26
ጳዉሎሳ አግርጳ ቲኖ ማህደ ማሄ
1 አግርጳ ጳዉሎሳጎ፥ «ኔኒ ነባዝ ኦሆደስ ዳንዳአነ» ጋይዳ። የ ዎደ ጳዉሎሳ ፋ ኩሽቶ ደንꬂ Ꮉንጋራ ጋይዳ፦
2 «ካት፥ አግርጳ፥ አይሁዱንꬅ ታና ሞትደ ባዝስ ኡባ ማሄ እንጎደስ Ꮉይኖ ነ ቲኖ ኤቅተራ ታስ እጻ ሎኦ ጋእ ቆፓነ።
3 ይናን ኔኒ አይሁደ ዎጋን ላለን ሎይꬂ ኤራነ፤ ይኒ ግሾ ታና አዛልእካይዛራ ስአደ ጋር ዎሳነ።
4 «ታኒ ናአትꬃፓ አይኪ ታ አሱንꬅ ግዳን የሩሳላመ የዝደ ታ የስቶ አይሁዱንꬅ ኡባ ኤራነ።
5 ታኒ ቲኖፓ አይኪ፥ ኑ አማኖ ህግቶ ምንꬂ ናግዘ ፋርሳዉንꬅ ኮቻፓ ማቅዳኖ ኡን ማርክꬋደስ ኮይኮ ኤራነ።
6 Ꮉተን ታኒ ጾዚ ኑ አዱንꬅስ እንጎዳ ጋይደ ኡፋይስቶ ናግዘ ግሾ ሞትንቲ Ꮉነ ኤቅዳ።
7 ማህ ታጶ ላምእ ኑ አዱንꬅ ኮችታ ጾዛ ቃማን አዋራን ምንꬂ ጎይንተር ጾዚ እንጎዳ ጋእዳኖ ኤኮደስ ኡፋይሳራ ናጊ የነ። ካት አግርጳ፥ አይሁዱንꬅ ታና ሞትዛና ታኒ ኡፋይሳራ ይኖ ናግዘ ግሾ።
8 ጾዚ Ꮉይቂዱንꬃና ደንꬅዛና አኮስ ይን ግዳ አማንንቶሰ ባዝ ማቅዶ?
9 «ዛጋ ታኒ ታ ኦምተን ናዝረተ የሱሳ ሱንꬅቶ እጾደስ ዳንዳእንትደ ባዝ ኡባ ኦቾደስ ቤዛነ ጋእ ቆፕዳ።
10 ታኒ የሩሳላመ ኦችዳና Ꮉኖ። ካህኑንꬅ Ꮉላቁንꬃፓ አደትꬅ ዎልቃ ኤኪ ጾዝ አሱንꬃፓ ጋሙንꬃና አጭዝዳ። ኡንታና ዎꬍዘ ዎደን ዎꬍዘ ቆፍተ ጊግዳ።
11 ጋማ ዎደ አይሁደ ዎሳ ኬꬃ ኡባ ኡን ሴርንቶደ ጋራን የሱሳ ጫዦደ ፋና ዎልቂስ ቆፕዳ። ታኒ ዎጋባዝ ኡንታና ካጪ መለ አቶ የዝን፥ ባለ ሳአ ካታማ የሎደስ ኡንታና ባይአነ።
12 «ታኒ Ꮉና ኦህትስ ካህኑንꬅ Ꮉላቁንꬃፓ አደትꬅ ዎልቃን ኪታ ኤኪ ዳማስቆ ቅታነ።
13 ካታዮ፥ ታኒ አዋራ ሳተ ኦገ የሳደራ አዋ ፎኦፓ ጋማ አꬍዘ ፎኦ ብእዳ፤ ይናን ታ ካንቶን ታራ የꬍዙንꬅ ካንቶ ዉቲ ሳሎፓ ፎእዳ።
14 ኑኒ ኡቡንꬅ ሳእተ ጎልኤዘ ዎደ እብራይስጠ ዶናራ፥ ‹ሳዉላ፥ ሳዉላ፥ ታና አኮስ ባይኤ? ኔኒ ነና ጫድዘ ብራትዛ እጽኮ ኔስ ዎዝ ኢቶዳ› ጋእ ታስ ኦሆደራ ስእዳ።
15 «ታኒ፥ ‹ላꬆ፥ ነ ኦደ?› ጋይዳ።
«ላꬂ፥ ‹ታኒ፥ ነ ባይእዘ የሱሳ፤
16 የዝን ደንዲ ኤቆ። Ꮉይኖ ኔኒ ታና ብእዳኖን ቲኖፓ ታ ነና ቤሳዳኖ መሉንꬅስ ማርክꬋደ ጋር ታ ታስ ኦችዛ ማህ ነና ሹሞደስ ኔስ በንትዳ።
17 እስራኤለ አሱንꬃፓን ታኒ ነና ኡንታጎ ኪትዘ አይሁደ ማቆሱንꬃፓ ነና አሾዳ።
18 ኔኒ ኡን ኣፍቶ ቡጎዳ፥ ꬉማፓ ፎኦጎ፥ ጻላሄ ኩሸፓ ጾዛጎ ኡንታና ማሆዳ። ኡን ታና አማኒ ናጋራ አቶትꬅ ኤኮዳ። ጾዚ አማኒ ጌዥደ አሱንꬅ ግዳ ፋ ላቶ ደማዳ› ያጋይዳ።
19 «ካት አግርጳ፥ ይኒ ግሾ፥ ታስ ሳሎፓ በንትደ ቆንጭꬅትስ ኪትንቶዳኖ እጽካያ።
20 የዝን ታኒ ቲንꬊ ዳማስቆ ግዳ ይንፓ ሱባ የሩሳላመ ግዳ ይሁዳ ሳአ ኡባ የዙንꬅን አይሁደ ማቆሱንꬅ ፋ ናጋራፓ ጾዛጎ ማቃደ ጋራን ናጋራፓ ማቅዳኖ ቤዝዘ ኦቻ ኦቾደ ጋር ቃላ ኦህዳ።
21 ይኒ ግሾ፥ አይሁዱንꬅ ታና ጾዘ ኬꬃ አይኪ ዎꬎደስ ኮይዳ።
22 Ꮉይኖ የሎደስ ጾዘ ማደ ታፓ ሻክንትካያ፤ ይኒ ግሾ፥ ኤራꬅስን ዳማስ ማርክꬍተራ Ꮉነ ኤቅዳ። ናቡንꬅን ሙሴን Ꮉኖዳ ጋእ ኦህዳንፓ መለ ፈትባዝን ታኒ ኦህደባዝ ባያ።
23 ይናን፥ ‹ክርስቶሳ ማꬋ ኤኮደስ ቤዛነ፤ ማህ Ꮉይቆፓ ቲኖ ደንድ አይሁዱንꬅስን አይሁደ ማቆሱንꬅስ ፎኦ አዋጃነ› ጋእ።»
24 ጳዉሎሳ ይኖ ጋእ ማሆደራ፥ ፍስጦሳ ፋ ቃልቶ ꬎቅ ዪዚ፥ «ጳዉሎሳ፥ ነ ዣሽትዳ፤ ነ ጋማ ታማርዳና ነና ዣሻስ የልꬅዳ» ያጋይዳ።
25 የዝን ጳዉሎሳ፥ «ቦንቾ ፍስጦሳ፥ ታኒ ቱርባዝን ኮሽዘ ባዝን ኦህነፕ አትን ዣሽትካያ።
26 ታኒ ቆንጨ ኦህዘ ኦህቶ ካት ኤራነ። Ꮉና ኦህታ አችቻ ኦችንትካይዘ ግሾ ፈትን ኤፓ ገንጎሳኖ ታኒ ጌሽ ኤራነ።
27 «ካት አግርጳ፥ ኔኒ ናቡንꬅና አማናነ ባነ? ነ አማንዛኖ ታኒ ኤራነ» ጋይዳ።
28 ካት አግርጳ፥ ጳዉሎሳጎ፥ «Ꮉና ኤራꬅ ሳተ ታና ክርስታነ ማሆደስ ኮያነ?» ያጋይዳ።
29 ጳዉሎሳ፥ «ጋማ ዎደ ማቅን ኤራꬅ ዎደ ነ ጻላላ ማቅካይዝን Ꮉይኖ ታና ስእዘ ኡቡንꬅ Ꮉና አችትፕ አትን ታ ፋና ማቃደ ፋና ጾዝ ዎሳነ» ያጋይዳ።
30 ይንፓ ሱባ፥ ካት አግርጳ ጋደ አህዘ ፍስጦሳ፥ ባርኒቀን ኡንታራ በትደ ኡቡንꬅ ደንድዳ።
31 እዝፓ ኬዚ ቅትተራ ፈተ ፈተራ፥ «Ꮉይ አꬄ Ꮉይቆስ ዎይ አችስ የልꬅዘባዝ አኮን ኦችካያ» ጋእ ዎላ ኦህንትዳ።
32 አግርጳ ፍስጦሳጎ፥ «Ꮉይ አꬄ ‹ቄሳረ ታ ባዝ ፍርዶ› ጋይካይዛኮ ብልንቶደስ ዳንዳአነ፥ የዝን አትዳ» ጋይዳ።