79
Ezabbuli ya Asafu.
1 O Hatonda, amawanga galumbire ehyalo hihyo,
baholire ebyʼembiho hu Yekaalu yiyo enjawufu,
ehibuga Yerusaalemu bahirehire ni hiri magunda.
2 Emirambo jʼabaŋeeresa babo bajiŋa esega ohuba mere,
emibiri jʼabagwalaafu babo bajiŋa esolo jeriire.
3 Amafugi gʼabaatu aba beeta,
gabanda hiisi ŋaatu mu Yerusaalemu oti maaji,
ni ŋaŋuma wa hubasiiha.
4 Abaliranwa beefe batuduula,
batujerega era batujeherera.
5 Musengwa olihyosa ŋeena?
Oja hutuluŋira emirembe nʼemirembe?
Ebuba liryo lija hwosa ŋe ohwaduha hyʼomuliro?
6 Luŋira amawanga agatahumanyire,
abaatu abo abatahujumirya.
7 Hiri hiityo olwohuba bahenireeŋo abejuhulu ba Yakobbo,
baasihiirisa ehifo hyawe.
8 Otatuboneresa olwʼebibi byʼabasehulu beefe.
Yanguŋaho otuŋambire ehisa olwohuba hwenda obuyeedi.
9 O Hatonda, tuyeede otunoŋole,
ehyo hija huhuŋeesa eŋono,
tununule era tusoniŋe ebibi byefe olwʼesiina liryo.
10 Lwahiina abaatu abamawanga bebuusa baati,
“Hatonda waawe ali ŋeena?”
Leha huhubone ni wegalula amawanga olwʼohwita abaŋeeresa babo.
11 Ŋulira ohubinda hwʼabasibe
era olwʼobuŋangi bubo, huuma abo aba basalira ogwʼohufa.
12 O Musengwa, yesasule abaliranwa beefe emirundi musanvu
olwʼebiduho byawe ebi bahuduha.
13 Efe abaatu babo, etaama ejomu hidooli hihyo
huja huhweyaasa emirembe nʼemirembe
huja huhujumiryanga emirembe josijosi.