11
ጻማቅዘ ዋሐንሳ ኪትደ አሱንꬃና
(ሉቃ. 7:18-35)
1 የሱሳ ታጶ ላምእ ታማሩንꬃና ኪቲ Ꮉስዳንፓ ሱባ እዝፓ ደንዲ ታማርሶደስን ሳባኮደስ ጋልላ ካታማ ቅትዳ።
2 ዋሐንሳ አች ኬꬃ የዛራ ክርስቶሳ ኦችቶ ስእ፥ ፋ ታማሩንꬃፓ ኤጎ ኪቲ፥
3 «ዮኦዳ ጋእንትደ ነናነ? ዎይ ኑ መለ ካፎደ?» ጋእ ኦጭዳ።
4 የሱሳ ኡንታጎ ማህ፥ «Ꮉንግ ይን ስእደ ባዝን ይን ብእደባዝ ዋሐንሳስ ኦሆተ።
5 ቆቁንꬅ በእነ፥ ዎቡንꬅ የꬋነ፥ ቁርሱማ Ꮉርግንትዙንꬅ ጌዣነ፥ ቱሉንꬅ ስእነ፥ Ꮉይቂዱንꬅ Ꮉይቆፓ ደንዳነ፤ ዳሁንꬅስ ዎንገለ ሳባክንታነ።
6 ታራ ꬉቡንቶሰ አንጅንትዳያ» ያጋይዳ።
7 ዋሐንሳ ታማሩንꬅ ሱብ ማቂ Ꮉንግን፥ የሱሳ ዎርዡንꬅስ ዋሐንሳ ባዝ ኦህተራ፥ «Ꮉና አኮ ባይዘ ጋናሳ አኮ በአደስ ይእዳተ? ባቆ ኤንእዘ ሾምቦቆ በአደስ ይእዳተ?
8 ዬዝን፥ አኮ በአደስ ይእዳተ? ቦንቾ ማኦ ማእደ አሱንꬃና በአደስነ? ቦንቾ ማኦ ማእዱንꬅ ካት ካራ የነ።
9 ዬዝን፥ አኮ በአደስ ኬዝዶተ? ናበ በአደስነ? ዬ፥ ይን ናበፓን አꬍዛያ በእነ።
10 «ነ ኦግቶ ነ ቲንተ ጊግዘ
ታ ኪታንችዛ ኔፓ ቲኖ ኪቶዳ»
ጋእንት ጻፍንትዳና ኤስ።
11 ታ ይንትስ ቱሮ ኦህነ፤ ማችፓ የልንትዱንꬅ ግዳፓ ጻማቅዘ ዋሐንሳፓ ኣꬍዛ ኦንን ደንድካያ፤ የዝን ሳሎ ካእቱሞ ኡቡንꬃፓ ኤርዘ ኤ፥ ኤፓ አꬎዳ።
12 ጻማቅዘ ዋሐንሳ ዎደፓ ደንꬂ Ꮉይኖ የሎደስ ሳሎ ካእቱሞ ጋማ ኡርቂንታነ፥ ሚንግ ቡቱንትዙንꬅ ደንጎዳ።
13 ናቡንꬅ ኡቡንꬅ ህገን ዋሐንሳ ባዝ ትንቢተ ኦህዳ።
14 ይኬ፥ ይን ኡን ኪቶ አማኖደባዝ ማቅኮ፥ ዮኦዳ ጋእንትደ ኤልያሳ፥ ኤ ዋሐንሳ።
15 ይኬ፥ ስእዘ Ꮉየ የዘ ስኦ።
16 «ይኬ፥ ታኒ Ꮉና ዎደ የለቶ አኮራ አዝሳደ? ጋበ ግዳ በቲ ዎል ጼጊ፥
17 « ‹ኑ ይንትስ ሱሉንቀ ፉግን፤
ይን የጽካያ።
ኑ ናሺ ጋይርን፤
ይን ዬክካያ›
ያጋዘ ናኡንꬃና አዛነ።
18 ጻማቅዘ ዋሐንሳ ሙእካይዛራን ኡዥካይዛራ ይእን፥ ‹ቱና አያና የነ› ያጋይዳ።
19 አስ ናአይ ሙእተራን ኡዥተራ ይእን፥ ‹ዥምባራን ኡሽ አስ፥ ቃራጠ ጋችዙንꬅስን ናጋራንቹንꬅ እግና› ያጋይዳ። ይኬ፥ ጭንጫትꬅን ቱረትꬅ ኤ ኦችተ ቆንጫነ» ያጋይዳ።
አማናንጽ እጽደ ካታሙንꬃና
(ሉቃ. 10:13-15)
20 ይንፓ ሱባ፥ የሱሳ ጋማ ክሌ ባዝ ኦችደ ካታሙንꬅ ግዳ የዘ አሱንꬅ ፋ ናጋርትፓ ማቂ ማሮትꬅ ገላንጽ እጽደ ግሾ ኡንታና፥
21 «ባደ ክኦራዚነ ካታምተ፥ ባደ ቤተሳይዳ ካታምተ፥ አኮስ ጋይኮ፥ ይን ግዳ ኦችንትደ ክሌ ባዝ ጢሮሳ ግዳን ስዶና ግዳ ኦችንትደባዝ ማቅዛኮ፥ ኡን ዛጋ ቡዶ ትዥንት፥ ካዮ አፉላ ማእ ፋ ናጋርትፓ ማቂ አቶድ የሻ።
22 የዝን ታ ይንትስ ኦህነ፤ ፍርዳ ቃማ ይንታፓ አꬂ ጢሮሳስን ስዶናስ ፍርድታ ኤሮዳ።
23 ማህ፥ ቅፍርናሆመ፥ ኔኒ ኡደ ሳሎ ከዞደስ ኮያነ? Ꮉኖስ! ነ ስኦለ ኦልንቶዳ። አኮስ ጋይኮ፥ ነ ግዳ ኦችንትደ ክሌ ባዝ ሶዶማ ኦችንትደባዝ ማቅዛኮ፥ ሶዶማ Ꮉይኖ የሎደስ የሳድ የሻ።
24 የዝን ታ ኔስ ኦህነ፤ ፍርዳ ቃማ ኔፓ አꬂ ሶዶማስ ፍርዳ ኤሮዳ»።
ክርስቶሳ ግዳ የዘ ሸምፖ
(ሉቃ. 10:21-22)
25 የ ዎደ የሱሳ፥ «አዳዮ፥ ሳሎ ሳአ ላꬆ፥ ነ Ꮉኖ ኤሩንꬃፓን ጭንጩንꬃፓ አቺ ናኡንꬅስ ቆንጭዝደ ግሾ ነና ጋላታነ።
26 ዬ፥ ታ አዳዮ፥ Ꮉና ነ ሎኦ ቆፍት ፋና Ꮉንዳ።
27 «ኡባና ታስ ታ አደፓ እንግንትዳ። አዳይፓ መለ ናአያ ኤርዘ ባያ፥ ናአይፓን ኤ ቆንጮደስ ኮየዙንꬃፓ መለ አዳያ ኤሮደስ ዳንዳእዘ ባያ።
28 «ይን፥ ላቢዱንꬆ፥ ቶፎ ዴጽደ ኡቡንꬅ ታጎ Ꮉንካ ዮኦተ፤ ታ ይንታና ሸምፕሳዳ።
29 ታኒ ታ ዎዝንተ ዳልጋን አዳ ማቅደ ግሾ ታ ቃምባርቶ ቶኮተ፥ ታፓ ታማሮተ፤ ይን፥ ይን ሸምፕትስ ሸምፖ ደንጎዳ።
30 ታ ቃምባርታ ስላ፥ ማህ ታ ቶፍታን ፎሎ» ያጋይዳ።