75
Yʼomutangirisi wʼabembi. Ohwemba ni batiinira hu janjaasi “Otasihiirisa.” Ezabbuli ya Asafu. Olwembo.
1 O Hatonda, huhweyaasa,
huhweyaasa olwohuba oli huupi,
hiisi ŋaatu baloma hu bikolwa bibyo ebyeŋunjisa.
2 Oloma oti, “Ehiseera hyange ehiragaane,
ndisala omusango ni tehubbira.
3 Ehyalo nʼabaatu ni bateetema,
ndiise aŋambirira emisingi jaahyo.
4 Ndoma abepaahapaaha ti, ‘Mulehere aŋo ohwepaahapaaha.’
Era ndoma abahosi bʼebibi ti, ‘Mulehera aŋo ohwehudumbasa olwʼamaani genywe.
5 Mbaloma ohulehera aŋo ohwepaahapaaha
era mulehera aŋo ohuloma nʼehitigi.’ ”
6 Eŋuma mulamuzi ohuŋwa ebuŋwalyuba
oba ebugwalyuba oba mu lulafu aja huuja ni gepaahapaaha.
7 Aye Hatonda njʼomulamuzi,
geesa ono, genyosa ola.
8 Musengwa aŋambire mu ngalo jije ehihopo hyʼomwenge ogusalire ogwʼobusungu wuwe.
Agujuha ngʼabahosi bʼebibi bosibosi bagunywa bahenaŋo baati cwi.
9 Aye ese nja hulomanga hu ebi Hatonda aholire,
nja hwembera Hatonda wa Yakobbo ni mujumirya.
10 Hatonda aloma ati, “Nja husihiirisa amaani gʼabahosi bʼebibi bosibosi,
aye aga bagwalaafu galyeyongera hweyongera.”