8
Maunaune rerihoni muaine wan sio wason oparisaa tau Anahatana tewasi oruire osi anahatanau waron titue tewa
1 Muie reini nanie uanamana rerihoni pen wan sio oatanimai na oruiki osi anahatanau waron titue tewa. Ita ianei nea ata Anahatana iuna ita wan iparisaa ianei ata anahatanau waron titue tewa no kawasa tewa. Ne pene rotu-tu ihati ruata noso iata kani ianei panesi. Ne kahurae anori runa re kaka wani wain iparisaa mo, iuna kuru anoi na iparisaa mainae honu.
2 Sani ia isa iata kani ia mo, ianei sae isa, areimo ianei tewasi sae wan Anahatana nanie iatuhetei osiki.
3 Ne, ia sia waini anoi runa Anahatana, ia rei mo, Anahatana iationai.
4 Reiso, nanie uasau osimo rerihon iai muaine wan sio oatanimai na oruiki osi anahatanau waroni titue tewa. Ita ianei ata anahatanau waron titue tewa nene siaia mo, ramahai tewa. Ita iae ianei ata mai tuniai reini mo, Anahatana wain titue mo, hasae Ia osa man.
5 Masike sio umau oasau ata, anahatanau runa upu mo, panesi roe nante na mai tuniai,
6 ne ita wan iparisaa nea mo, iamanaku ata Anahatana mo, hasae Ia osa man. Ia sahoro ita pusita re Ama. Ia sahoro ihaye tau pusire. Iuna ita iamahaita na ianori runai. Runa ita iae, iamanaku ata hasae Yesus Kristus man sahoro Upuri. Anahatana iuna Ia ihaye tau pusire. Ia sahoro iapuhaita.
7 Ne, sio umau arihon ita wan iparisaa tau Kristus mo, oanei tewa ata anahatanau waron titue tewa nene siaia mo, ramahai tewa, nene kawasa tewa. Re kaka waniu umau iae, naone oni oparisaa tewasi, oainisi oainaa runa anahatanau waron titue tewa nene siaia oi. Reiso muie reini sani sio oai pen wan oatanimai na oruiki osi anahatanau waron titue tewa nene siaia sio oata kani anahatana rei nene kawasa. Reiso, anoo kuruta tewa rotu-tu oahana ata wason opalalosa.
8 Ne, muaina rai mo, rauna ita na ihaineke na Anahatana mo, tewa. Reiso sani iai pen rei tewa, nene sae isa osita tewa. Ne, sani iaiki iae, nene sae isa osita tewa oi. Reiso iai sae man mo, iake.
9 Ne, omi kahurae oainati. Pene tu-tu oai pusu ruamo mo maue oyo sio wason oparisaa ia-ia tau Kristus tewasi rei onoo oyo oai, oyo oahana ata kani opalalosa.
10 Tea mo, sani omi wan oanei ata anahatana wan titue tewa nene kawasa tewa oai pen wan oatanimai na oruiki osi anahatanau waron titue tewa noi nene numa. Ia wain iparisaa ia-ia tewasi inoomo. Ia mo, mka inana na iai pen rei oi oyo iahana ata ipalalosa, tea!
11 Reiso, tau omi ata kani oanei panesi rei, ouna mo kaka wani wain iparisaa ia-ia tau Kristus tewasi rei iparisaa tau Kristus tewa nea. Aikee Kristus imatai noso ia oi.
12 Omi ouna sana sani oai peni rei rotu-tu mo kakau waniu wason oparisaa ia-ia tau Yesus tewasi rei anoi resama-samai rerihoni sae wan manisate na sae wan resana. Areimo, omi opalalosa tau Kristus.
13 Reiso, pene tu-tu we kakau waniu wason oparisaa tau Yesus opalalosa noso muaine wan uaiki. Mka rotu-tu umataku iae, uai pen rei tewa nea. Na pene tu-tu we kaka waniu opalalosa noso au.