73
Ezabbuli ya Asafu.
1 Mu butuufu Hatonda mulaŋi eyiri Yisirayiri,
eyiri abo abagwalaafu mu myoyo.
2 Aye naali huupi huterera,
naali mbuliraho hatono ohugwa
3 olwohuba esaalwa yapamba ni mbona abaatu abepaahapaaha,
ni nabona ebiitu ni bitiinira bulaŋi abahosi bʼebibi.
4 Baŋuma bigosi
emibiri jaawe jibulaamo bulwaye
era bali nʼamaani gaawe.
5 Sibabonaabona hyʼabaatu abandi
obulwaye sibubajoogajooga ngʼolu bujooga abandi.
6 Ohwepaahapaaha njʼebihomo ebi bambala mu mamiro
era emivuyo njʼehyambalo hyawe.
7 Emyoyo jaawe jijuuye bibi byereere,
ebiŋeego byawe bibererera hutegeha embi.
8 Bajeherera era balimirira abandi,
bepaahapaaha era bategeha hunyigirisa abahyawe.
9 Baloma wubi hu Hatonda mwigulu
banyooma nʼabaatu babe hu hyalo.
10 Cʼehigira nʼabaatu bacuuha baaba hya nibo,
bafugiirira ebi baloma.
11 Baloma baati, “Hatonda saaja humanya.
Oyo Ali Ŋamugulu Obugali sasobola humanya.”
12 Abahosi bʼebibi baatyo polu baba
obulamu wubabereeye bulaŋi era bebbiryaho obuŋinda.
13 Mu butuufu sihyamahulu ohuhuuma
omwoyo gwange ni guli mugwalaafu,
hyawereere ohwehuuma ni tabbenga.
14 Mbonaabona oludaalo lwosirwosi
hiisi mugamba bamboneresa.
15 Singa naloma ti, “Nja hwebisya hya nibo,”
sinahabaaye wʼamazima eyiri abaatu babo.
16 Nagesyaho ohutegeera
aye hyali higosi.
17 Ohwola olu natiina mu hifo hya Hatonda ehigwalaafu
nga ko tegeera ekomerero yaawe.
18 Hituufu obata aŋali obuterere
bagwe basihiirihe.
19 Sibalwa husihiiriha,
baja husihiirihira erala.
20 O Musengwa nʼolinyoha, baja husihiiriha,
babanyoome hyʼehirooto ehiŋumamo
ehi muutu gebirira ni buhyeye.
21 Obusungu wapamba
omwoyo gwanduma.
22 Mu moni jijo
naali muŋubeebe hyʼesolo ni tahutegeera.
23 Aye hiisi ludaalo ndi ŋalala ni neewe
era oŋambiriiye omuhono gwange omulungi.
24 Wutangirira ni wundabbira
oluvanyuma oja hu nyanirisa ohwingira mu ŋono.
25 Puma wundi yesiyesi mwigulu ohutusaho ewe,
era hu hyalo puma ehinenda ehindi ohutusaho ewe.
26 Ebiŋeego nʼomubiri gwange binafu
aye Hatonda wange njʼamaani gange
njʼeyi netaaga emirembe nʼemirembe.
27 Abahweŋalama balisihiiriha
osihiirisa abatali besigwa.
28 Aye hiraŋi ese ohuba ŋaapi ni Hatonda,
Musengwa Omwene Buŋangi njʼomuneŋogoma,
nja huloma hu bikolwa bibyo byosibyosi.