Ⅸ
-Lagɔ cɛꞌɛ *Izrayɛɛlɩkɔmʋ wlu ꞌꞌkpiti
Ⅰ A ꞌye li-ɔ, lɛ ꞌɩn-ɩ yiꞌa ꞌmʋzanamʋ a, -ziadɩ moꞌo. -Bho ꞌɩn cɛ sɩn a, *Kliisɩꞌa ꞌꞌbhuo yibo nɩ-ɩꞌo. ꞌLe, -ka ꞌɩn -seeꞌa sɩn cɛ ɛ, *-Lagɔꞌɔ Lisaazuzu -ɔ poꞌa ꞌan -pɔlʋ -jolʋ gbo a, ꞌle ꞌɩn ꞌmʋ ꞌɩnnɔ ꞌwɔɔnꞌɔ ꞌan wlu ꞌmnɛ ꞌꞌkpi.
Ⅱ Dɩ ꞌmnɩ, ꞌɩnnɩ ꞌka-a: ꞌƖn -kmaꞌa-a ꞌꞌyigbeyi ꞌle ꞌan -pɔlʋ gbo -ziaka. -Bho ꞌɩn po ꞌan ꞌbhlʋkpa *Izrayɛɛlɩꞌa nyʋ ꞌgwlʋ ꞌꞌyi a, ꞌan -pɔlʋ-ʋ sinsin-e ꞌle ꞌan ꞌlimʋ ti zɔꞌꞌo zɔ ꞌli.
Ⅲ ꞌLe ꞌan -pɔlʋꞌa ꞌlimʋtififieɛ ꞌmʋ, ꞌɩn ꞌbhɛɛꞌo ꞌɩn ꞌke na: -Bho -Lagɔꞌɔ tutibhlasʋ kpʋn ꞌkɩ ꞌɩnmʋ ꞌle ꞌɩn -ke Kliisɩ ꞌke ꞌꞌyrilisʋsɔ ɔ, ꞌle ꞌan ꞌlotʋꞌa ꞌꞌnynuu *ꞌZuifʋ ꞌke ꞌpʋn ꞌbho ꞌɔ ꞌꞌyigbeyi, -mnɛɛ -nmɔ ꞌko-o ꞌꞌyrili.
Ⅳ -Lagɔ nʋꞌa -kaa, ꞌɩnnʋ ɔ -zaꞌa ꞌbho nyʋꞌa ꞌꞌklumʋ, ꞌle ɔ-ɔ ꞌlʋ ꞌʋ ꞌɔ nyʋ, ɔ cʋ ꞌʋ wlu ꞌꞌkpiti ꞌle ɔ ꞌye ʋ ꞌɔ ꞌꞌbhuo -ke ꞌɔ ꞌnynɩꞌa ꞌꞌyibhɛɛɛ ꞌꞌyi-tɔ. ꞌƖnnʋ -ke ɔ bhlaꞌa *-ybhɛybhɛtiteꞌa -dadudu, ꞌɩnnʋ ɔ ꞌꞌnyɩꞌe *ꞌɔ gba ꞌle ɔ ꞌye ʋ ꞌɔ bʋbɔdɩ ꞌcɩan ꞌle *ꞌɔ bʋbɔbhlegbo.
Ⅴ A -gblee, -tanyɩnyʋ -ke -Lagɔ bhlaꞌa -ybhɛybhɛtite, ꞌwa ꞌꞌnynuuꞌa ꞌꞌnynuu ʋn ꞌꞌduꞌo, ꞌle ꞌwa ꞌꞌklumʋ Kliisɩ ꞌwlʋ -nɩꞌo, ꞌle ɔ ꞌꞌsiꞌe ꞌbho, ɔ ꞌꞌduꞌo -Lagɔ, ꞌɩnnɔ -nɩꞌe lɩ ꞌwee ꞌꞌkpi, ꞌɔ ꞌnynɩ -nɩꞌe-e ꞌꞌyibhɛɛka ꞌꞌkɔmʋ. ꞌKa-a ɛ -nɩꞌe ꞌmʋ!
Ⅵ -Ka ꞌɩn ꞌlɛꞌɛ -laa, ꞌɩn -see, -Lagɔꞌɔ wlu ɔ cʋ ꞌʋ ꞌꞌkpiti, ɩ ꞌwla-a ꞌꞌnukɔ, nʋ. -Gba! ꞌƖn -see ꞌna ꞌlɛ. Lɛ -Lagɔ cɛꞌɛ wlu ꞌꞌkpiti, ɛ -nʋ-ɛꞌo. A -gblee, nyʋ ꞌwee ꞌma-a Izrayɛɛlɩkɔmʋ, ꞌwa ꞌweeꞌa ꞌꞌdu -kaa -Lagɔꞌɔ nyʋzɩgɩ.
Ⅶ ꞌLe nyʋ ꞌwee ꞌbhleꞌa *Ablaamʋꞌa ꞌꞌnynuuꞌa ꞌꞌnynuunynɩ ꞌꞌkpi, ɛ -se ꞌka-a ʋn ꞌꞌdu ꞌɔ ꞌꞌnynuuꞌa ꞌꞌnynuuzɩgɩ ꞌnɩ -ko. ꞌƖnnɛ ꞌbhleꞌe ꞌnynɩꞌa dɩ -Lagɔ nʋꞌo Ablaamʋ -bodɩ:
-Aꞌa ꞌꞌyu *Izaakɩ ꞌmʋ, -aꞌa ꞌꞌnynuuꞌa ꞌꞌnynuu ꞌɩn cɛꞌɛ wlu ꞌꞌkpiti, ꞌle-e ʋn-ʋ ꞌye ꞌwlʋ -nɩ mʋ.
Ⅷ ꞌƖnnɛ ꞌmo-o, Ablaamʋꞌa ꞌꞌnynuuꞌa ꞌꞌnynuuꞌa klɛ -se -Lagɔꞌɔ nyʋ -ko. ꞌꞌNitiwʋnnawlu -Lagɔ -cɛ -nɩꞌa Ablaamʋ wɔn ꞌꞌkpiti, nyʋ-ʋ ꞌwɔɔn ꞌnɛ ɛ, ꞌwa ꞌꞌsɛ ɔ-ɔ ꞌlaꞌa Ablaamʋꞌa ꞌꞌnynuuꞌa ꞌꞌnynuuzɩgɩ.
Ⅸ A -gblee, -nɔɔ -lrɛɛ ꞌli, wlu -Lagɔ waꞌa Ablaamʋ ꞌꞌyiti, ꞌɩnnɛ ꞌka-a: Ɔ na:
-Zʋn -yɛ ꞌyeꞌa -yi mʋ a, ꞌɩn-ɩ ꞌye-e le -yi -mʋ. -Bho ꞌɩn -ka yi a, ꞌbho-o -aꞌa ꞌnynɔ *Salaa-a ꞌye ꞌꞌyunyukpasu ꞌwlʋ -nɩ mʋ.
Ⅹ -Yɛ ziꞌa -laa a, ɛ -se ꞌbho ꞌwa ꞌꞌsɛꞌɛ ꞌꞌkpi ꞌɛ lɛtu ꞌꞌtii -ko. A -gblee, *Rebekaa -ke -aꞌba ꞌꞌna Izaakɩ, ʋn -seeꞌa -bhla ꞌwa nyukpasiyreetɩ ꞌsɔn ꞌwlʋ ke a, ꞌka-a ɛ -nʋ-ɛꞌɛ ʋ -bodɩ -lrɛɛ.
Ⅺ-Ⅻ ꞌꞌYreetɩ ꞌmnʋ -seeꞌa -bhla ꞌwlʋ ke ꞌle ʋn -seeꞌa -bhla -zɛgɛ -ke ꞌꞌnyinynidɩ yibo ke a, ꞌbho-o -Lagɔ ꞌꞌsra -nɩꞌe ꞌwa -lue -jiɛ ꞌle ɔ ꞌye Rebekaa ꞌtmʋʋ, ɔ na: Aꞌba ꞌmʋcɩaanyu ꞌke ꞌɔ leyiꞌa lbhʋnʋyi ꞌꞌdu. -Lagɔ ꞌnʋ-o -kaa ꞌle ɔ ꞌke -tɔ -ka ꞌɔ -gbʋꞌa nyunyuꞌa kpli ya, nyɔ ɔbɔ ꞌybhaꞌa, ꞌɩnnɔ ɔ-ɔ zaꞌa ꞌbho. ꞌƆ nʋnʋdɩ ꞌwlʋ-o ꞌɔ ꞌꞌbhuo ꞌmʋ.
ⅩⅢ ꞌKa-a ɩ -nɩꞌe ꞌmʋꞌa dɩ, wlu -nɛɛ ꞌcnɩ-ɛꞌɛ ꞌle -Lagɔꞌɔ ꞌꞌbɔgʋ ꞌli, ɛ na:
ꞌƖn -zaꞌa-a ꞌbho *Zakɔɔpʋ ꞌle ꞌɩn ꞌye *Ezayu tipo.
ⅩⅣ -Bho ɛ -nɩ -kaa ꞌmʋ ꞌle, nyɔ ꞌke na -Lagɔ se ꞌꞌyiꞌsrɛɛ, nʋ maꞌa? -Gba! Nyɔ se ꞌbhɛɛ ɔ ꞌke ꞌna ꞌlɛ,
ⅩⅤ -ɛkedɩmaa, ɔ ꞌtmʋʋꞌo-o *Moyiizɩ na: Nyɔ ꞌɩn ꞌybhaꞌa a, ꞌɔ ꞌꞌkpi ꞌan ꞌlimʋ ꞌke wɔn-nmɔ -nɩ, ꞌle nyɔ ꞌɩn ꞌybhaꞌa -lrɛɛ, ꞌɔ ngaze ꞌɩn-ɩ ꞌyeꞌo.
ⅩⅥ -Bho ɛ -nɩ -kaa a, ꞌle ɛ -se nyunyɔꞌɔ ꞌtʋnʋdɩ-e ꞌɔ ꞌꞌbhuoꞌa ꞌmʋtikukuɛꞌɛ ꞌmʋpɛɛɛꞌɛ dɩ -Lagɔ-ɔ wʋnna nɔ ꞌꞌniti ꞌnɩ -ko. ꞌƆ ꞌꞌbhuo-o ꞌbhleꞌe ngaze.
ⅩⅦ A -gblee, zɔ -lue ꞌzɔ -Lagɔ ꞌtmʋʋꞌo-o *Ezipʋtɩꞌa ꞌbhlʋkpayowliklagba, ɩ ꞌcnɩ-ɛꞌɛ-ɛ ꞌle ꞌɔ ꞌꞌbɔgʋ ꞌli, na: ꞌƖn ꞌꞌduꞌo -ɩnmʋ ꞌbhlʋkpayowli ꞌmʋ-ɛ, ꞌle, -bho -ɩn ꞌnaa ꞌan wlu ꞌꞌyi, lɛ ꞌɩn ꞌka ꞌbho -ɩn -ke -aꞌa nyʋ ꞌꞌkpi -nʋ -nɩ, ɛ ꞌke ꞌan wɔnkuɛ -tɔ, ꞌle nyʋ ꞌwee ꞌke ꞌan ꞌnynɩ yibo.
ⅩⅧ Lɛ -a ꞌka ꞌmʋtiꞌwɔn ꞌle wlu ꞌmnɛꞌɛ ꞌlimʋ, ꞌɩnnɛ ꞌmo-o, nyɔ -Lagɔ ꞌybhaꞌa, ꞌɔ ꞌꞌkpi ɔ-ɔ nmɔ nɩꞌe ꞌlimʋ wɔn. ꞌLe nyɔ -Lagɔ ꞌybhaꞌa, ꞌɔ -pɔlʋ ɔ-ɔ kmuꞌo ꞌꞌyi, ꞌle ɛ nɩꞌe -kaa -ziaka.
-Lagɔꞌɔ ꞌcɛ -ke ꞌɔ ngaze
ⅩⅨ ꞌLe nyɔ ꞌbhɛɛꞌo ɔ ꞌke ꞌɩnmʋ tidede, na: -Bho ɛ -nɩ -kaa ꞌmʋ ꞌle, leedɩ -Lagɔ-ɔ kpaꞌa nyunyu dɩ ꞌꞌyiꞌa? Nyɔ se ꞌɔ ꞌgwlʋdɩ wɔnyiꞌbhɛɛ.
ⅩⅩ -Wooo! Nyunyɔꞌɔ yɔɔ -ɩn ꞌꞌduꞌo ꞌle -ɩn -ke -Lagɔ-ɔ dedeꞌe ꞌꞌyiꞌa? Mɛ se ꞌbhɛɛ ɛ ꞌke ꞌɛ mayi ꞌꞌyrili-gbʋ, na: Leedɩ -ɩn maꞌa -kaa ꞌɩnmʋꞌa?
ⅩⅪ Lɛ mayi ꞌbɔꞌɔ ti, ꞌɩnnɛ ɔ-ɔ nʋꞌo ꞌɔ mɛ ꞌmʋ. Ɛ-bɛ mɛ -lue ꞌmnɛ, ɔ ꞌbhɛɛꞌo ɔ ꞌke ɛ -diegblʋʋ ꞌmʋ ma ꞌle ɔ ꞌke ɛ -kpɛklɛ ꞌmʋ ma -lrɛɛ.
ⅩⅫ ꞌKa-a -Lagɔꞌɔ dɩ -nɩꞌe ꞌmʋ -lrɛɛ. Ɔ ꞌꞌdu-o nyunyuꞌa tiyayi. -Bho ɔ ꞌwɔn ɔ ꞌke ꞌɔ wɔnkuɛ -ke ꞌɔ ꞌcɛ nyʋ -lrʋʋ ꞌꞌyi-tɔ, ɔ ꞌbhɛɛꞌo ɔ ꞌke ɛ nʋ. ꞌLe nyʋ ꞌɔ ꞌcɛkʋta -nɩꞌa ꞌꞌkpi, ɔ ꞌkʋ ʋ ti-za, -ʋ -nɩꞌa ꞌɛ kpli ti, -bho ɔ ꞌwɔn ɔ ꞌke ꞌꞌgwli-ku ꞌwa dɩ, ɔ ꞌbhɛɛꞌo ɔ ꞌke ɛ nʋ. Nyɔ-ɔ ꞌkɔ ɔ dɩ ꞌꞌyikpa, ɔ se -nɩ.
ⅩⅩⅢ ꞌLe, -bho ɔ ꞌwɔn, -ka ꞌɔ ꞌnynɩ ꞌbhɛꞌɛ ꞌꞌyi tenyɩ, ɔ ꞌke ꞌna nyʋ -lrʋʋ -tɔ ꞌle ɔ ꞌke ꞌwa ngaze ꞌye a, ɔ ꞌbhɛɛꞌo ɔ ꞌke ɛ nʋ. Ʋ-bʋ nyʋ ꞌmnʋ, ɔ -zʋ ꞌʋ-ʋ ꞌbho see ꞌle ɔ ꞌke ʋ ꞌnynɩ ꞌꞌkpi po.
ⅩⅩⅣ -Ka -lue ꞌmnɔ, ꞌka-a ɔ ꞌlaꞌa -amʋ -lrɛɛ ꞌle -a ꞌke ꞌɔ nyʋ ꞌꞌdu. ꞌLe ɛ -se *ꞌZuifʋꞌa ꞌꞌsɛꞌɛ ꞌꞌklumʋ ɔ ꞌla nyʋ -ko. Ɔ ꞌla-a nyʋ-ʋ -seꞌa-a ꞌZuifʋꞌa ꞌnynɩgboꞌa nyʋ -lrɛɛ.
ⅩⅩⅤ ꞌƐ dɩ -Lagɔ -zi -nɩꞌe ꞌɔ wluꞌa ꞌmʋtizayi Ozee ꞌmʋ. Wlu ɔ ꞌcnɩꞌa ꞌle ꞌɔ ꞌꞌbɔgʋ ꞌli, ꞌɩnnɛ ꞌka-a:
Nyʋ -yʋ -seꞌa-a ꞌan nyʋ, ꞌɩnnʋ ꞌɩn ꞌybhaꞌo ꞌɩn ꞌke ʋ ꞌan nyʋ ꞌla. ꞌƖnnɛ ꞌmo-o, -yʋ -ke dɩ ꞌɩn seꞌa -kma, nyʋ-ʋ nʋꞌa ʋn -se ꞌan nyʋ -ko a, ꞌɩnnʋ ꞌɩn ꞌybhaꞌo ꞌɩn ꞌke ʋ ꞌan nyʋ ꞌla. Nyʋ -ke dɩ ʋn-ʋ nʋꞌa ʋn se dɩkmayi ꞌbhle, ꞌɩnnʋ ꞌɩn ꞌybhaꞌo ꞌɩn ꞌke ꞌan dɩkmanyʋ ꞌla.
ⅩⅩⅥ -Da ʋn -nɩꞌa ꞌle nyʋ-ʋ zaꞌa ꞌwa dɩ ꞌmʋ ꞌle ʋn-ʋ nʋꞌa: Ʋn -se -Lagɔꞌɔ nyʋ -ko, ꞌbho ꞌmnɔ, ꞌbho-o ʋn ꞌke -nɩ ꞌle nyʋ ꞌke ʋ Tinɩlagɔꞌɔ nyʋ ꞌla.
ⅩⅩⅦ ꞌLe, *Izrayɛɛlɩkɔmʋꞌa damʋ, -Lagɔꞌɔ wluꞌa ꞌmʋtizayi *Ezayii ꞌlɛꞌɛ -kaa, na:
-Bho koo Izrayɛɛlɩkɔmʋ -die ꞌꞌyi ꞌtɔnnibɩsɩꞌa ka, ꞌwa ꞌplanꞌa ꞌꞌsɛ ꞌke ꞌpʋn.
ⅩⅩⅧ -Ɛkedɩmaa, lɛ -aꞌba -Kɔyi -zʋ ꞌʋ -bodɩ ꞌmʋ, ɔ na: Ɛ -see ꞌmʋ-gwle yi, ꞌle ꞌɛ ꞌꞌyriꞌa ꞌbɩ ꞌke ꞌnɔɔ ꞌkmʋ ꞌmʋ ꞌwlʋ.
ⅩⅩⅨ ꞌLe lɛ Ezayii -zaꞌa ꞌmʋ see ɛ ꞌke -nʋ-ɛ, ꞌɩnnɛ ꞌka-a: Ɔ na:
-Aꞌba -Kɔyi ꞌbhleꞌa wɔnkuɛꞌɛ klɛ kwa, -bho ɔ -see ꞌkɩ ꞌbho -aꞌba ꞌꞌnynuuꞌa ꞌꞌnynuutɔlʋ sie, ꞌꞌlemnɩɩ, -ka *Sodɔɔmʋ -ke *Gomɔɔgwlɛ -nɩꞌa ꞌle nyɔ seꞌa ꞌbho ꞌya ꞌmʋ -sie, ꞌka-a -abʋ ꞌke ꞌkɩ -nɩ -lrɛɛ.
*Izrayɛɛlɩkɔmʋ -mnʋʋ na ꞌkɩ *Zeziiꞌa ꞌꞌdɩzɩgɩ -se ꞌwa lɛ -ko
ⅩⅩⅩ ꞌƐ dɩ a, koo -a ꞌke ꞌtraamʋ ꞌlɛꞌɛ? -A ꞌke nʋ, na: Nyʋ -yʋ -seꞌa-a *ꞌZuifʋ -ʋ -seeꞌa tiꞌbɔꞌɔ ꞌꞌbhuo ʋn ꞌke ꞌꞌyisrɛɛmʋ ꞌꞌdu, ꞌɩnnʋ ꞌꞌdu ɛꞌo. Ʋn ꞌde-e -Lagɔ ꞌꞌgwliꞌa dɩ, ʋn ꞌꞌduꞌo ꞌꞌyisrɛɛmʋ ꞌbho ꞌɔ ꞌꞌyigbeyi.
ⅩⅩⅪ Ɛ -nɩꞌa -kaa ꞌmʋ a, ꞌbho *-Lagɔꞌɔ gbaꞌa ꞌꞌyikpʋnnamʋ, *Izrayɛɛlɩkɔmʋ ꞌkpa-a ꞌwa ꞌꞌbhiꞌa ꞌmʋtikukuɛ ꞌle ʋn ꞌke ꞌꞌyisrɛɛmʋ ꞌꞌdu ꞌbho ꞌɔ ꞌꞌyigbeyi, ꞌle ʋn ꞌye -kaa nʋ kplokplo ꞌle ʋn -see ɛ ꞌꞌdu.
ⅩⅩⅫ Leelɛ ꞌbhleꞌe ꞌnynɩ ꞌle ʋn -see ꞌꞌyisrɛɛmʋ ꞌꞌduꞌa? Ʋn -see ꞌwɔn ʋn ꞌke -Lagɔ ꞌtʋ nʋ ꞌwa ꞌɔ ꞌꞌgwlideɛꞌɛ kamʋ. ꞌLe ʋn ꞌybhaꞌo ꞌwa ꞌꞌbhiꞌa ꞌmʋtikukuɛꞌɛ ꞌmʋpɛɛɛ ꞌmʋ, ʋn ꞌke ꞌꞌyisrɛɛmʋ ꞌꞌdu. Ʋn ꞌybha-oꞌo ꞌle ꞌwa nʋnʋkpli ꞌmʋ, ʋn ꞌke ɛ ꞌꞌdu. -Bho sʋkpʋ -nɩ -jeyi, -ka nyɔ-ɔ dide ꞌnɛ, ꞌle ɛ-ɛ ꞌꞌdu ꞌɔ -taniɛbhʋ ꞌmʋ, -ka -lue ꞌmnɔ, ꞌka-a ꞌwa nʋnʋkpli ꞌmnɩ-ɩ kaꞌa ꞌwa -Lagɔꞌɔ ꞌꞌgwlideɛjolʋ. Sʋkpʋ ꞌɩn ꞌꞌsiꞌa -laa ꞌnynɩ a, ɛ ꞌbhle-e ꞌꞌyitigʋgɔlɛ. ꞌƖnnɛ ꞌmo-o *Zezii *Kliisɩ.
ⅩⅩⅩⅢ Ɔbɔ ꞌmnɔ, ꞌɔ dɩ *Ezayii -zaꞌa ꞌmʋ see ꞌle -Lagɔꞌɔ ꞌꞌbɔgʋ ꞌli, ɔ ꞌyeꞌa -Lagɔ na:
A ꞌye li-ɔ, ꞌle *Siɔn (ꞌma-a Zelizalɛɛmʋ), ꞌle-e ꞌɩn-ɩ poꞌo sʋkpʋklagba glu ꞌle nyʋ ꞌke ɛ dide ʋn ꞌke ɛ ꞌꞌyritiꞌga. Nyɔ -yɔ de ꞌɔ ꞌꞌgwli, ꞌkpɩ -see ɔ ꞌꞌyiti-wa yi -lrɛɛ.