76
Yʼomutangirisi wʼabembi. Ohwemba nʼebivuga ebyʼewaaya. Ezabbuli ya Asafu. Olwembo.
1 Hatonda amanyiheene mu hyalo hya Yuda,
esiina lirye lyʼamaani mu Yisirayiri.
2 Eweema yiye yiri mu Yerusaalemu
amago gage gali hu lusozi Sayuuni.
3 Eyo peyi gabbwagabbwagira obusaale wʼomulabe
nʼengabo nʼepiima ebisoosa byomu lutalo.
4 Hatonda, ngʼoli wʼeŋono,
ohumba hya habaha ohuŋwa hu sozi
eyi waŋangulira abalabe.
5 Babanyagireho abasooli baawe abasira bosibosi,
eŋuma aŋanga ohutwinyoheraho.
6 O Hatonda wa Yakobbo,
ni wahayuha embalaasi nʼamagaali, byaŋwera mwiroba.
7 Aye ewe weŋene njʼoyu bali nʼohutya!
Njʼani asobola ohwemeerera mu moni jijo nʼoluŋire?
8 Nʼoli mwigulu wasala emisango
abaatu hu hyalo baatya era baŋolerehana,
9 O Hatonda, ni waŋwayo wabasalira emisango
ohunoŋola ababanyigirisa bosibosi hu hyalo.
10 Mu butuufu oweene obusungu wʼabaatu buŋwamo ohuhuŋa eŋono
era abo abaja huŋona mu talo, balihutendereza.
11 Mweyamanga eyiri Musengwa Hatonda wenywe era mwoheresenga.
Amawanga agohumulirano, galeetera oyo oyu batya ebirabo.
12 Gehahania ehitigi hyʼabaŋugi
era abahabaha hu hyalo bamutya.