9
God ga e fuon fu ke uniainma ijin
Efnun na vuak be madu kuardiakrej. Naiji na Jesu Kuraisk besum renva ijefuon vuak irerag na kuaivo iji na kufuimejo bakin. Na Kaven Akai iji fu oinun ijia ik reno ijefuon vuak irerag na kuaivo iji na kufuimejo bakin. Na e nun Jiusbuon oifian ga vajai fian bomana abej. Ijefuon maiji bu nana ai besum ruain ga madu bu e uifarif nun. Regavo God fu Jesu Kurais kuama fu ise nuvuon ijia karaunuokro ruainma iji buba ma vierafene fu abe oibuon ijia unain. Bu e nun gavo bu koikbuon Jesu Kurais bun nuigafainva ijefuon tavan rad God fu bu kam vajai fian vajiaga bu aoik. Na e nun Jiusbuon oifian bomana abejo ijefuon na vierafero God fu na abe arafirie vo abe garef be uniega na Jesu Kuraisk besum na mazinva fuka arekro na iji vierafen. Na vierafe God fuka na abe ijegrega e nun bu ijia gieme una God ma vierafek.
God fun usuibe e Jius iji kege uniame fuon sanainma iji abe bu miain. Rene fu bu kia, Jaiji ja afnuno kiain. Regavo madu God fu buon bomana oimarenma ijefuon fu akai fuon abe miain. Rene fu unam ma iji bu izeg fu aroikfuon iji nijaidiame fu madu tavan rad bu ma karivakfuon iji abe miakno kiain. God fu ijeg kuardiain gavo e Jius iji buba fu igain. E Jius iji buka e ikin Eburam ga Aisek ga Jekafbuon agan ijia uinvene ruain. Regavo madu Jesu Kurais e iji God fu kuama fu ari ruainma iji fuk fu agan besum ijia uinvene ruain. Jesu Kurais fuk fu God ga fu ire fok samuagdiamon. Ijefuon na vierafe noka tavan bog Jesu Kurais dab aroikfuon. Mare.
6-7 Regavo God irerag fu e Jiusbuon rekro kuainma iji fu arekma bakin. Fu rek revo e Isrer roin ga e Eburamon uifarif ijia bu Godon e renva bakin. Regavo God fu usuibe e Eburam fu ijeg kua, Farif on Aisek kuaivo ijar e iji na usuibe imut tuainva ga bu kege uniainva iji nafekno kuain. Regavo e Eburamon uifarif ijia e roin buba Godon afijaf rek. Revo fu e iji God fu usuibe bu kege uniainma ijesugin bu ma Eburamon uifarif rek. Regavo usuibe God fu vuak be ijeg kuai,
Na tavan iji na abedenva ijia una bara Sera kuaga fu am farif be nafekno kuain.
10-13 Areme rad e Aisek fun uri ofrene bara fuon Rebeka kuavo iji aben. Regavo Rebeka fu am farif fuatkaruk nokarok (2) nafega God fu Rebeka ijeg kua, Na vierafe amon amur e Iso kuavo iji fu una uviaifuon diar e Jekaf kuavo iji nidoime vo fu agoikno kuain. Regavo vuak iji God fu Rebeka kuardainma iji bun usuibe buk akaij ijia ijeg isoime kuai, Na vierafe na e Jekaf fuonkua oijmak revo e Iso na ziegafakno kuain. Regavo God vuak iji fu kuainma iji bara Rebeka fuba am fuatkaruk iji nafenma ijia fu ijeg kuain. Regavo madu am nokarok (2) iji buba koikbuon uri unam ma ga ise iji giame vierafenva ijia God fu vuak ijeg amur buifuon kuain. Regavo e Iso ko Jekaf bu ire kafo ma renva ijefuon God fu bu kege uniainma bakin. Regavo fun Godri fuon vierafenma ijia fu e besum (1) oijmaga be fu ijia aren.
14 Regavo no God e iji fu vierafene ke uniainma ijefuon noba kuaik. Ijefuon maiji fuiji fuka roinknum reno bakin. 15 Ijefuon maiji God fun usuibe e Jekafon uifarif ijiebuon e Mosis kua,
Na e iji na kege uniainva na ijin ifejdiak. Regavo madu na e iji na kege uniainva na ijiebuon oifian abekno kuain.
16 Ijefuon e iji God fu kege uniamo iji bum e ijieb buon vierafejo ijia ga giriesavo ijefuon God fu bu kege uniamo bakin. Revo fun Godri buon oifian abene e ijekin iji ifejdiam. 17 Regavo God fu usuibe buk akai bu isoinva ijia e bomana be ai Ijift samuamo if fuon Fero kuardainma iji fu ijeg kuai,
Na a kuava a e ikin renma ijefuon maiji na daro nun abe a maga a abe e fok nijaidiaga bu ijia game vierafero naiji na e darokiro bu ijeg vierafek. Regavo madu ar vuak nun ma iji ga if nun bomana iji abe e fok nijaidiakno kuain.
18 Ijefuon God fu fuon vierafenma ijia fu e kafo giame buon oifian abeknum ifejdiamon. Regavo e kafo fu giame oibuon kege karoiga bu dazme una Godon vuak faivo ma vierafejo bakin.
Godon ziemo ijiga fuon ma rediamo ijin
19 Regavo e kafo ja una na kiek, Fu Godri fuon vierafenma ijia no kege unuoknum no maguom. Regavo God fu ijegreno e igi fu erar Godon vierafe iji uzamo bakin. Regavo e igi bu oine ise kafo rejo God fu irerafuon ise buon giame kiaknum ke bu namdiak. 20 Regavo efnun ja vuak ijekin iji jaib una God kuardak. Regavo ni saror bu duok nifiejo iji vierafef. Saror fuba una e iji fu amarenma iji kuak, A irerafuon na abe ijeg amaremno kuak? Saror fu una ijeg kuakma bakin. 21 Regavo e iji saror amardiamo iji fu sakimug besum ijia abe fuon vierafenma ijia saror nokarok (2) amardiak. Saror be fu amarekin bu tavan bog duok nifie ik revo be fuka amarkin bu tavan mamkanuk ijesugin abe duok nifiek.
22 Regavo God fuk fu e iji saror amardiamo fu ijeg ren. Fu fuon vierafenma ijia fu fine e Jius iji kege unam kafokafo buon ren. Ijefuon God fu fuon fu vierafenma ijia fu e iji ise renva iji uzain. Regavo madu fu e iji bu ise rega fu kam vajai fian vajiamo ijia fu daro fuon abe e fok nijaidiain. Regavo ni vierafe e iji bu Godon nifak ijia ise reoinva iji God fuka ma deajin ga fuka e iji kam arafiriakfuon. Regavo fuba ijeg ren revo fu vek afuime buna isuar fi ruain.
23 God fu e iji ise renva iji fu afuime isuar buna finma ijefuon maiji fu fuon ma kediamon iji abe e Jius iji miakro fu ijefuon ijeg ren. Regavo fu madu vierafe fu fuon sanainma iji abe e igi no fu usuibe kege unuinma iji muokafa fu ijeg vierafen. Regavo madu fu nuvuifuon oifian abeknum fuon sanainma iji abe muokafa fu ijefuon nona isuar fin. 24 God ire iji fu rekma fu e igi no fu kege unuinma iji nuvuon rek. Regavo ire iji fu rekma fu e Jius ijesugin ijegrekma bakin revo fu e Jius bakin igi no madu ijeg rek. 25 Regavo buk e Osia fu isoinma ijia God fu ijeg kuai,
E iji buba e nun renva iji na kiaga bu una e nun rek. Regavo e iji naba bu oijmiainva iji na kia nan ja oijmiavno kiak.
26 Regavo madu buk besum ijia God fu e Jius bakin iji kia,
Jaiji ja e nun bano kiainva iji fu una kia, Jaiji ja God iji tavan bog ijia fivako ijefuon afijaf renvano kiain.
27 Regavo madu buk Asaia ijia fu madu e Isrerkobuon ijeg kuai,
E Jius ai Isrer ijia karinva iji buka ire jier bu davo bakin ijeg uruvana rek. Regavo e sibank bu God ma vierafega God fu e ijesugin karauniak. 28 Regavo tavan iji fun samairen ijefuon fu e fok bu iserejo iji fu kam arafiriakno kuain.
29 Regavo madu buk Asaia ijia vuak be fu madu ijeg kuai,
God fuba nuvuon oifian abene ifejduinmabatie noiji noka ai Sodom ga Gomora God fu kam arafiriainma ijeg fu madu no kam ijeg arafiruokno kuain.
E Isrerko bu God ba ma vierafenva ijin
30 Ijefuon non ga e Jius bakin iji bu ur bu unam God fu e karauniame una ke unam fuon ma ijia uniamo iji buba nisaime aben revo iviakma bu unam iji bun aben. Ijefuon maiji bu ma vierafega Jesu fu ise buon ijefuon guain ijefuon God fu bu karauniame ke una unam fuon ma ijia uniain. 31 Regavo e Jius iji bu ur Godon unam ma iji abekuai giriesainva iji buba aben. Ijefuon maiji bu Godon akaij iji buba mukorigia igiain.
32 Bu Godon unam ma iji buba abenva ijefuon maiji buba God ma vierafen. Regavo bum vierafero bu Mosison akaij iji mukoi igiavo ijefuon God fu buon oimarkro bu ijeg vierafen. Bu ijeg vierafeknum reoijo ijefuon God fu buk akaij ijia fu Jesuon ijeg kuai,
33 Na ai Jerusarem ijia e be abe mun igeg ijia ruabesek. Regavo mun ijar maniknum e uruvana diak nizukiaknum atog kaniak. Regavo erar fu mun iji ma vierafekma e iji fu tavan rad fuba oifian abekno kuain.