80
Yʼomutangirisi wʼabembi. Ohuyemba ni batiinira hu janjaasi lyʼEbimuli ebyʼEndagaano. Ya Asafu. Ezabbuli.
1 Tuŋuliirise ewe olabirira Yisirayiri hyʼomwayi,
ewe otangirira Yosefu ngʼolu muutu atangirira etaama,
ewe owihala ŋagati wʼabakerubbi, leha enjase yiyo yaduhire
2 ehiha hyʼEfulayimu ni Bbenjamini ni Manase.
Tunoŋole olwʼamaani gago.
3 O Hatonda, tugobose bunyaaha
tuŋambire ehisa hwahanoŋoha.
4 O Musengwa Hatonda Omwene Maŋe,
olihyosa ŋe ohuluŋa olwʼesaala jʼabaatu babo?
5 Otwiŋuuye ohubonaabona
era otuŋaaye ohunywa ehihopo hyʼamasiga ameene amangi.
6 Otufuuye ehiitu ehyʼohwenyinyalya eyiri abaliranwa beefe
era abalabe beefe batujeherera.
7 O Hatonda Omwene Maŋe,
tugobose bunyaaha,
tuŋambire ehisa hwahanoŋoha.
8 Watusa omuzabbibbu ohuŋwa e Misiri,
wabbinga amawanga ohuŋwa mu byalo ebyo,
ngʼohena oguhomaamo.
9 Wagulongohesa ehisambu
nga gusimiha emirandira gulanda mu hyalo.
10 Ehisisigo hyagwo hyawiihirira hu hiisi lusozi
ngʼamasaga gaagwo gawiiha emitumba emireeŋi.
11 Amasaga gaagwo gatandabala ohwola hu nyanja Meditereniani
nohu lwabi Yufuleeti.
12 Lwahiina wabbwaga olukomera olugugadirira,
hyaleetera bosibosi ababitaŋo ohwenogera ebibala byagwo?
13 Embiiji jomwisugu jigutyakirira
nʼesolo josijosi ejomwisugu jigulya.
14 O Hatonda Omwene Maŋe, cuuha ogobole eyi huli.
Heja ŋaasi ohuŋwa mwigulu obone era olabirire omuzabbibbu guno,
15 omulandira ogu muhono gugwo omulungi gwahoma,
olusaga lulwo olu wamwene wafuula olwʼamaani.
16 Baatema omuzabbibbu gugwo bagwohya omuliro
abaatu babo basihiiriha onabahangavula nʼobuhambwe.
17 Leha omuhono gugwo gube hu muutu ali hu luuyi olwʼomuhono omulungi
omwana wʼomuutu oyu wamwene wehuhisa.
18 Tugobese bunyaaha huja huhujumiryanga nindi
era sihuja huhuŋwaho.
19 O Musengwa Hatonda Omwene Maŋe,
tugobese bunyaaha
tuŋambire ehisa hwahanoŋoha.