71
1 O Musengwa, ndiiwe omuneŋogoma
otandeha huswala.
2 Ohola ebiruŋamu nunule,
tegere ohutwi yanguŋaho wununule ba pungulu yange omunehweha,
ofuuhe ebaale eringadirira.
3 Ba lwanda lwange omuneŋogoma
ehifo omundulumira ohusuna obuhuumi. Lagira ohunoŋola.
Ndiiwe olwanda lwange era ehifo hyange omunehweha.
4 O Hatonda wange, nunule ohuŋwa mu bahosi bʼebibi
era wuponie amaani gʼehibi
abaatu abehubbira era abahambwe.
5 O Musengwa Omwene Buŋangi,
esuubi lyange liri mu ndiiwe
era kwesigire ohuŋwa buvubuka wange.
6 Obaaye ni nange ehiseera hyosihyosi ehyʼobulamu wange
wukumire ohuŋwa olu naŋwa mu hida hya maama
era nja huhujumiryanga hiisi hiseera.
7 Obulamu wange hyahuboneraho eyiri abaatu bangi
olwohuba ndiiwe ehifo ehyʼamaani omuneŋogoma.
8 Cʼehifa kutendereza oludaalo lwosirwosi
ni ndangirira ebiŋamba hu eŋono liryo.
9 Olwʼehyo otanetusaho olwohuba ŋahani ndi musahulu,
otandehulira olwʼohubona ti ŋahani gapooye.
10 Abalabe bange bateesa ohunjita
behobana ohukenaŋo.
11 Era baloma baati, “Hatonda gamuhubba omugongo
hutiine humuŋambe olwohuba ŋaŋuma owʼohumununula.”
12 O Hatonda, otamba ŋaleeŋi.
O Hatonda wange, nja mangu wunjeede.
13 Leha abo abapaŋabira baswale era obasihiirise
leha abo abenda ohukosa baswale.
14 Aye ese habuhyabuhya esuubi lyange linabenga mu ndiiwe
nja hweyongera ohuhujumiryanga.
15 Nasiibenga ni ndomera abaatu hu biŋamba hu biruŋamu ebi ohola ebiŋamba hu bunoŋosi wuwo,
wayire nga simanyire bungi wabyo.
16 O Musengwa Omwene Buŋangi
nahujumiryenga olwʼebyamaani ebi ohola
era nja hulangirira obuluŋamu wuwo, owuwo woŋene.
17 O Hatonda, ohuŋwa mu buvubuka wange wusomehiise
era nʼohwola hatyane ndomera abaatu hu biŋamba hu byeŋunjisa ebi ohola.
18 O Hatonda, kusunga atandehulira mu busahulu buno
otakubba mugongo
ohwola olu ndiromera abʼomulembe oguuja ebiŋamba hu maani gago
hu maani gago eyiri abo aba baja husaala.
19 O Hatonda, obuluŋamu wuwo woola nohwigulu
oholire ebyeŋunjisa bingi
O Hatonda, njʼani ali hyʼewe?
20 Wayire wundehire nabonaabona nʼebigosi bingi era ebyʼamaani
oja hungobosa bunyaaha
oja hundamusa ohuŋwa e magombe.
21 Oja hufuula ohuba owʼeŋono eryʼamaani
era wambudabuda nindi.
22 O Hatonda wange, nja huhujumirya ni kubba ogutongooli olwohuba oli mwesigwa
nja huhujumirya ni kubba ahatongooli olwohuba ndiiwe Omwawufu wa Yisirayiri.
23 Nja hwembera ŋamugulu olwʼesangaalo ni kwembera etendo
ese oyu wanunula.
24 Oludaalo lwosirwosi nja huloma
hu biŋamba hu biruŋamu ebi ohola olwohuba abo abenda ohuukosa
obaswahise era obatabujuuye.