5
Esanduuku yʼEndagaano mu Bafirisuuti
1 Abafirisuuti ni banyaga esanduuku ya Hatonda, bayitusa mu Ebbeneeza bayiŋira e Asidodi.
2 Ni bayoosa eyo, nga bayita mu yekaalu ya Dagoni. Era bayitengeha aŋo ohumulirana.
3 Abaatu bʼe Asidodi ni benyoha mu mugamba pwipwipwi, batuhira Dagoni nʼaguuye mafumaaye mu moni wʼesanduuku ya Musengwa. Nga bagangamusa Dagoni bamugobosa mu hifo hihye.
4 Aye ni wahya mu mugamba ni benyoha batiina mu yekaalu, leero hulwo batuhira Dagoni nʼaguuye mafumaaye mu moni wʼesanduuku ya Musengwa. Omutwe nʼemihono ni bibbwagihireho, ni biri ŋa mulyango era omubiri gwoka njʼogwasigala.
5 Ehyo cʼehigira abasengi ba Dagoni ni bengira mu yekaalu ya Dagoni, sibeema ŋa mulyango aŋa basiritira engaano mu Asidodi nʼohwola olwa leero luno.
6 Musengwa gaboneresa bugali abaatu bomu Asidodi nʼebitehere ebyeswanigirihiise baatya. Gabadanyaho ebizimba.
7 Abaatu bomu Asidodi ni babona ebyaboolaho nga baloma baati, “Esanduuku ya Hatonda wʼAbayisirayiri siyija hweyongera ni yiri ŋano olwohuba Hatonda waawe ali hutugudya efe ni Dagoni hatonda weefe bugali.”
8 Olwʼehyo batumisa abatangirisi bʼAbafirisuuti bosibosi nga bababuusa baati, “Esanduuku ya hatonda wʼAbayisirayiri huyihole huutye?”
Nga babagobolamo baati, “Esanduuku ya hatonda wa Yisirayiri muyiŋire e Gaasi.” Olwʼehyo, bayiŋira e Gaasi ehibuga ehindi ehyʼAbafirisuuti.
9 Aye oluvanyuma lwʼohuyoosayo, Musengwa gaboneresa abaatu bomu hibuga ehyo, olusisimo olwʼamaani lwabaŋamba. Abaatu bomu hibuga ehyo, abahulu nʼabaŋere gabadanyaho ebizimba.
10 Olwʼehyo baŋeeresa esanduuku ya Hatonda mu hibuga Ekurooni.
Aye ni bayoosa eyo abaatu bomu Ekurooni nga bahayaana baati, “Batuleteeye esanduuku ya Hatonda wa Yisirayiri ohutwita hwesihwesi!”
11 Olwʼehyo abaatu bomu Asidodi balanga abatangirisi bʼAbafirisuuti bahumbaana babaloma baati, “Mwagamyeyo esanduuku ya Hatonda wa Yisirayiri mu hifo hyayo etatwita hutuhenaŋo.” Baloma baatyo olwohuba ohufa hwali huleetire olusisimo lubitiirifu mu hibuga. Hatonda gababoneresa bugali weene.
12 Abo abaŋunuha ohufa, babadanyaho amabute era ohulira hwali hungi mu hibuga.