8
Kat kuu ihir Jisas ohe tapnong ham panggeit pisashe ohe meng oh
1 Gahan Jisas oh ap mutuh ohe aptei apteio be aptei apteio oh kuuhan ihirnong Got ohe napapat yah meng oh pot pisaporo rim orhe pinggit pisapat han nathei han ihirsi meng pot pihipari.
2 Kat kuu rih Jisas ohe mongsup ga apero sik hat pati ihirnong yah deio mat pihip kuu ihirhe ohe tap irair pipari. Ama kuu ihir tit Makdara aptei Maria uh rih Jisas oh beshei mongsup ga ma apetip kuu uhmur.
3 Tit Joana uhmur. Uhe imap Kusa oh Herot ohe atamreipti han ihirnong wamat papat han ohmur. Tit Susana uhmur. Ama yitir kuu ihirsi; kat kuu ruumsan ihirsi Jisas ohe tapnong hama iraire deno ihseno erer oh dara Jisaso orhe pinggit pisapat hano ihirnong apris ama panggeit pisashe oh.
Jisas oh den gwe tei paham meng potip ohe meng oh
(Matyu 13:1-9; Mak 4:1-9)
4 Jisas oh meng am mat pisapatin aptei aptei amdapat kuuhan ruumsan ihir apris tarmungopari. Apris tarmutperhan Jisas oh paham meng moh pongopri.
5 Tit han tit patesuhri. Gahan den gwe rang tei sakmatporim pipri. Susa sakmatipri. Sakdei oh ti mandap tei wandangopari. Mandap tei wanperhan pitap tei ohoh hanip tonggadeiyao ner ihir dat dayao hangopari.
6 Ti kwei kiki tei wandangopari. Wandasa yah hat maras orhora; mong ariar tei ohoh kaker oh dah na wasa atan oh hahmatporhan gattahat sangopari.
7 Ti den gwe oh gah amgap ire mutuh oh wandangopari. Wandas gah amgap ihirsi tap hat marangopari. Marasa gah amgap ihirnong yah hat marasa den amgapnong oh amkar hotmatperhan dam oh yah hat na timongopari.
8 Ti ihir mong yah tei oh wandasa yah hat marasa dam oh yah hat orhor ruumsan dam timongopari. Ihangopari pongopri.
Jisas oh giporpat kasip mengteiwi We. Kuuhan nat temsi gur paham meng mama amraya mengnong moh dahatinmuro pongopri.
Jisas oh be han ihir orhe mengnong oh daham am hatipririm Noh paham mengwi porpatmur potip ohe meng oh
(Matyu 13:10-17; Mak 4:10-12)
9 Jisas oh ama paham meng oh pot mandatporhan orhorsi ma pati bap ihir Jisas ohnong Gwe paham meng ma napot ohe mutuh meng oh kian meng napot. Go napotinmur por dahamtipari.
10 Por dahamtiperhan oh Norhorsi sapti han guroh Got orhe napapat hrepnong nahat napapat ohe meng hanhan hat pati meng oh pitap teinong mar gurnong naporpat ohoh ihan gur am hat patimur. Be ma pati ihirnong oh mutuh mengnong dahatipririm paham mengteiwi porpatmur. Imat potporhan wamtin wandeipti orhor dahatinnong na dahaptimur. Amratin amrapti orhor dahatinnong na dahaptimur pongopri.
Jisas oh irat gwe paham meng pitap teinong mar potip ohe meng oh
(Matyu 13:18-23; Mak 4:13-20)
11 Jisas oh Nohe tit han tit den gwe sakmar pipmur ma napot ohe paham meng ohe mutuh meng oh mamarumur. Ama den gwe oh Got ohe meng ohmur.
12 Den gwe mandap tei wanpat meng oh Got ohe meng amratperhan Satan oh aprisa ihir Mameng moh pomat amram dimtiperhan Got oh ambutiprahan dahama ama amraya mengnong oh Satan oh dat amdapatmur.
13 Kwei kiki tei ma wanpat ohe den gwe oh Got ohe mengnong oh amratpera daham amam hat orhorwi ma amrapti bap ihirmur. Amam ham amrapti orhor kaker oh dahnong na waihim pat ohoh ire danong akis matin supo ina ruumsupo ama sup ihir ire boknong kis matperhan kapkap orhor mandaptimur.
14 Gah amgap ire mutuh ma wanpat ohe den gwe oh Got ohe meng amrapti dindeipti orhor kakdah ohe ina ruumsupo ihsen ruumsan dar kamah hatin ohe dao kakdah mohe amam hat indin ohe dao ama ohe da oh Got ohe mengnong amkar hotmatperhan Got ohe yah meng oh dam timapat orhor it bukurpatmur.
15 Mong yah dus ma wanpat den gwe oh Got ohe meng oh amrama Amram dimtipera daham yahnap dasi hat pati ihiroh mengnong na mandama kasip ham marin patin orhor dam timapatmur pongopri.
Jisas oh Nohe meng moh has teinongwi mar paptenmur napotip ohe meng oh
(Mak 4:21-25)
16 Jisas oh orhe han ihirnong Nohe meng oh mamaru hat patmur. Hanip gur ram oh has mara baketsi teimdapat giadeiyao geih hrepnong remayao na deiptimur. Has mara Hanip ihir has tei orhor watahat ha marongwe rim has mar orhe pohon saripti gwar ka orhor sariptimur.
17 Gin ma treman pat erer oh pitap teiwi hatipramur. Giamat ma papti erer ohhe pitap teinongwi matporhan wamar am hatiprimur.
18 Gur nohe mengnong moh pomat amram dahenmur. Nuhur mama amraya meng moh kimur ma dahapti ihirnong oh titsi na aprisa ama amraya meng oh it dat amdatipramur. Arpin mengnong moh nuhur titsi amratper ma dahapti han ihirnong oh titsi apris isip mat orhor aprisipramur. Ihtin ohoh ihan gur meng moh pomat amrama dahenmur pongopri.
Jisas oh Got ohe mengnong amram dindeipti ihir nohsi taptem ihirmur potip ohe meng oh
(Matyu 12:46-50; Mak 3:31-35)
19 Gahan Jisas oh meng am deipatin orhe nap gapiniro supo ihir Jisas ohnong wamtiperim ama apdapa oh. Apriyaoh kuuhan ihir ap oh tambokot patin ohoh ihir ohe duupnong kinhat ron ham kot tei ama inpa oh.
20 Kot dah oh patin tit han tit maras Jisas ohnong Gin gwe suao arwaniro ihir imder gosi mengitinmat kot dah maroh wanahat patimur pongopri.
21 Potporhan Jisas oh Got ohe mengnongwi amram ma dindeipti bap ihiroh nohe emhero nohsi taptemo ihirmur pongopri.
Jisas oh inimsi; tom kopisi Gut gatetina potip ohe meng oh
(Matyu 8:23-27; Mak 4:35-41)
22 Gahan tit dah tit Jisas oh orhe pinggit pisapat han ihirnong Gin dir tom hru han tannong deprohemur potporhan irair bot dahnong rus tongnoma deihpari.
23 Deiptin Jisas oh kin timdin ham timongopri. Oh timon patin inim isip tit tom kopinong mer mat popris bot dahnong deis pongopri. Deis pora bot dah moh tom oh teip ham sutin ina deingopri.
24 Imtiporhan ihir sus Jisas ohnong Napapat hana. Dirhe tom oh nadiporhan ma ihah por pamsuhpari. Pamsaperhan Jisas oh masasa Inim go gatetina. Tom kopi go timbas ham ganetina potporhan arpin inim oh gater tom kopi oh ganer ham na ihah mong hatin ham kimirit mandangopri.
25 Gater kimirit mandatporhan Jisas oh Gur Hanipyah ohwi inahatin hatin hanwa ma dahapti ohe da oh de tei patin kas haya por indeingopri. Por imtiporhan ihir Epe. Hanip ihirnong imat meng potperhan ihir meng amram kimiriptio. Mama han moh tom kopio inimo ihirnongsi meng potporhan ihir amram gateriya moho. Mama han mohri wan han moho gigosham kas hatpari. Ihamo hama deihpari.
Han tit mongsup ihir ohe mutuhnong rosa mamter mat pisaptin ma yah matip ohe meng oh
(Matyu 8:28-34; Mak 5:1-20)
26 Jisaso orhe pinggit pisapat hano ihir Gariri mong dason orhor Gariri tom hru han tannong desa Gegesa aptei tom dinin tei oh kotpari.
27-29 Kora Jisas oh bot dahdapat kakdahnong wapatin orhor ama aptei han ihir tit han tit kongopri. Ama han oh mongsup trun ihir ohe mutuh patin oh watah na ar eit pitawi patim ap na timam orhe hanip sein ma saripti kwei temo ohwi timon sapat han ohmur. Ama ihat sapat han ohnong mongsup oh mamter mat pisasiprarim arwapir kat han ihir sen nang kasip ohsi atpama wamat papti orhor mongsup ohe kasip ohsi sen nangnong tambor mat itporhan mongsup oh mamter mat pisusa hanip timbas mongnong pumat pisapatmur. Mongsup oh ama imat pisapat han oh aprisa Jisas ohnong wamara ngangar tit orhor ohe tong duup oh bos hamnong ham or wandangopri. Wanporhan Jisas oh Mongsup oh imat pumat pisapat han moho dahama Gin mongsup go ga taper maras sona pongopri.
Potporhan mongsup oh Nohnong yah hat na indin teinong nahatipra daham Jisas ohnong Puteinap mahat ma pat han Got orhe brer Jisas go nohnong kinnahatporim apir. Go nohnong batbet napripra kasip mengtei orhor por patwi hangopri.
30 Kasip mengtei gipotporhan Jisas oh Gwe win oh kian win por dahandeingopri. Dahamtiporhan oh Hanip nohe mutuh ma ros pati han ihir trun han ros patio rim ihan nohe winhe trun hanmur pongopri.
31 Porpat mongsup muk ihir kasip mengtei orhor Go nuhurnong dipwi batbet dar paten ohe ditin timbas tanggap temnong nahatipra pongopari.
32 Potperhan ire pati dason bok andeh imah wih isip tit bu ariptingopari. Bu ariptihan mongsup ihir Jisas ohnong Gin nuhurnong wan teinong son napotipra. Imah ire ina mutuhnong mandeh ron napotinmur por kandeingopari.
Por kamtiperhan Jisas oh Mai. Rona pongopri.
33 Potporhan ihir ga taper marasa imah ire ina mutuhnong rongopari. Roperhan imah wih ihir gurir mat sakar pas marpen kat oh wasa tom dahnong ham wasa tom atem was hapungopari.
34 Ihtiperhan imah wamat papti han bap ihir ma ihyanong oh wamara kas ham tandungopari. Tanduripti ap mutuho aptei apteio oh ire ma wandeiya ohe meng oh pot ama pihipa oh.
35 Pot pisaperhan ihir amrapti ama ihyanong oh wamtiperim apingopari. Apris Jisas ohe pat tei apris wandeiyaoh mongsup ihir ohe mutuh ros mamter mat pisapti han ohnong mandam saperhan it orhe daham da yah hapat watah aro ham Jisas ohe tong duup oh tongnot patgopri. Ihat tongnot pathan ihirhe sein bupang rim ama kas hatpa oh.
36 Kas hatperhan ma wandeiya ihirdapat imat yah deihemur por meng am matpari.
37 Am matperhan Gegesa ap mutuh pati hano ama ap mutuh ohe kakduup ma pati hano ihir wamar am hapti kas isip tit hapti Jisas ohnong Go nure mong tei mohri go na indiprohmur. Wannong sonmur pongopari. Potperhan arpin it bot dahnong hama pipari.
38 Ihir saperim ihtiperhan mongsup ihir ohe mutuh ma pateshe han ohhe Jisas ohnong Nohana. Nohhe ditadit saprohemur por kandeingopri.
39 Por kamtiporhan Jisas oh Es. Go gorhe apteinong susa gorhornong ma Got ohe yah nahah ohe meng moh gorhe ap mutuh ma pati kuuhan ihirnong porinmur pongopri. Potporhan oh arpin orhe ap mutuhnong susa Jisas oh orhornong ma imat yah dei ohe meng oh pomat orhor ama ap mutuh pati kuuhan ihirnong ama pot pihip oh.
Jisas oh brer kuunang bap titsi; kuu kwapran hat patesuh kuu titsi ihitnong ma yah matip ohe meng oh
(Matyu 9:18-26; Mak 5:21-43)
40 Jisaso orhe pinggit pisapat hano irair Gariri tom hru kat tannong it mandeihpari. Mandesa koriyaoh kuuhan ruumsan gon tit tarmur wamat minhan patingopari. Wamat minhan patimdapat Jisas ohnong Wes it mandeo por amam deingopari.
41-42 Amam matperhan rotu ap wamat papti han Jairas oh apris Jisas ohe tong duup oh bos hamnong ham timapat Nohana. Nohe brer kor tit pokwimur. Urhe krismas oh natheimur. Gin uh sik ham haputin ina hat patmur. Ihan go sus ha pomtinoh rim noh gonong nambur apirmur por kandeingopri. Por kamtiporhan Jisas oh ihit saperhan kuuhan gon ama ihirhe gonsi Jisas ohnong huupmat ama pihipa oh.
43 Huupmat ma saya dus oh kuu kwapran hat patin krismas nathei ma birhitip kuu uh uhnong hanip pomtinhe na pomtin ina hat pat kuu tit uh tap ire mutuh ama ihat pipa oh.
44 Ma ihat saya dus oh uh Noh Jisas ohnong marihanoh yah hatiprohwa daham Jisas ohe watah an pat ohe watah rumpe amdapat ama marindip oh. Maripatin orhor kwaparan oh gateng ringopri.
45 Ihtiporhan Jisas oh nohe kasip oh us ma hapat daham kuuhan ihirnong Gur nih nohnong namri por dahandeingopri. Dahamtiporhan ihir gonsi Hah. Nohri timbasmur goshat sangopari. Goshat saperhan Pita oh Wanahat pat hana. Kuuhan mihtin gonong huupnahat napopriya tei moh go Nih namrei rim dahanahapatda potipri.
46 Potporhan Jisas oh Oho. Nohe hanipnong yah matin ohe kasip oh ushan tit uh tit ha yah nahatinoh daham tit namriwa daham am hahmur pongopri.
47 Potporhan Jisas oh yah nahatiprohwa daham bes ma mari kuu uh kuuhan mihtin ruumsan sapti dus moh kinhat remdiproh dahapat bupat apris Jisas ohe tong duup oh bos hamnong ham timongopri. Timapat kuuhan iraire kintei orhor urhe ma ha yah nahatinoh rim ma mari ohe mengo urhe maripatin orhor ma yah hah ohe mengo oh pongopri.
48 Potporhan Jisas oh Kora. Gorhe ma Oh yah nahatiprohwa daham ma namri ohe pe oh gorhornong yah nahahmur. Gin amam dasi ham da manap hat sonmur pongopri.
49 Porpatin orhor rotu ap wamat pat han ohe apdapat tit han tit mengsi aprisa rotu wamat pat han ohnong Jairas gwe kor uh gin da ushemur. Ihan go tisa mohnong be ina ruumsup mar pisapra pongopri.
50 Potporhan Jisas oh ameng oh amrama Jairas ohnong We. Itap go da tupnet rim da darhetipra. Ohwi imtin hatin hanwa dahatwi ahanoh gwe brer oh yah hatiprohmur pongopri.
51 Pora ihir pipari. Susa aptei koripti brer sein pat apnong roperim Jisas oh kuuhan ihirnong gonsi baso pora Pitao Jono Jemiso brer urhe sup gamino ihirnongwi ambura brer sein pat apnong ruhpari.
52 Royaoh kuuhan ihir gonsi gon saheih ham payimaptingopari. Payimaptihan Jisas oh Gur yimapri. Brer oh na hapura be timon pat ohoh ihan gur yimapri pongopri.
53 Potporhan ihir Wa. Hanip Brer moh haput tei moh han moh kinhat mengir gosham kre angopari.
54 Kre atperhan Jisas oh brer seinnong bes tandapat marima kasip mengtei orhor Brer go masona por pamsangopri.
55 Por pamsaporhan urhe da oh it aprisa kapkap masangopri. Masporhan Jisas oh Gin den tit pandinmur pongopri.
56 Potporhan sup ihit gamin orhe pamsanong wamara It da pamsa moho daham ihithe sein bupang rim kas hatpari. Kas hatperhan Jisas oh sup ihit gaminnong Gut brer pamsa ohe meng moh kuuhan ihirnonghe poripri por anggungopri.