10
የሱሳ ኪትደ ታጶ ላምእ ሐዋሩንꬃና
(ማር. 3:13-19፤ ሉቃ. 6:12-16)
1 የሱሳ ታጶ ላምእ ታማሩንꬃና ፋጎ ጼጊ፥ ቱና አያና ከሶደ ፋናን Ꮉርገ ኡባፓ ፋꬆደ ፋና ኡንትስ አደትꬅ ዎልቃ እንግዳ።
2 የሱሳ ኪትደ ታጶ ላምእ ሐዋሩንꬅ ሱንꬅታ፤ ቲንዘ ጴጥሮሳ ጋዘ ስሞና ኤ እሸ እንድርያሰ፥ ዛብድዮሳ ናአ ያይቆባን ኤ እሸ ዋሐንሳን፥
3 ፍልጶሳን ባርቶሎምዮሳ፥ ቶማሳን ቃራጠ ጋችዘ ማቶሳ፥ እልፍዮሳ ናአ ያይቆባ፥ ታድዮሳ፥
4 ፋ ጋድትስ ይቅስንትዘ ስሞናን የሱሳ አꬂ እንግደ የስቆሮቱ ይሁዳ።
5 ይና ታጶ ላምኡንꬅ የሱሳ ኪቲ ዳክተራ፥ «አይሁደ ማቆሰ ዎርዣጎ Ꮉንግፐተ፥ ማህ ሳማራ አሱንꬅ ካታማን ገልፐተ።
6 የዝን እስራኤለ ኬꬃፓ ማቅደ ሰካ ꬋብደ ዱሩንꬃጎ Ꮉንጎተ።
7 እዘ Ꮉንግ፥ ‹ሳሎ ካእቱሞ ኡክዳ› ጋእ ኦሆተ።
8 Ꮉርግንትዙንꬃና ፋꬆተ፥ Ꮉይቂዱንꬃና Ꮉይቆፓ ደንꬆተ፥ ቁርሱማ Ꮉርግንትዙንꬃና ጌሽ ፋꬆተ፥ ቱና አያና ከሶተ። ይን Ꮉሪ ኤክዳኖ Ꮉሪ እንጎተ።
9 ይን ኪስተ ዎርቃ፥ ዎይ ብራ ሳንትመ አይክፐተ።
10 ይን ኦገስ ካርጥተ፥ ላምእ ማኦ፥ ዎይ ጫማ ዎይ ጉፈ አይክፐተ፤ ኦችዙንꬅስ Ꮉይኖ ቁማ ቤዛነ።
11 «ይን ፈቲ ካታማ ዎይ ካራ ጋንጨ ገልዘ ዎደ ይንታና ሞኪ ኤኮደስ ኡፋይትዘ አስ ኮይ ኤ ካራ ገሎተ፤ ይን ቅቶደ ዎንꬅስ እዘ ጋምኦተ።
12 ማህ ኦደ ካራን ገልተራ ሳርꬆተ።
13 ይና ኬꬅታ ይንታና ሞክኮ ይን ሳርꬅደ ሳርታ ኡንታና የሎ፥ የዝን ኡን ሞካንጽኮ ይን ሳርꬅደ ሳርታ ይንትስ ሱብ ማቆ።
14 ኦደን ይንታና ሞካንጽኮ ይን ኦህዘ ባዝ ስአንጽኮ ይና ኬꬅትፋ ዎይ ይና ካታምትፓ ከዝተራ ይን ቶህተ የዘ ጹርቶ ፍጺ ከዞተ።
15 ታ ይንትስ ቱሮ ኦህነ፤ ጾዘ ፍርዳ ቃማ ይና ካታምትፓ ሶዶማስን ጋሞራ ካታምትስ ፍርዳ ኤሮዳ።
16 «ታ ይንታና ዱሮ ፋና ሱዹሙንꬅ ግዳ ዳኮዳ። ይኒ ግሾ፥ ሾሽ ፋና ጭንጫ፥ ዎለ ፋና አዳ ማቆተ።
17 አሱንꬅ ይንታና ፍርድዘ ዳይኑንꬅስ አꬂ እንጎዳ፥ ማህ አይሁደ ዎሳ ኬꬃ ይንታና ጋራፎዳ። ይኒ ግሾ፥ ኡንታፓ ናግንቶተ።
18 ታ ግሾ ጋእ ይንታና ዎርዥቶ አህዙንꬅ ቲኖ ካቱንꬅ ቲኖ ካንጎዳ። ኡን ቲንተ አይሁደ ማቆሰ ዎርዡንꬅ ቲኖ ኤቂ ይን ታ ባዝ ማርክꬎዳ።
19 የዝን ይንታና ፍርዳስ አꬂ እንግዘ ዎደ ዋጋእ ማሆደ ጋእ ኡንእንትፐተ፤ ይና ሳተ ይን ጋዉደ ባዝ ጾዚ ይንትስ እንጎዳ።
20 አኮስ ጋይኮ፥ ይንታና ኦህዘ ይን አዳይ ጌሽ አያናፓ አትን ይንታና ባያ።
21 «እሻይ ፋ እሻያ፥ አዳይ ፋ ናአያ፥ Ꮉይቆስ አꬂ እንጎዳ፥ ናኡንꬅ ፋና የልዱንꬃላ አፋ ደንዲ ኡንታና ዎꬍሳዳ።
22 ታ ግሾ ጋእ አስ ኡቡንꬅ ይንታና እጾዳ፥ የዝን ዉርሱꬅ የሎደስ ሚንግደ አቶዳ።
23 ፈቲ ካራ ጋንጨፓ ይንታና ኡን ባይእኮ መለ ካታማ በቶተ። ታኒ ይንትስ ቱሮ ኦህነ፤ አስ ናአይ ዮኦደ ዎንꬅስ፥ ይን እስራኤለ ካታማ ኡባ ካንꬃማ።
24 «ታማሩንꬅ ፋ አስታማርዘፓ፥ አርዘን ፋ ላꬄፓ አꬎስ።
25 ታማርዘ ፋ አስታማርዘ፥ አርዘ ፋ ላꬅዘ ፋና ዪኮ ኤስ ማቃዳ። ካርቲ አዳይ ብኤልዘቡላ ጋይኮ ኤ ካራ አሱንꬃና ዋይዝ ዎዚ ኢሲ ጼጎሶ?
26 «ይኬ፥ አስስ ዣሽትፐተ። ጌንግደ ባዝ ቆንጮዳ፥ አችንትደ ባዝ ጌሻ ከዝካይዛራ አቶስ።
27 ታኒ ይንትስ ꬉማ ኦህዘ ባዝ ይን ፎኦ ኦሆተ፤ ታ ይንትስ Ꮉየ ካልካሽደ ባዝ ዞዘላ አዋጆተ።
28 አሾፕ አትን ሸምፖ ዎꬎደስ ዳንዳኦሱንꬅስ ዣሽትፐተ። የዝን ሸምፕቶን አሽቶን ጋናመ ꬋብሶደስ ዳንዳእዘ ጾዘስ ዣሽቶተ።
29 ላምእ ቡበ ላንዱንꬅ ፈቲ ሳንትመ ባይዝንቶሳነ? ይኦፕ አትን፥ ኡንታፓ ፈታይን ይን ጾዘ ጋይካይዝን ሳአ ዎꬎስ።
30 መለ አቶ የዝን፥ ይን ኦማ እስንꬅታን ፋይድንቲ የነ።
31 ይኬ፥ ጋማ ቡበ ላንዱንꬃፓ ይን ኣꬍዘ ግሾ ዣሽትፐተ።
32 «አስ ቲኖ ታስ ማርክꬍዘ ኡቡንꬅስ ታንን ሳሎ የዘ ታ አዳይ ቲኖ ማርክꬋዳ።
33 የዝን አስ ቲኖ ታና ካድዛያ ታንን ሳሎ የዘ ታ አዳይ ቲኖ ካዶዳ።
34 «ታኒ ሳአላ ሎኦ ኮኦደስ ይእዳ ይንትስ አዝፐ። ታኒ ኦላፓ አትን ሳሮትꬅ ኮኦደስ ይእካያ።
35 ታኒ ይእዳና፥
«ናአያ አደፓ
ማች ናእቶ እንትፓ
ናአይ ማችቶ አዝንዘ እንትፓ ሻኮደስ።
36 አስስ ሞርኩንꬅ ኤ ካራ አሱንꬃና ማቆዳ።»
37 «ታፓ አꬂ ፋ አዳያ ዎይ ፋ እንቶ ካዽዘ፥ ታ ባዝ ማቆደስ ቤዞስ። ፋ ꬊራꬅ ናአያ ዎይ ፋ ማች ናእቶ ታፓ አꬂ ካዽዘ፥ ታ ባዝ ማቆደስ ቤዞስ።
38 ፋ ማስቃላ ቶኪ ታና ካሎሰ ኦደን ታ ባዝ ማቆደስ ቤዞስ።
39 ፋ ሸምፕቶ አሾደስ ኮይዘ ꬋብሶዳ፥ የዝን ፋ ሸምፕቶ ታ ግሾ አꬂ እንግዘ አሾዳ።
40 «ይንታና ሞክዘ ታና ሞካነ፥ ታና ሞክዘ ማህ ታና ኪትዳያ ሞካነ።
41 ናበ ናበ ሱንꬅተ ሞክዘ፥ ናበ ፋና ዋጋ ኤኮዳ፤ ማህ ጽልዛ ጽሎ ሱንꬅተ ሞክዘ፥ ጽልዘ ፋና ዋጋ ኤኮዳ።
42 ታ ይንትስ ቱሮ ኦህነ፤ Ꮉንꬅ ታ ታማሩንꬃፓ ኤርዘ ፈታይ ታና ካልዘ ግሾ መለ አቶ የዝን ኤራꬅ ቶያ Ꮉꬅ እንግኮ ኤ ዋግታ ꬋቦስ» ያጋይዳ።