81
Yʼomutangirisi wʼabembi. Ohuyemba ni batiinira hu gitisi. Ya Asafu.
1 Mwembere Hatonda nʼesangaalo olwohuba njʼamaani geefe,
mwembera Hatonda wa Yakobbo mu janjaasi eryaŋamugulu!
2 Mutandiihe olwembo ni muhubbireho nʼetambulini
muhubbireho ahatongooli ko nʼogutongooli.
3 Mufuuŋe olwiga lwʼetaama emiigu omwesi ni gwahabaluha
era nʼomwesi ni guhulire hu ludaalo lwefe olwʼembaga.
4 Lino gambi eyiri Abayisirayiri,
hiragiro hya Hatonda wa Yakobbo.
5 Galiŋa ohuba egambi eyiri Yosefu
olu gawaagala ehyalo hyʼe Misiri
eyi hwaŋulira olulimi oluhutategeera.
6 Aloma ati, “Nabatwihula emigugu
era nabatusaho ehinaaba ehisito ehi baali ni babbeedire.
7 Ni mwali mu bigosi mwananga nga mbanunula,
nabagobolamo mu hireri ehibbwabbwanuha.
Nabagezesa hu maaji gʼe Meribba.
8 Enywe abaatu bange muŋulire,
enywe Abayisirayiri nja hubalabula singa mupulirisa.
9 Simujumiryanga bahatonda abandi
era simuhubbiranga bahatonda abandi amafuha.
10 Ndiise Musengwa Hatonda wenywe
owabatusa mu hyalo hyʼe Misiri.
Mwasamye eminwa jenywe, nja hubegusa.
11 Aye abaatu bange sibapulirisa,
Abayisirayiri sibagonda.
12 Olwʼehyo nabaŋwaho nabaleha bahole ngʼolu hwegomba hwʼemyoyo jaawe hwali,
ohuhola ngʼolu abeene benda.
13 Singa abaatu bange bapulirisa,
O singa Abayisirayiri bagendera mu ngira yange,
14 nahabaŋanguliiye abalabe baawe bosibosi mu dakiika ndala,
era omuhono gwange gwahabaholireho.
15 Abo abacaawa Musengwa bahamuhubbiye amafuha olwʼohutya
era ehibonerezo hyawe hyahali hyʼemirembe nʼemirembe.
16 Aye mwahaliiye engaano enyene endaŋi
nʼomudugere ohuŋwa mwibaale mweguta.”