77
Yʼomutangirisi wʼabembi. Ya Yedusuuni. Ya Asafu. Ezabbuli.
1 Neriririra Hatonda ganjeede,
neriririra Hatonda aŋulire ohusunga hwange.
2 Ni naali mu bigosi nasaba Musengwa,
owiire nagolola emihono jange ni talehera
era omwoyo gwange ni gutamatira.
3 O Hatonda, nahuhebulira
era nabinda nʼamaani gapwamo.
4 Olwʼewe Hatonda sinalimba hwiro
naali nʼebigosi nʼohuloma ni tasobola huloma.
5 Naŋeega hu endaalo ejʼegongo,
emyaha ejahale.
6 Nahebulira enyembo jange eji nembanga owiire.
Mu mwoyo gwange nebuusa ti,
7 “Musengwa aja hukubba omugongo emirembe nʼemirembe?
Saligaluhayo hupambira hisa nindi?
8 Ŋaahani sahitwenda?
Nʼehisuubiso hihye hyahoma?
9 Hatonda galeeheraŋo ohuba wʼehisa?
Obusungu wugimire alehire ohuba wʼehisa?”
10 Ngʼaŋo ndoma ti, “Ehindumya obugali cʼehino ti:
Hatonda Ali Ŋamugulu Obugali, sahiiri wʼamaani.”
11 Nja huhebulira ebikolwa bya Musengwa,
nja huhebulira ebyamaliholiho bibyo ebi waholanga ahalehale.
12 Nja huŋeeganga hu bikolwa bibyo byosibyosi,
nja huŋeeganga hu bikolwa bibyo ebyʼamaani.
13 O Hatonda, amagira gago mawufu
hatonda hi owʼamaani hya Hatonda weefe?
14 Ndiiwe Hatonda ahola ebyamaliholiho
olaga amaani gago mu baatu.
15 Wanunula abaatu babo nʼamaani mangi
abejuhulu ba Yakobbo ni Yosefu.
16 O Hatonda, amaaji gahubona,
amaaji gahubona gahutya
enjuho jʼenyanja jateetema.
17 Ebireri byajuha amaaji,
eraadu lyaduma mwigulu,
obusaale wuwo wabitabitana ŋano ni naŋala!
18 Ejanjaasi lyʼohubbwabbwanuha huhwo lyali mu hafuusa,
ohumyasa hwahwana ehyalo hyosihyosi,
ehyalo hyateetema era hyayuuga.
19 Watema engira mu nyanja,
engira yiyo mu maaji amangi
wayire amagulu gago sigaboneha aŋa wabita.
20 Watangirira abaatu babo hyʼetaama,
Musa ni Alooni njʼabaali abatangirisi.