mu mamiro!
2 Neyiniha mu luteete, ŋaŋuma eroba egumu aŋa panga ohwemeerera
era amataba genda huumira.
3 Ndembire ohulira ni nenda obuyeedi noomire ŋa mamiro
era nʼemoni jange sijihibona bulaŋi olwʼohulira ni nendula Hatonda wange.
4 Abo abacaawa aŋaŋuma songa yosiyosi bangi bugali
bahiraaho nʼobungi wʼefiiri hu mutwe gwange.
Ndi nʼabalabe bangi aŋaŋuma songa abo abenda ohunjita
era baapagia ohuliŋa ebi teeba.
5 O Hatonda, omanyire ebibi byange
ŋaŋuma hibi hyange ehi otamanyire.
6 O Musengwa Omwene Maŋe,
otaleha abo abahwesiga ohuswala olwʼese,
otaleha abo abahwendula ohuswala olwʼese O Hatonda wa Yisirayiri.
7 Nehalirihire ebiduho hu lulwo
era nejuuye soni njereere.
8 Ndi hyʼomulugendwa eyiri abaganda bange
era ndi hyʼomugwira eyiri abaana ba maama.
9 Hiri hiityo olwohuba ohwenda ohunendamo enyumba yiyo hulinjitisa
era ebi baatu baloma ni bahuduha bigobola hu ndiise.
10 Ni ndira era nasiiba
ndi nʼohugumira ebiduho.
11 Banjeherera ni nambala ehigwali
ohulaga ti enaku yipambire.
12 Abo abeehala hu mulyango banjerega
era nafuuha lwembo lwʼabameesi.
13 Aye Musengwa, kusunga
wungobolemo mu hiseera hihyo ehiragaane
era Hatonda mu hwenda huhwo ohubitiirifu
ngobolemo wununule ngʼolu wasuubisa.
14 Ponie, otandeha hweyiniha mu luteete
nunule mu balabe bange
njinunule mu maaji amangi.
15 Otaleha mataba huupira
oba ohugwa mu njuho
oba eroŋo ereeŋi ohuumira.
16 O Musengwa, gobolamo ohusaba hwange
olwʼobulaŋi wʼohwenda huhwo ohubitiirifu nʼehisa ehyʼamaani, njeede.
17 Otehweha mwidu wuwo
ndi mu bugosi owʼamaani
kusunga bungobolemo mangumangu.
18 Sembera era wununule,
noŋole ohuŋwa mu balabe bange.
19 Omanyire ngʼolu balabe bange banjooga,
banduula era baaswasa,
omanyire abalabe bange bosibosi.
20 Banduhire era bakeniremo amaani ndi aŋo tyotyo.
Naheja owohupambira ehisa aye ŋaaŋuma.
Naheja owohungobosamo amaani
aye ŋaŋuma wayire mulala.
21 Enjala ni yaali ni yinduma, baapa emere eyi batayemo enduse
era enduŋo ni yaali ni yinduma, baapa omwenge gwʼemizabbibbu ogusalire.
22 Kale leha ebiiŋulo byawe bibafuuhire mutego, bibafuuhire hagumba wegoge,
leha emiyaaya jaawe jibafuuhire lutuula.
23 Leha emoni jaawe jiijeho olubooha batabona nʼohubona
nʼemigongo jaawe jigodame emirembe nʼemirembe.
24 Bajuheho ehiruŋi hihyo
era balage obusungu wuwo.
25 Leha ehibbwe hyembere mu gunda lirye,
ŋaŋume amenyamo.
26 Hiri hiityo olwohuba bahiyaania abo aba wahena hale ohuboneresa
era baloma hu abo abali mu bulumi.
27 Beguleho emisango nʼemisango
otabasoniŋa kadi.
28 Basangule mu hitabo ehyʼobulamu
era otababalira ŋalala nʼabagwalaafu.
29 Ndi mu bulumi nʼohubonaabona
O Hatonda, nunule.
30 Najumiryenga Hatonda nʼolwembo
ni muŋa eŋono era ni mweyaasa.
31 Ehyo hija husangaasanga Musengwa ohuhiraho ohumuŋa esaame,
ohuhiraho ebunwa eyʼameega.
32 Abagadi baja hubona basangaale
enywe abendula Hatonda mugobolemo amaani.
33 Musengwa aŋulira esaala jʼabali mu wetaavu
era sigebirira baatu babe abali mu komera.
34 Ebiitu ebiri mwigulu nohu hyalo, bimujumirye
enyanja ko nʼebiramu byosibyosi ebirimo bimujumirye.
35 Hiri hiityo olwohuba Hatonda alinoŋola Sayuuni
era atongole bunyaaha ebibuga bya Yuda.
Abaatu babe baja humenyamo.
36 Abejuhulu babaŋeeresa babe balihisikira
ni naabo abamwenda balimenyamo.