Ⅹ
Ⅰ ꞌAn ꞌlotʋꞌa ꞌꞌnynuu-a, lɛ ꞌɩn ꞌybhaꞌa ꞌan -pɔlʋ ꞌzɔ, ꞌɩnnɛ ꞌmo-o, ꞌan -Bozuifʋꞌa dɩ ꞌɩn-ɩ bhadeꞌe -Lagɔ li ꞌle ʋn ꞌke ꞌpʋn ꞌbho ꞌɔ ꞌꞌyigbeyi.
Ⅱ Lɛ ꞌɩn ꞌꞌduuꞌa ꞌꞌyriti ꞌbho ꞌwa ꞌꞌkpi -ɛ -ke ꞌꞌdɩ ꞌɩn ꞌka -za, ꞌɩnnɛ ꞌmo-o ꞌbho -Lagɔꞌɔ gbaꞌa ꞌꞌyikpʋnnamʋ, nyɔ-ɔ ꞌkʋ ʋ ꞌmʋ-zi, ɔ se -nɩ, ʋn yaaꞌa-a ꞌmʋti ꞌɛ damʋ. ꞌLe ꞌwa ꞌmʋtiyɛɛɛ ꞌmnɛ se -Lagɔꞌɔ yiboɛzɛgɛ kliꞌbhle.
Ⅲ -Ka ɔ poꞌa nyʋ ꞌꞌyisrɛɛmʋ, ʋn se ɩ yibo, ꞌle ʋn ꞌye ꞌwa ꞌꞌbhiꞌa nʋnʋdɩ gbo -vuo ʋn ꞌke ꞌꞌyisrɛɛmʋ ꞌꞌdu, ꞌle ʋn-ʋ muꞌo ꞌwa ꞌꞌbhiꞌa ꞌmʋtikukuɛꞌɛ ꞌmʋpɛɛɛ ꞌꞌlru. -Ka -lue ꞌmnɔ, ꞌka-a ʋn -see ꞌybha, -Lagɔ -yɔ poꞌa nyʋ ꞌꞌyisrɛɛmʋ ꞌbho ꞌɔ ꞌꞌyigbeyi, ɔ -bodɩ ʋn ꞌke ꞌwa ꞌꞌbhi ya-ya, ꞌle ʋn -see *Kliisɩ ꞌꞌgwlide.
Ⅳ ꞌTraamʋ ꞌtɔ ɔ, gba -Lagɔ ꞌꞌnyɩꞌa *Moyiizɩ -bɛnyɩ, Kliisɩ ꞌmo-o ꞌɛ -jolʋꞌa ꞌꞌyitiflɔyi. ꞌLe nyɔꞌꞌo nyɔ-ɔ de ꞌɔ ꞌꞌgwli, ꞌɩnnɔ ꞌꞌduꞌo ꞌꞌyisrɛɛyi ꞌbho -Lagɔꞌɔ ꞌꞌyigbeyi.
*Zeziiꞌa ꞌꞌgwlidemʋꞌa ꞌpʋnpʋan
Ⅴ A -gblee, lɩ *-Lagɔꞌɔ gba ꞌꞌsiꞌa ꞌnynɩ, -bho *Moyiizɩ ꞌcnɩ ɩ see a, ꞌle ɔ ꞌke na: Nyɔ -yɔ -kpʋnꞌa -Lagɔꞌɔ gba ꞌꞌyi -ziaka, ɔ -kpʋn ꞌnɩ-ɩ ꞌꞌyiꞌa dɩ, ɔ-ɔ ꞌyeꞌe tinɩɛzɛgɛ, ꞌle, ꞌꞌyisrɛɛɛ-ɛ ꞌwlʋꞌa -Lagɔꞌɔ gbaꞌa ꞌꞌyikpʋɛn ꞌmʋ, ꞌɩnnɛ ɔ-ɔ zaꞌa ꞌmʋ.
Ⅵ Ɛ -nɩꞌa -kaa ꞌmʋ, nyɔ -ke -Lagɔꞌɔ ꞌꞌgwlideɛꞌɛ dɩ -Lagɔ ꞌwɔɔnꞌɔ ꞌꞌkpi, wlu -ɛ ꞌcnɩ-ɛꞌɛ ꞌɔ dɩ, ɛ na: -Aꞌa nʋ ꞌle -aꞌa -pɔlʋ gbo -le, na: Yɔɔ ꞌke ꞌle yaku ꞌli *Kliisɩ kli ꞌyaa ꞌle -ɩn ꞌke ɔ ꞌle -zaꞌa? Ɔ ꞌdre-oꞌo see.
Ⅶ Ɛ -se ꞌle ꞌmɛmʋꞌa ꞌꞌklumʋ ɔ -nɩ -ko -lrɛɛ. -Aꞌa nʋ na -le -lrɛɛ: Yɔɔ ꞌke ꞌle glu tiꞌꞌsi ꞌle ɔ ꞌke ꞌle ꞌmɛmʋꞌa ꞌꞌklumʋ Kliisɩ -zaꞌa? Ɔ -sɔꞌɔ-ɔ glu see.
Ⅷ Lɛ-ɛ seꞌa ꞌbhɛɛ ɛ ꞌke -ɩnmʋ ꞌpʋʋn, -aꞌa popo ꞌɛ dɩ ꞌgwlʋti -le! Wlu -ɩn ꞌka ꞌmʋ-za a, wlu ꞌmnɛ, ꞌɩnnɛ ꞌmo-o, -Lagɔꞌɔ wlu se -ɩnmʋ gbo-tɛ, ɛ -nɩꞌe-e ꞌle -aꞌa wɔn ꞌmʋ, ꞌle ɛ -nɩꞌe ꞌle -aꞌa -pɔlʋ ꞌzɔ. Wlu Moyiizɩ ꞌꞌsiꞌa -laa ꞌnynɩ a, -Lagɔꞌɔ ꞌꞌgwlidewlu -a zaꞌa ꞌmʋ, ꞌɩnnɛ moꞌo.
Ⅸ ꞌƐ dɩ, -ka -Lagɔ -zaꞌa *Zezii glu ꞌle ꞌmɛmʋꞌa ꞌꞌklumʋ ꞌle ɔ ꞌyeꞌa ti-nɩ -lrɛɛ ɛ, -bho -ɩn ꞌwɔɔn nɛ ꞌle -aꞌa -pɔlʋ ꞌzɔ, ꞌle, -ka Zezii ꞌꞌduꞌa -aꞌba -Kɔyi, -bho ɛ ꞌwlʋ ꞌle -aꞌa wɔn ꞌmʋ, -ɩn ꞌpʋn-oꞌo ꞌbho -Lagɔꞌɔ ꞌꞌyigbeyi.
Ⅹ ꞌLe nyɔꞌɔ -pɔlʋ ꞌzɔ, -bho ɔ de Zezii ꞌꞌgwli, ꞌle -Lagɔ-ɔ po ꞌɔ ꞌꞌyisrɛɛyi ꞌbho ꞌɔ ꞌꞌyigbeyi. ꞌLe, -ka nyɔꞌɔ ꞌꞌbhuo deꞌa -Lagɔ ꞌꞌgwli, -bho ɛ ꞌwlʋ ꞌle ꞌɔ wɔn ꞌmʋ, ꞌle ɔ-ɔ ꞌpʋʋn ꞌnɔ ꞌbho ꞌɔ ꞌꞌyigbeyi.
Ⅺ A -gblee, -Lagɔꞌɔ wlu-u ꞌcnɩ-ɛꞌɛ ꞌle ꞌɔ ꞌꞌbɔgʋ ꞌli, ɛ na:
Nyɔꞌꞌo nyɔ-ɔ deꞌa ꞌɩnmʋ ꞌꞌgwli a, ꞌkpɩ -see ɔ ꞌꞌyiti-wa yi.
Ⅻ -Ka -lue ꞌmnɔ, ꞌka-a ɛ ꞌcnɩ-ɛꞌɛ ꞌle -Lagɔꞌɔ ꞌꞌbɔgʋ ꞌli -lrɛɛke, ɛ na: -Bho -ɩn ꞌꞌdu *ꞌZuifʋyi o, -bho -ɩn -se ꞌZuifʋyi -ko o, -Lagɔ ꞌmo-o ꞌkmʋꞌa klɛꞌɛ -kɔyi. ꞌƆ ꞌtɛ nyʋ ꞌmʋ, ɔ-ɔ ꞌpʋʋn nʋ-oꞌo ꞌbho ꞌɔ ꞌꞌyigbeyi. Nyʋ ꞌwee pɔ ꞌɔ li, ꞌɩnnʋ ꞌɔ ꞌlimʋ-ʋ nmɔ nɩꞌe ꞌꞌkpi wɔn -ziaka.
ⅩⅢ ꞌBho ꞌɛ lemʋ wlu -lrɛɛ-ɛ ꞌcnɩ-ɛꞌɛ ꞌle -Lagɔꞌɔ ꞌꞌbɔgʋ ꞌli, ɛ na:
Nyɔꞌꞌo nyɔ-ɔ paꞌa ꞌɩnmɔ aꞌba -Kɔyi li, -mnɔɔ ꞌpʋn-oꞌo ꞌbho ꞌan ꞌꞌyigbeyi.
ⅩⅣ ꞌLe, -Lagɔ ʋn -seeꞌa ꞌꞌgwlide, koo ʋn ꞌke ɔ lipaꞌa? ꞌLe -yɔ -ke dɩ ʋn -seeꞌa ꞌbʋꞌwɔn ke kpɛ -lue ꞌle, koo ʋn ꞌke ɔ ꞌꞌgwlideꞌa? ꞌLe, -bho nyɔ -see ʋ ꞌɔ wlu -bodɩ ꞌmʋ-za a, koo ʋn ꞌke ɛ ꞌbʋꞌwɔnꞌɔ?
ⅩⅤ ꞌLe, -bho nyʋ -see ꞌle ʋ gbo -lbho-ɛ ɛ, koo ʋbʋ ꞌbhɛɛꞌɛ ʋn ꞌke ʋ -Lagɔꞌɔ wlu kpa ʋn ꞌke ʋ ɛ -bodɩ ꞌmʋ-zaꞌa? A -gblee, -Lagɔ ꞌlbho-o ꞌɔ wluꞌa ꞌmʋzamʋ -ziaka. Wlu -ɛ ꞌcnɩ-ɛꞌɛ ꞌle -Lagɔꞌɔ ꞌꞌbɔgʋ ꞌli-i tɔ nɛꞌo. Ɛ-bɛ wlu ꞌmnɛ na:
Nyʋ-ʋ zaꞌa -Lagɔꞌɔ ꞌꞌdɩzɩgɩ ꞌmʋ a, ʋn-ʋ ꞌnʋ-o lbhʋzɛgɛ, ꞌle ꞌwa yiyia-a ꞌlbhaaꞌa nyʋ ꞌbʋbʋa ꞌꞌyi.
ⅩⅥ A -gblee, *Izrayɛɛlɩkɔmʋ ꞌwee -see -kaa ꞌꞌdɩzɩgɩ ꞌmnɩ ꞌbho ꞌꞌdu, ꞌɛ dɩ -Lagɔꞌɔ wluꞌa ꞌmʋtizayi *Ezayii -zaꞌa wlu -nɛɛ ꞌmʋ ꞌbho ꞌwa ꞌꞌkpi, ɔ na:
ꞌAn -Kɔyi, wlu -a -zaꞌa ꞌmʋ a, nyʋyɔ -gbɩ de ꞌɛ ꞌꞌgwli.
ⅩⅦ A ꞌye li-ɔ, -bho nyɔ po -Lagɔꞌɔ wlu -lokui, ꞌle ɛ ꞌmʋ, ꞌle-e ꞌɔ -Lagɔꞌɔ ꞌꞌgwlideɛ-ɛ ꞌwlʋꞌo. ꞌLe, -bho nyɔ -za -Lagɔwlu ꞌmʋ, ɛ-bɛ wlu ꞌmnɛ ꞌꞌdu Kliisɩꞌa ꞌꞌdɩꞌa ꞌmʋzɛɛ.
ⅩⅧ Lɛ ꞌɩn-ɩ dedeꞌa ꞌan ꞌꞌbhuo ti a, ꞌɩnnɛ ꞌka-a: ꞌƖn na, wlu-u -zɛꞌɛ ꞌmʋ a, ʋn -see ɛ ꞌmʋtiꞌwɔn-ae -ale ʋn ꞌwɛn -ɛ ꞌmʋtiꞌa? Ʋn ꞌwɛn -ɛ ꞌmʋti -ka -zɛgɛka. ꞌBho wlu ꞌmnɛꞌɛ damʋ -ɛ ꞌcnɩ-ɛꞌɛ, ɛ na:
Nyʋ-ʋ -zaꞌa -Lagɔꞌɔ dɩ ꞌmʋ a, ꞌwa wlu -waꞌa-a ꞌbhlɩkpɩ ꞌwee ꞌꞌkpi ti ɛ ꞌye mu, ɛ ꞌye ꞌbhlʋkpa ꞌꞌyiꞌgɩga.
ⅩⅨ ꞌLe, lɛ ꞌɩn-ɩ dedeꞌa ꞌan ꞌꞌbhuo ti -lrɛɛ ɛ, ꞌɩnnɛ ꞌmo-o: Wlu-u -zɛꞌɛ -laa ꞌmʋ a, *Izrayɛɛlɩkɔmʋ ꞌwɛn -ɛ ꞌmʋtiꞌa? Wlu ꞌmnɛꞌɛ ꞌzɔ -zanamʋ, lɛ -Lagɔ waꞌa Moyiizɩ ꞌꞌyiti see, ꞌɩnnɛ ꞌka-a:
Nyʋ-ʋ -seꞌa-a ꞌan nyʋ, ꞌle -ʋ seꞌa ꞌɩnmʋ yibo, lɛ ꞌɩn-ɩ ꞌye ꞌʋ -bodɩ -nʋ mʋ a, ꞌɩnnɛ ꞌye aꞌba ꞌꞌmʋnynɩ ꞌꞌyiglu-za mʋ ꞌle a ꞌke ꞌcɛ po.
ⅩⅩ A -gblee, Ezayii -mnɔɔ -lrɛɛ, ɔ -cɛꞌɛ-ɛ ꞌꞌyrili ꞌle ɔ ꞌye -kaa ꞌlɛ:
-Lagɔ na: Nyʋ-ʋ -seeꞌa ꞌɩnmʋ tiꞌbɔ, ꞌɩnnʋ ꞌyeꞌe ꞌɩnmʋ. ꞌLe nyʋ-ʋ seꞌa ꞌan dɩ ꞌle ꞌwa -pɔlʋ gbo ꞌbhle tukutuku, ꞌɩnnʋ ꞌɩn -tɔꞌɔ ꞌan ꞌꞌbhuo ꞌꞌyi.
ⅩⅪ Lɛ -Lagɔ -tɔꞌɔ Ezayii ꞌꞌyi -lrɛɛ Izrayɛɛlɩkɔmʋꞌa damʋ, ꞌɩnnɛ ꞌka-a:
ꞌƖn-ɩ tɔ ꞌnʋ-ʋ sʋɩ ꞌꞌyi zɔ ꞌwee ꞌli, ꞌɩn ꞌybha-oꞌo ꞌɩn ꞌke ʋ kpʋn -gli. ꞌLe ʋn kuꞌo -loku ꞌmʋ, ʋn-ʋ ꞌnyɛꞌɛ ꞌan wlu ꞌmʋ, ʋn na ʋn -see ɛ -lokui-po yi.