9
Masike Paulus Yesus ne maisosie iae, ipusu Anahatana ne maue sinia
1 Au we kawasa una sae man wan Anahatana itapiku unai. Au mo, au Yesus ne maisosie, tea! Unoo Upuri Yesus nea, tea! Omi oparisaa tau Upuri Yesus noso usima nnai osimo, tea!
2 Masike sio umau oasau ata au mo, Yesus ne maisosie tewa, ne omi oanei ata au reini mo, Yesus ne maisosie, tea! Oparisaa tau Yesus noso usima nnai osimo. Retuhete ata au reini mo, Yesus ne maisosie.
3 Sani sio umau oapasanaku mo, unete ruaku uasau sani nanie uasau reini.
4 Ami mo, Yesus ne maisosia, ma kawasa na omi wan ami aunaumo opanama, tea!
5 Ami ma kawasa arori ma pinau wason oparisaa nea na okatama tau aeu asima na Sou Iake rerihoni Yesus, tea! Noo sani Yesus ne maisosi tamena, areimo Petrus, na Yesus nea wani tamena umau oi, tea!
6 Pene tu-tu omi ata kani hasae au na Barnabas uama ruama kahurae anana na ahane ruama ma muaine.
7 Tantarau mo, oeu noi manahitane, areimo ruao osenu ruao no arena hunonie tewa, tea! Ia sia irahu anggur, mka iai nene huaya, tea! Te, ia sia iapiara rompa, mka ininu nene susu tea! Sio wason osima runa Kristus iae, sio wason oatinso kahurae opanaso, tea!
8 Uasau na tantarau, anggur, na rompau mo, uanamana repusu mansiau wason oamahaiso mai tuniai reini. Ne Anahatana ne anamanaya raasau san rei oi.
9 Areimo Anahatana ne maunauna waron Musa ikanure raasau ata, “Koropou wani reheta gandum kania na rahukaso arihoni nene kiopana mo, pene okanihoo nene hohae. Tapiki na reai gandum mkane.” Musa ikanu san rei mo, Anahatana hasae anoi runa koropou man mo, tewa, tea!
10 Ne Musa ikanu ata kahurae koropou reai mo, anoi runai. Na rei retuhete ata Anahatana anoi runa ita oi. Tea mo, sani ia mamrahue ikani tuamane te ia isa inea gandum nene kiopana arihoni nene kania, areimo iaunutu anoi na isupu sae isa arihoni sae wan iunai rei, tea! Ami wan asima runa Sou Iake iae aunutu anoma na asupu sae isa sani kepen te muaine, tea!
11 Ami asima runa Sou Iake rerihoni Yesus osimo, areimo noo sani ami arahu Anahatana ne anamanaya osimo. Reiso kahurae ami asupu sae isa arihoni omi, tea!
12 Omi orui sae isa osi sio tamena wason osima runa Anahatana ne anamanaya osimo. Reiso ami iae kahurae asupu sae isa arihoni omi renesi oi.
Ne ami atentene na orui kepen te muaine mo, tewa. Ami apamese sae man na pene auna tamneane na mansiau oparisaa tau Sou Iake rerihoni Kristus mo, tewa.
13 Sio wason oanori roe Anahatana ne numa mainisie mo, oai muaina umau waron sio ororire roe rei na oruire osi Anahatana, tea! Sio wason saka oakanupu binatang osi Anahatana roe hatu waron oranere noo sani anau mo, osupu no pahakian arihoni binatang waron oakanupure rei, tea!
14 Reiso Upuri iasau iae, ata sio wason osima runa Sou Iake rerihoni Kristus mo, kahurae sio wason oatinu orui sae isa osiso na oai arihoni sae waron sio wason oatinu rerihoni Sou Iake rei orui osiso.
15 Ne, au mo, uainisi na omi orui osiku na okati we kausa wanaya mo, tewa. Ukanu surate reini osimo na uainisi arihonimo na orui osiku mo, tewa. Nene iake mo, umataku mana rerihon uainisi na omi oakahaiku. Upeneku tau uainisi na oakahaiku na mka uainaa na ruaku ata usima na Sou Iake rei mo, uainisi sae isa tewa.
16 Ne, sani usima na Sou Iake rerihoni Yesus, areimo uainaa na ruaku mo, tewa. Usima na Sou Iake, areimo Upuri iaisosiku. Sani usima na Sou Iake rei tewa, mka siraka tanuku.
17 Sani au ruaku sahoro unina na usima runa Sou Iake rerihon Kristus mo, omi mo, kahurae osenu osiku. Ne, usima nnai reini mo, Upuri ruai sahoro ininiku na usima nnai. Iparisaa tanuku na usima nnai.
18 Reiso sae wan usupui mo, usima na Sou Iake rerihoni Yesus san rei man. Osenu osiku mo, tewa. Masike we kawasa uainisi sae isa arihonimo iae, uainisiki tewa oi.
19 Au reini mo, una maniane tau ia isa tewa. Ne, masike san rei iae, una ruaku sani maniane osi ia sia man. Areimo, na uakahai mansia panesi honu na oparisaa tau Kristus.
20 Reiso, sani ukata sio Yahudiu mo, una ruaku sani sio Yahudiu oi na uakahai mansia panesi na oparisaa tau Kristus. Sani ukata sio wason orime kuru Musa ne maunauna mo, una ruaku sani sio oi. Masike kahurae upusu Musa ne maunauna pusire tewa, ne upusure ia-ia sinia na uakahaiso oparisaa tau Kristus.
21 Sani ukata sio wason opusu Musa ne maunauna tewa, una ruaku sani sio oi, na uakahaiso na oparisaa tau Kristus. Ne upusu Anahatana ne maunauna sinia tau upusu Kristus ne maunauna.
22 Sani ukata sio wason oparisaa tau Kristus ia-ia tewasi na oata kani sae isa resana mo, upeneku una sae wan oata kani resana rei na uakahaiso na oparisaa tau Kristus ia-ia. Reiso, una ruaku sani sio wason ukataso na kani uakahai sio umau na oparisaa tau Kristus.
23 Au uamahaiku sani sio rei na uakahai mansia panesi na oparisaa tau Sou Iake rerihoni Yesus. Na taue isa kani mka uatarima we pahakian wani Anahatana itotoe runai na iruiki osi ita wan iparisaa.
24 Omi oanei ata tau sio panesi wason oruma apataruna, hasae ia osa man sahoro mka inesi sio pusiso wason oruma apataruna rei. Hasae ia rei sahoro ne untu na isupu sae isa. Omi iae kahurae sani ia wain ne untu rei. Onina pusi anomo na opusu Upuri ne maue na osupu sae wan mka iruiki osimo.
25 Ia sia man wain ipusu mapatarune rei mo, kahurae iapamese anoi arihon sae man na tinain remkona. Iuna san rei, areimo tau inina nanie isupu pahalaa na sio oaunutu ai totua waron opepere roe unui. Ne ai totua rai mka ramnunuso rapu-rapu man. Ne ita wan iparisaa tau Kristus, ianori nnai pusi anori mka isupu pahalaa oi. Ne pahalaa rei mka remnunui tewa.
26 Reiso uruma sani ia wain iruma inamatane tewa. Ne, uruma rotu uhokaku noi yaute wani sio oautuei nea rei. Te uamahaiku tewa noo sani ia wain ipalunku inamatane ihita ihute man.
27 Ne, uapamese tau we patane ia-ia na repusu we maue noo sani ia maniane ipusu upui. Uapamesei tea oo, na usima na Sou Iake rerihoni Yesus osi sio mansiau pusi, oyo au ruaku usupu pahalaa.