9
ሳዉላ ክርስቶሳ አማንዳ
(ሐዋ. 22:6-16፤ 26:12-18)
1 የ ዎደ ሳዉላ ላꬅ ታማሩንꬃና ዎꬎደስ ማንዲ ካህኑንꬅ Ꮉላቅዘጎ ቅትዳ።
2 ላꬂ ኦግቶ ካልዘ ꬊራꬁንꬃናን ማቹንꬃና ደንግኮ፥ አጭተራ የሩሳላመ ኮኦደስ፥ ደማስቆ የዘ አይሁደ ዎሳ ኬꬅስ ዳብዳበ ጻፍንቶደ ጋር ኤዛ ዎስዳ።
3 ኤ Ꮉንግ፥ ደማስቆ ካታማ የሎደስ ኡኮደራ፥ ቆፕካይዝን ሳሎፓ ዳማ ፎኦ ኤ ካንተ ፎእዳ።
4 ኤ ሳእተ ጎልእን፥ «ሳዉላ፥ ሳዉላ፥ አኮስ ታና ባይኤ?» ጋዘ ቃላ ስእዳ።
5 ሳዉላ፥ «ላꬆ፥ ነ ኦደ?» ያጋእ ኦጭዳ።
«ታኒ፥ ነ ባይእዘ የሱሳ» ያጋይዳ።
6 ላꬂ ኤጎ፥ «ደንዲ ካታማ ገሎ፤ ነ ኦቾደስ ኮሽዘ ባዝ እዘ ኔስ ኦሆዳ» ያጋይዳ።
7 ሳዉላራ ኦግቶ Ꮉንዘ አሱንꬅ አኮን ኦህካይዛራ ኤቂ አትዳ። ኦꬅቶ ስእነ፥ የዝን ኦና የዛኮን ብእካያ።
8 ሳዉላ ጎልእደ በስትፓ ደንዲ በእዘ ዎደ ኤ ኣፍታ ደንጋንጽዳ። ይኒ ግሾ፥ ኡን ኤ ኩሽቶ አይኪ ካልꬅ ዳማስቆ ገልꬅዳ።
9 Ꮉይꬕ ቃማ የሎደስ ኤ በአደስ ዳንዳእካያ፤ አኮን ሙእካያ፤ ኡዥካያ።
10 ዳማስቆ ግዳ ፈቲ ሀናንያ ጋዘ የሱሳ ታማርዘ የነ። ላꬂ ቆንጭꬃራ፥ «ሀናንያ» ያጋእ ጼግዳ።
ሀናንያ ማህ፥ «ታ ላꬆ፥ ዮ» ያጋይዳ።
11 ላꬂ ኤጎ፥ «ደንዲ ሞሎ ጋእንትዘ ኦግቶ Ꮉንግ፥ ይሁዳ ኬꬃ ሳዉላ ጋዘ ተርሰሰፓ የኤዘ አꬃ ኮዮ፤ ሳዉላ Ꮉተ ዎሳላ የነ።
12 ማህ ሀናንያ ጋዘ አꬄ ገሊ፥ ሳዉላ ላምእንꬃ በአደ ጋር ፋ ኩሽቶ ኤላ ጋዶደራ ቆንጭꬃራ ብእዳ» ያጋይዳ።
13 ሀናንያ ማህ፥ «ላꬆ፥ የሩሳላመ ነ ጌሽ አሱንꬃላ የ አꬄ አኮ ጋር ኢታ ባዝ ኦቼዛኮ ታ ጋማ አሳፓ ስእዳ።
14 ማህ ዳማስቆ ግዳ ነ ሱንꬅቶ ጼግዙንꬃና ኡባ አጮደስ፥ ካህኑንꬅ Ꮉላቁንꬅ ኤስ አደትꬅ ዎልቃ እንግዳ» ያጋይዳ።
15 የዝን ላꬂ ኤጎ፥ «ሳዉላ አይሁደ ማቆሰ አሱንꬅ ቲኖ፥ ካቱንꬅ ቲኖን እስራኤለ አሱንꬅ ቲኖን፥ ታ ሱንꬅቶ ቶኮደስን ታስ ኦቾደስ ዶርንትደ ሚሸ ማቅደ ግሾ ነ ኤጎ ቅቶ።
16 አኮስ ጋይኮ፥ ታ ሱንꬅት ግሾ ኤ ዋንꬅ ማꬋ ኤኮደስ ኮሽዛኮ ታ ኤዛ ቤሳዳ» ያጋይዳ።
17 ሀናንያ Ꮉንግ፥ ኬꬃ ገሊ፥ ፋ ኩሽቶ ሳዉላላ ጋዲ፥ «ታ እሸ ሳዉላ፥ ነ ይእዘ ኦግተ ኔስ በንትደ ኤ ላꬄ የሱሳ፥ ነ በአደ ጋራን ጌሽ አያናራ ኩሞደ ጋር ታና ኪትዳ» ጋይዳ።
18 ኤልሲ፥ ሳዉላ ኣፍትፓ ፈቲ ቁሮ ፋና የዘ ባዝ ዎꬍን፥ ሳዉላ ላምእንꬃ ብእዳ። ማህ ደንዲ ጻማቅንትዳ።
19 ካꬃ ሙእ ምንግዳ። ዳማስቆ ግዳ የዘ ታማሩꬃራ ኤራꬅ ቃማ ጋምእዳ።
ሳዉላ ዳማስቆ ታማርስዳ
20 ኤሊሲ ሳዉላ፥ «የሱሳ ጾዘ ናአ» ያጋእ ዳማስቆ ግዳ የዘ አይሁደ ዎሳ ኬꬃ ቃላ ታማርስዳ።
21 ይኖ ስእዘ ኡቡንꬅ ቆፒ፥ «Ꮉይ የሩሳላመ የሱሳ ሱንꬅቶ ጼግዙንꬃና ባይእዛያ ባነ? ማህ Ꮉይጋ ይእዳና ኡንታና አጪ፥ ካህኑንꬅ Ꮉላቁንꬅ ቲኖ ካንጎደስ ባነ?» ያጋይዳ።
22 የዝን ሳዉላ ቃላ ኦሄራ ሚንግተር Ꮉንግዳ። የሱሳ፥ ኤ ክርስቶሳ ማቅዳኖ ቆንጭዝ ኦህደ ግሾ ዳማስቆ ግዳ የዘ አይሁዱንꬅ ኤስ ማሆደባዝ ꬋብዳ።
23 ጋማ ቃማፓ ማቂ አይሁዱንꬅ ሺቂ፥ ሳዉላ ዎꬎደስ ዞርንትዳ።
24 የዝን አይሁዱንꬅ ፋና ዎꬎደስ ቆፕዳኖ ሳዉላ ኤርዳ። ኡን ኤዛ ዎꬎደስ ቃማን አዋራን ካታማ ፉርꬅተ ናጋነ።
25 ማህ ኤ ታማሩንꬅ ኤዛ ቃማ ካንግ፥ ግምበ ጋሰ ዉሉንቀራ ኬሲ ዳቾራ ኬꬅዳ።
ሳዉላ የሩሳላመ ታማርስዳ
26 ሳዉላ የሩሳላመ የልደ ዎደ አማንዙንꬃራ የልንቶደስ ቆፕዳ። የዝን ኤ ክርስቶሳ አማንዳና ኡንትስ ቱሮ አዛንጽ እጽን ኤስ ዣሽትዳ።
27 የዝን ባርናባሳ ሳዉላ ሐዋሩንꬃጎ ካንግዳ። ኦገ ላꬂ ዋይዝ ቆንጨዛኮን ኦህዘዛኮ፥ ማህ ሳዉላ ዳማስቆ ግዳ የሱሳ ሱንꬅተ ዣሽትካይዛራ ዋይዝ ቃላ ኦሄዛኮ ኡንትስ ጌሽ ኦህዳ።
28 ሳዉላ የሩሳላመ ዉቲ ላꬄ ሱንꬅተ ዣሽትካይዛራ ቃላ ኦህተራ፥ ሐዋሩንꬃራ ዎላ የዝዳ።
29 ማህ ሳዉላ ግርኬ ዶና ኦህዘ አይሁዱንꬃራ ኦህንት ላልዳ። የዝን ኡን ኤዛ ዎꬎደስ ኮይዳ።
30 አማንዘ አሱንꬅ ይኖ ስእ፥ ሳዉላ ቂሳርያ ካንግ ተርሴሰ ዳክዳ።
31 ይሁዳ፥ ጋልላን ሳማራን ኡባ ግዳ የዘ ዎሳ ኬꬅታ ሳሮራ የዝዳ። ማህ ምንግዳ፤ ላꬅስ ዣሽትተር ጌሽ አያና ሚንꬅꬆደራ ጋንግተር Ꮉንግዳ።
ጴጥሮሳ ሊዳን እዮጰን ታማርስዳ
32 ጴጥሮሳ ሳአ ኡባ ዉቲ ሊዳ የዘ አማንዘ አሱንꬃጎ የልዳ።
33 እዘ ኦስፉን በረ ኩሙꬅ ዎቢ ዪꬃ ዎይእ የዘ ኤንያ ጋዘ አꬃ ደንግዳ።
34 ጴጥሮሳ፥ «ኤንያ፥ የሱስ ክርስቶሳ ነና ፋꬆዳ፤ ደንዲ ነ ይꬅቶ ደንꬆ» ያጋይዳ። ኤዝን ኤልሲ ደንዲ ኤቅዳ።
35 ሊዳን ሳሮናን የዘ አሱንꬅ ኡባ ኤንያ ብእ፥ ላꬃጎ ማቅዳ።
36 እዮጰ ካታማ ፈቲ ጻብቶ ጋዘ አማንዛና የነ። (ጻብቶ ጋእንትዛና ገንኤ ጋእንተ) እዛ ፋ የዝደ ዎድተ ኡባ ሎኦ ባዝ ኦችተራን ዳሁንꬃና ማድተ የዝዳ።
37 የ ዎደ እዛ Ꮉርግንቲ Ꮉይቂን፥ አሱንꬅ እ አህቶ ሜጪ፥ ፎቀላ ኬሲ ዎይꬅዳ።
38 ሊዳ እዮጰስ ካለ። አማንዙንꬅ ጴጥሮሳ ሊዳ የዛኖ ስእ፥ «ዎይአ ኑጎ ኤልሲ ዮኦ» ያጋዘ ኪታ ላምእ አሳራ ኤጎ ኪትዳ።
39 ይኒ ግሾ፥ ጴጥሮሳ ደንዲ፥ ኡንታራ ቅትዳ። የይጋ የልን፥ ፎቀላ የዘ ክፍልተ ኤዛ ገልꬅዳ። አዝን ባይዘ ማቹንꬅ ጴጥሮሳ ካንተ ኤቂ ዬክተራ ዶርቃ ኡንታራ ፋጻ የዝተራ ማእደ ቃምስቶን አፉልቶ ኡባ ጴጥሮሳ ቤዝዳ።
40 ጴጥሮሳ ኡንታና ኡባ ባለ ኬሲ፥ ቡንቁንቲ ጾዝ ዎስዳ። ማህ አህትጎ ማቂ፥ «ጣብተ፥ ደንዶ» ያጋይዳ። ጣብታ ፋ ኣፍቶ ቡጊ ጴጥሮሳ ብእ፥ ደንዲ በትዳ።
41 ጴጥሮሳ እዞ ፋ ኩሽተ ካትዚ ደንꬂ ኤስዳ። ይንፓ ማቂ፥ አማንዙንꬃናን አዝኒ ባይዙንꬃና ጼጊ፥ ኡን ቲኖ ሺሽዳ።
42 Ꮉና ኦህታ እዮጰ ካታማ ኡባ የልዳ። ጋማ አሱንꬅ ላꬃ አማንዳ።
43 ጴጥሮሳ እዮጰ ስሞና ጋዘ ቆለ Ꮉሽዘ ካራ ጋማ ዎደ ጋምእዳ።