72
Ezabbuli ya Sulemaani.
1 O Hatonda, yeeda habaha
omusaani wa habaha abenga wʼamazima hyʼewe nʼalamula.
2 Ehyo hija humuyeeda ohuŋuganga abaatu babo bulaŋi
era abagadi ababisye bulaŋi nʼatehubbira.
3 Leha esozi jireete emiyaaya
nʼeŋingi jireete ebibala byobugwalaafu.
4 Habaha aja hulabiriranga abagadi,
ayeede abo abatesobola
era asihiirise abalabe baawe.
5 Habaha aŋuge emirembe josijosi
hyʼeryuba nʼomwesi ngʼolu biriŋo lubeerera.
6 Leha obuŋugi wa habaha wube hyʼefula,
eŋosa eroba yayeeda ebibala mu ndimiro byahula.
7 Mu mulembe gugwe ohuhola ebiruŋamu huhwane,
ohwola omwesi olu gulihoma ohwaduha.
8 Aja huŋuga ohuŋwa hu nyanja ohwola hu nyanja,
ohuŋwa hu lwabi Yufuleeti ohwola ehyalo aŋa hihoma.
9 Abaatu bomu lulafu balimuhubbira amafuha,
era abalabe babe baligafubira mu fuuhe.
10 Abahabaha bʼe Talusiisi nʼabomu bizinga balimuleetera ebirabo.
Era abahabaha bʼe Seebba ni Seeba balimuleetera ebirabo.
11 Abahabaha bosibosi balimuhubbira amafuha
nʼamawanga gosigosi galifuuha baŋeeresa babe.
12 Hiri hiityo olwohuba aja hununula abatesobola abamweriririra
abo abagadi abaŋumiririraho wʼohubayeeda.
13 Aja huŋambira abanafu nʼabatesobola ehisa
abatesobola abataase ohufa.
14 Aja hubanunula ohuŋwa mu hubanyigirisa nʼohubabisya obubi
olwohuba obulamu waawe wʼebbeeyi eyi ali.
15 Wangaala habaha!
Abaatu bahuŋenga ezaabbu ohuŋwa e Seebba.
Leha abaatu basabirenga habaha era leha bamwebasenga hiisi ludaalo.
16 Ebibala biijule hiisi ŋaatu nohu sozi hwosi.
Leha ebibala bireremale hyʼebyomu Lebbanooni.
Era abaatu beejule ebibuga babe hyʼenyaasi.
17 Habaha abeŋo emirembe nʼemirembe
gaaliŋo konyo eryuba libeŋo.
Abaatu bosibosi balisuna ekabi ohubita mu habaha oyo.
Era baja humulanganga wʼekabi.
18 Musengwa Hatonda,
Hatonda wa Yisirayiri aŋeewe eŋono, yeŋene njʼahola ebyeŋunjisa.
19 Gebasiwe emirembe nʼemirembe
ehyalo hyosihyosi hiijule eŋono lirye.
Amiina era Amiina.
20 Yino njʼengohoba yʼohusaba hwa Dawudi omusaani wa Yese.