74
Ezabbuli ya Asafu.
1 O Hatonda, lwahiina watuhubba omugongo?
Oja hutwesamba emirembe nʼemirembe?
Lwahiina oluŋira etaama jijo?
2 Hebulira abaatu babo abawefunira ohuŋwa ahale,
egwanga eriwetobolera aba wanunula,
hebulira olusozi Sayuuni ohu wamenyanga.
3 Lambuula amagunda egʼehibuga,
abalabe basihiirisa ehifo hihyo ehyawufu.
4 Abalabe babo balangirira obuŋangusi mu Yekaalu yiyo
nga basimihamo nʼebbendera jaawe ohulaga obuŋangusi waawe.
5 Bafaanana hyʼabaatu abatema ebisaala nʼembasa mwideŋo.
6 Babbwaga ebibaaje byosibyosi
ni babyadisa nʼembasa ko nʼenyundo.
7 Boohya ehifo hihyo ehyawufu
era baholera mu Yekaalu yiyo ebyʼembiho.
8 Baloma mu myoyo jaawe baati,
“Huja hubaheneraŋo erala.”
Basihiirisa nʼomuliro hiisi hifo aŋa bajumirihisyanga Hatonda.
9 Ŋaŋuma bubonero oweŋunjisa
nʼabanaabbi abasigaayeŋo
era ŋaŋuma hu efe amanyire embeera yino aŋa yija hwagamira.
10 O Hatonda, abalabe balyosa ŋe ohuhufodogola?
Omulabe aja huhutala emirembe nʼemirembe?
11 Lwahiina ogaana ohubaaho nʼehyohola?
Lwahiina weyongera ohuhweha omuhono gugwo omulungi?
Tusayo omuhono gugwo obasihiirise.
12 Aye ohuŋwa ahale nahale
ewe Hatonda ndiiwe habaha wange
oleeta obunoŋosi hu hyalo.
13 Ndiiwe owaabulamo enyanja habiri olwʼamaani gago,
wasusungula emitwe jʼagasolo agomu maaji.
14 Ndiiwe owateetena emitwe jʼebinyaŋa
era wabiŋaayo ngʼemere eyiri ebitonde byomu lulafu.
15 Ndiiwe owegula esulo nʼenjabi
era woomya enjabi embala.
16 Wataŋo omuusi nʼowiire,
ndiiwe owatonda eryuba nʼomwesi.
17 Ndiiwe owataŋo esalo josijosi ejʼehyalo
era wataŋo ebiseera ebyʼehyeya nʼebyobuŋololohi obungi.
18 Aye Musengwa hebulira ngʼolu balabe bahuduuye,
ngʼolu baŋubeebe bahunyoomire.
19 Otaleha baatu babo abali hyʼeŋuusi
wabalehera abalabe baawe abahambwe.
Abaatu babo ababanyigirisa otabebirira emirembe nʼemirembe.
20 Hebulira endagaano eyi wahola ni neefe
olwohuba emivuyo jejuuye hiisi ŋaatu mu hyalo hino.
21 Otaleha abo aba banyigirisa ohuswala
leha abagadi nʼabali mu wetaavu bahujumiryenga.
22 O Hatonda, yinyoha osolerere ebibyo
hebulira ngʼolu baŋubeebe bahufodogola oludaalo lwosirwosi.
23 Otebirira hubogola hwʼabalabe babo
nʼohwegugunga hwawe ohutahoma.