27
ጳዉሎሳ ሮመ ቅትዳ
1 ኑኒ ማርካበራ ጣልያ ቅቶደ ፋና ኡን አጭደ ዎደ ካቱንꬅ ዋና ማቅደስ ዎታዳሩንꬃና ኦላስ ኪትዘ ፈተ ዩልዮሳ ጋዘ ማቶ Ꮉላቅዘስ ጳዉሎሳን መለ ኤራꬅ አቻ የዘ አሱንꬃና እንግዳ።
2 እስያ ጋጻ የዘ ጉታ ቅትዘ አድራምጥዮነ ማርካበ ግዳ ገሊ ደንድዳ። መቀዶንያ አስ ማቅደ ተሰሎንቄ አርስጥሮኮሳ ኑራ የነ።
3 ዎንትስት ዎደ ኑኒ ስዶና የሎደራ፥ ዩልዮሳ ጳዉሎሳስ ሎይꬂ ፋ ላጉንꬃጎ Ꮉንግ ኮሽዘ ባዝ ማድንቶደ ጋር ኡንታጎ ዳክዳ።
4 እዝፓ ደንዲ ቲኖራ ኑላ ባቂዘ ግሾ Ꮉꬃራ ተቅንትደ ሳአ፥ ቆጵሮሳራ ካተ ማህ ዬካ ዛላራ አꬍዳ።
5 ክልቅያን ጵንፍልያ ካለ የዘ አባ ፊንግ ሊቅያን የዘ ሙራ የልዳ።
6 እዘ ማቶ Ꮉላቅዘ ጣልያ ቅትዘ እስክንድርያ ማርካበ ደንግ፥ እዘ ኑና ገልꬅዳ።
7 ኑኒ ጋማ ዎደ ለሚ የዺ፥ ጋማ ማꬋራ ቃንዶሳ ካታማ ካለ የልዳ። የይጋራ ቅቶደስ ኑና ጎተ ካይን ሳልሞናራ አꬊ Ꮉꬃራ ተቅንትደ ሳአ፥ ቃርጠሳራ ካቲ አꬍዳ።
8 ጋማ ማꬋራ ጋጻ ጋጻ አይኪ ላስያ ካታማ ካለ የዘ አባ ጋጽተ «ሎኦ ማርካበ ሸምፕዘ በሲ» ጋእንትዘ በስተ የልዳ።
9 ኑኒ እዘ ጋማ ዎደ ጋምእዳንፓ ሱባ ጾማ ብልንትን፥ ማርካበራ የꬍዛና ዋይꬅዘ ግሾ ጳዉሎሳ ኡንታና ዞርዳ።
10 «አሱንꬆ፥ ኑ Ꮉንግዘ ኦግተ ዳማ ቆሄን ዳማ ꬋበ የዛና ታስ በንታነ፤ ቆህታ ጫናላን ማርካበላ ጻላላ ማቅካይዝን ኑ ኦምትላን የሎዳ» ጋይዳ።
11 የዝን ማቶ Ꮉላቅዘ ጳዉሎሳ ጋይዳንፓ አꬊ ማርካበ እዥዛይን ማርካብት አዳይን ጋዛኖ አማንዳ።
12 ይና አባ ጋጻ የዘ ካታማ ባልጎ አግና ኣꬆደስ ኡንትስ ጊጎሰ ግሾ ጋማ አሱንꬅ ፋስ ዳንዳእንትኮ ፍንቀ ካታማ የሊ ስላ አግና የይጋ ኣꬆደስ ዞርንትዳ። ፍንቀ ዎካ አዋ ገሎፓን ዬካ አዋ ገሎፓን ግዳ አባ ጋጻ የዘ ማርካበ ጫና ኬꬅዘ በሲ ስላ አግና እዘ ኣꬆደስ ቆፋ ሺሽዳ።
አባላ ጎተ ደንድዳ
13 ኤራꬅ ዬካ ባቆ ባቂደ ዎደ ኡን ቆፕዳንጋራ Ꮉንደ ፋና ይእን ደንዲ፥ ማርካብዘ ኤንአመ ጋር አይክዘ መቅዛ ኡደ ኤኪ ቃርጠሰ ካለራ አꬍዳ።
14 የዝን ጋማ ጋምእካይዝን «አዉራቂስ» ጋዘ ዳማ ጎተ Ꮉꬃራ ተቅንትደ ሳእትፓ ሱለ ኡንታላ አፋ ደንድዳ።
15 የ ጎትዘ ማርካብዛ ኡርቂ Ꮉንጋመ ፋና ካይደ ግሾ ባቅዘ ማርካብዛ ፋ ኮይደ በሳ ካንጎደ ፋና ዳኪ አሽዳ።
16 ኑኒ ቄዳ ጋዘ Ꮉꬃራ ተቅንትደ ሳአ ካቲ Ꮉንግተራ ጋማ ዋየራ ማርካብዘ ጎንግዛ አሾደስ ዳንዳእዳ።
17 ኡን ጎንግዛ ኡደ ከስዳንፓ ሱባ ጋደራ ማርካብዘላ ጻጺ፥ ምንꬂ አጭዳ። ሱርቲሳ ጋዘ ሻፍተ ፋና ጎልእዛመ ጋር ይርጊ፥ ማርካብዘ ሻርቶ ኬꬂ ማርካብዛ Ꮉሪ እዥዳ።
18 ጎትዘ ሚንግ Ꮉንጎደራ ዎንትስት ዎደ ጫንትፓ ባግቶ አባ ኦለ አይክዳ።
19 Ꮉይꬓንꬆ ቃማ ማርካብዘ ሚሽቶ ኤኪ ፋ ኩሽትራ ኦልዳ።
20 ኑኒ ጋማ ዎደ አዋ ኣፈን ጾልንቶን ብእካይዘ ግሾን ዳማ ጎተ ኑላ ባቂደ ግሾ ቲኖፓ ሸምፖራ አቶዳ ጋእ ቆፕካያ።
21 የ ዎደ ኡን ጋማ ዎደ ካꬃ ሚካይዛራ ጋምእደ ግሾ ጳዉሎሳ ኡን ግዳ ደንዲ ኤቂ፥ «አሱንꬆ፥ ይን ታ ዞርቶ ኤኪ ቃርጠሳፓ ደንድካይዛራ አተዛኮ Ꮉና ቆህታን ꬋብታን ኑና የላማ የሻ።
22 የዝን ታኒ ይንታና ዣሽትፐተ ጋእ ዞራነ፤ አኮስ ጋይኮ፥ Ꮉይ ማርካብዘ ꬋቦዳፕ አትን ይንታፓ ፈቲ አስ ሸምፖን ꬋቦስ።
23 Ꮉይኖ ቃማ ታ ኤ ባዝ ማቅዳይን ታ ጎይንዘ ጾዘ ኪትደ ኪታንቾ ታ ካለ ኤቂ፥
24 ‹ጳዉሎሳ፥ ዣሽትፐ፤ ኔኒ ሮመ ካት ቄሳረ ቲኖ ኤቆደስ ቤዛነ። ይኬ ጾዚ ነ ግሾ ኔራ Ꮉንግዘ አሱንꬅ ኡቡንꬅ ሸምፕቶ አሽዳ› ጋይዳ።
25 ይኒ ግሾ፥ አሱንꬆ፥ ዣሽትፐተ። የ ኪታንችዘ ታስ ኦህዳና Ꮉኖዳኖ ታ ጾዛ አማናነ።
26 የዝን ባቅዘ ኑና ካንግ ፈቲ Ꮉꬃራ ተቅንትደ ሳአ ጋጻ ኦሎዳ» ጋይዳ።
27 ታጶ ኦይድንꬃ ቃማ አድርያ አባ ግዳ ኑና ባቅታ ጎደን Ꮉንካን ኡርቆደራ፥ ቃማ ግዲ ብላሄ ማቅዘ ዎደ ማርካብተ ኦችዙንꬅስ ሳአጎ ኡክደ ጋር አዝዳ።
28 ኡን ጌናትꬅቶ ኤሮደስ ኮይ ጋደ በርꬃ ዴጾባዝ አጪ አባ ኦልን፥ አባ ገንታ ኦስፉን ታም Ꮉꬋ ማቅዳ። ኤራꬅ ጋምእ፥ ማህ ኦልን እዝፑን ታም Ꮉꬋ ማቅዳ።
29 ኡን አባ ጋጻ የዘ ሹቻላ ዶምእንታመ ጋር ዣሽቲ፥ ማርካብዘ ቅታመ ጋር አይክዘ ኦይዲ መቆ ማርካብዘፓ ሱባራ አባ ዳኪ፥ ሳእታ ዎንቶደ ጋር ጾዝ ዎስዳ።
30 ማርካብተ ኦችዙንꬅ ማርካብዘፓ ꬋቦደስ ኮይ፥ ማርካብዘ ቅታመ ጋር አይክዘ መቅቶ ማርካብዘፓ ቲኖ ዛላራ አባ ኦልዘ ጋር አዝዝ ጎንግዛ አባ ኦልዳ።
31 ጳዉሎሳ ማቶ Ꮉላቅዘጎን ዎታዳሩንꬃጎ፥ «Ꮉንስ ማርካብተ ሸምፒ በታንጽኮ ይን አቶደስ ዳንዳኦስ» ጋይዳ።
32 ይኒ ግሾ፥ ዎታዳሩንꬅ ጎንግዘ አጭንትደ ጋድዛ ጋቺ ዳኪ አሽዳ።
33 ሳአ ዎንቶደስ ይአደራ ኡቡንꬅ ካꬃ ማአደ ጋር ጳዉሎሳ አሱንꬃጎ፥ «ይን ካꬃ ሙእካይዛራ ጋምእደ Ꮉይኖራ ታጶ ኦይዲ ቃማ ጋምእዳ።
34 ይኒ ግሾ፥ ኤራꬅ ካꬃ ይን ማአደ ጋር ታኒ ይንታና ዎሳነ። ይን ምንጎደ ጋራን ሸምፖራ የሳደ ጋር ኤራꬅ ካꬃ ማአደስ ኮሻነ፤ መለ አቶ የዝን ይን ኦማ እስንꬅትፕ ፈትን ꬋቦስ» ጋይዳ።
35 ጳዉሎሳ ይኖ ጋእ ቦራ ኤኪ ኡቡንꬅ ቲኖ ጾዝ ጋላትዳ፤ ቦርዛ ባጽ መኤ አይክዳ።
36 ኡቡንꬅ ሚንግ ፋ ፋስ ካꬃ ኤኪ ሙእዳ።
37 ኑኒ ማርካብተ የዙንꬅ ላምእ ጼት ላፑን ታም እዝፑን።
38 ኡን ሙእ ምዥደ ዎደ ጫና ዛርግቶ አባ ኦልን ማርካብዘ ዴጽቶ ፎልዝዳ።
ማርካብዘ መቂዳ
39 ሳአ ዎንትደ ዎደ ማርካበ ኦችዙንꬅ አባ ሳአ የለዛኮ ኤርካይዛራ፥ አባ ጋጻ የዘ ሻፈ ስልሞ ብእዳ። ፋስ ዳንዳእንትኮ ማርካብዛ ይና ሻፍትጎ ሺሾደስ ቆፕዳ።
40 የይዝ፥ ማርካብዘ ቅታመ ጋር አይክዘ መቅቶ ብሊ አባ ኦልዳ። የ ዎደ እዥዘ ምንጻ አጭዘ ጋድዛ ብልዳ። ይንፓ ሱባ፥ ባቅታ ማርካብዛ ቲኖ ኡርቆደ ጋር ማርካብዛ ካንግዘ ሻራ ቲኖ ዛላራ ꬎቅ ዪዚ የ አይክዳ።
41 የዝን ማርካብዘ ሻፈ ናድንትደላ ዶምእንቲ ቆꬍንትዳ። ማርካብዘስ ቲኖ ዛልታ ጾስንቲ ሻፍቶ ጫዲ አይኪ ኤንአንጽ እጽን፥ ሱባ ዛልቶ ጎተ ኡርቅዛንፓ ደንዲ መቀ አይክዳ።
42 ዎታዳሩንꬅ አች አሱንꬃፓ ፈትን Ꮉꬅተ Ꮉꬊ ኬዚ ꬋባመ ጋር ኡንታና ዎꬎደስ ዞርንትዳ።
43 የዝን ማቶ Ꮉላቅዘ ጳዉሎሳ አሾደስ ኮይ ዎታዳሩንꬃራ ዞርንቶ እጽዳ። Ꮉꬅ Ꮉꬊ ኤርዘ ኡባ ማርካብዘፓ Ꮉꬅተ ዶሊ ዶሊ ዎꬊ ቲንꬊ ጋጻ ኬሳደ ጋር ኪትዳ።
44 አትዱንꬅ ሳንቂትላን፥ ማርካብዘ መቅꬅትላ አፋ ኬሳደ ጋር ኪትዳ። ይኒ ጋራ ይእ ኡቡንꬅ ጋጻ ሳሮራ ከዝዳ።