6
Bagamya Esanduuku mu Yisirayiri
1 Esanduuku ya Musengwa ni yaali nehenire emyesi musanvu mu hyalo hyʼe Firisuuti.
2 Abafirisuuti balanga abasengi nʼabafumu nga bababuusa baati, “Esanduuku ya Musengwa huyihole huutye? Mutulomere, huyagamya huutye?”
3 Nga babagobolamo baati, “Ni muba ni mwagamyayo esanduuku ya Hatonda wa Yisirayiri, mutayagamyayo njereere, muyagamye nʼehirabo ohutusaŋo ebibi byenywe. Munaŋona, muuja humanya muuti Hatonda njʼobaaye nʼaboosaho ebiguudyo.”
4 NgʼAbafirisuuti babuusa baati, “Hirabo hi ehyʼohuŋindihiraho?”
Ngʼabasengi nʼabafumu babagobolamo baati, “Baŋambe ezaabbu bawumbemo ebiwumbe ebiri hyʼamabute bitaanu, nʼebiri hyʼembeba bitaanu, hiisi hirala hu ebyo ni hiri hya mulala hu baŋugi bʼAbafirisuuti abataanu olwohuba haŋupuli oyu babasindihira njʼoyu basindihira nʼabaŋugi bʼAbafirisuuti abataanu.
5 Olwʼehyo muŋambe ezaabbu mubbotemo ebiitu bitaanu ebiri hyʼamabute, muhene mubbote ebindi bitaanu ebiri ti hani mbeba ejihenireŋo ebirime mu gwanga lyenywe. Singa muŋa Hatonda wa Yisirayiri ebirabo bino, mwamuŋa eŋono somanya aŋanga galehera aŋo ohubaboneresa nʼabahatonda benywe nʼebirime mu gwanga lyenywe.
6 Lwahiina muhahanyasa emyoyo jenywe ngʼolu Abamisiri ni habaha waawe bahola? Ne Hatonda wʼAbayisirayiri ni gabanoneresa Abamisiri sibaaleha Abayisirayiri batiina?
7 “Ŋaahani musune ehigaali ehinyaaha muhisidiheho eŋombe ebiri eji bahama eji batatangaho hijoogi ne enyana jaajo mujiboŋe hu hihongo.
8 Muŋambe esanduuku ya Musengwa muyite hu higaali ehyo. Muŋambe ebiitu bira ebiri oti mabute agʼezaabbu nʼembeba ejʼezaabbu mubite musaŋu yabyo muhene mubite hu higaali ohulirana esanduuku ya Musengwa. Ni muhenire, muyiseebule etiine.
9 Era muhene muyiteho emoni ohubona eyi luŋama. Singa yiruŋama engira eyitiina e Bbesi Semesi, nga hutegeera huuti Musengwa njʼobaaye nʼatugudya. Aye singa siyiruŋama eyo nga hutegeera huuti ebiguudyo byatugwira hutugwira.”
10 NgʼAbafirisuuti bahola ngʼolu babaloma. Nga baŋamba eŋombe ebiri eji bahama bajisidiha hu higaali ngʼenyana bajisidiha hu bihongo.
11 Nga batengeha esanduuku ya Musengwa hu higaali nʼebbokisi eyaalimo ebibbote ebyʼezaabbu ebyali hyʼembeba nʼamabute agababbota mu zaabbu.
12 Ngʼeŋombe jisimbuha jiruŋama buterefu jitiina e Bbesi Semesi era sijacaamaho hutiina hu muhono omugooda oba omulungi wayire. Era jatiinanga mu ngira omwo mwosimwosi ni jimoola. Abatangirisi bʼAbafirisuuti bajirondereraho ohwolera erala hu salo ni Bbesi Semesi.
13 Abaatu bʼe Bbesi Semesi baali mu hiiho ni bahungula engaano. Ni bagangamusa emoni, babona esanduuku eyo, basangaala bugali.
14 Eŋombe nga jaŋira ehigaali ehyo mu ndimiro ya Yoswa owʼe Bbesi Semesi nga jemeerera ohulirana ogubaale. NgʼAbaatu babbwaga ehigaali ohusuna ekwi nga basala eŋombe bajiŋonga eyiri Musengwa ngʼeŋongo eyi bohya ehwiye lyaguguliha.
15 Abaleevi babbeeda esanduuku ya Musengwa nʼebbokisi eyaalimo ebibbote ebyʼezaabbu ebyali oti hani mbeba nʼamabute agababbota mu zaabbu nga babita hu gubaale. Era hu ludaalo olwo abaatu bʼe Bbesi Semesi baŋa Musengwa eŋongo eyi bohya lyaguguliha ko nʼamaŋongo agandi.
16 Abatangirisi abataanu abʼAbafirisuuti babona ebyo byosibyosi era hu ludaalo olwene olwo bagamayo Ekurooni.
17 Ebibbote ebiri oti mabute agʼezaabbu ebitaanu ebi Abafirisuuti baaŋa Musengwa ohuba eŋongo etusaŋo ebibi byawe, byali birabo ohuŋwa mu baŋugi bʼe Asidodi ni Gaaza ni Asikelooni ni Gaasi ni Ekurooni.
18 Era baŋeeresa ebibbote ebiri oti mbeba ebi babbota mu zaabbu ohuŋaayo ngʼeŋongo hu lwʼebibuga ebitaanu ebyaliho olukomera ko nʼebitehere byabyo. Ogubaale ohu baata esanduuku ya Musengwa mu ndimiro ya Yoswa owʼe Bbesi Semesi, lihiririŋo ngʼobujulizi nʼohwola olwa leero luno ohuhahasa ebyo ebyaliŋo.
19 Aye Musengwa geeta abaatu sanvu abʼe Bbesi Semesi olwohuba balengeesa mu sanduuku yiye. Abaatu balira bugali olwehikangabo ehyo ehi Musengwa gaboosaho.
20 Ngʼabaatu bʼe Bbesi Semesi bebuusa baati, “Njʼani asobola ohwemeerera mu moni ja Musengwa, Hatonda ono omwawufu gaabaŋo mulamu? Esanduuku yino huyiŋire ŋe?”
21 Nga batuma abahwenda eyiri abaatu bʼe Kiriyaasi Yeyariimu babalome baati, “Abafirisuuti bagobohiise esanduuku ya Musengwa. Mwihirire mu yibbede muyininieninie muyiŋire mu hibuga hyenywe.”