ጳዉሎሳ ሮመ አሱንꬅስ
ጻፍደ ኪታ
ገለ
ሐዋረ ጳዉሎሳ ኪታ ሮመ አሱንꬅስ ጻፍዳና፥ ጳዉሎሳ ሮመ የዘ ዎሳ ኬꬂ በአደስ ቆፕደ ግሾ ኤ Ꮉንግዘ ዎደ ኡን ጊጊ ናጎደ ፋና ኦቾደስ። ጳዉሎሳ ቆፍታ ሮመ የዘ አማንዙንꬃራ ኤራꬅ ዎደ ኦችደፓ ሱባ ኡን ኤዛ ማድን እስፔነ Ꮉንጎደስ። አማኖ ባዝ ኤ ኤርዳኖን አማንዘ አሱንꬃና ይና ትምርትቶ ኦቻላ ፌሾደ ፋና ቆንጭዝ ጻፍዳ። Ꮉና ማጻፍተ ጳዉሎሳ ኩሙꬅ ኪታ Ꮉና ቆፍቶ አይክዳ።
ጳዉሎሳ ሮመ የዘ አማንዘ አሱንꬃና ቲኖ ሳርꬅ ማቂ፥ ካሊ ኡንትስ ዎስዛኖ ኦህደፓ ሱባ ፋ ኪትስ ግዳ ቆፋ፥ «ዎንገልተ ጾዘ ጽሎትꬅታ ቆንጭዳ፤ ይና ጽሎትꬅታ ቲኖፓ ዉርሱꬅ የሎደስ አማኖራ ቆንጭዳ» ጋእ ኦህነ (1:17)።
ይንፓ ሱባ፥ ይና ቆፍቶ ዳልግዚ ጻፋነ። አይሁዱንꬃና ማቅን አይሁደ ማቆሰ አሱንꬃና ማቅን ኡቡንꬅ ናጋራስ አቅዱንꬃና ማቅደ ግሾ ኡን ጾዛራ ጊጎደስ ቤዛነ። አስ ጾዛራ ጊጎደስ ዳንዳእዛና የሱስ ክርስቶሳ አማኖራ። ኡን ጾዛራ መꬍዘ Ꮉና ክለ የልንተ ኣፍታ፥ ክለ ደኦ ማቅዛኖ ጳዉሎሳ ዳልግዚ ኦህነ። አማንዘ አስ ጾዛራ ሳሮ የነ፤ ማህ ጾዘ አያና ባጋራ ናጋራፓን Ꮉይቆ ዎልቃፓ ኬሲ ኤክዳ። ዞፋነ 5-8 የሎደስ ጳዉሎሳ ጾዘ ህግቶን አማንዘ አሱንꬅ ደእተ ኦችዘ ጾዘ አያና ዎልቃ ቆፍታ አኮ የዛኮ ኦህነ። ይንፓ ካሊ፥ ጳዉሎሳ፥ «ጾዚ አስ ናኡንꬅስ ቆፕደ ቆፍት ግዳ አይሁዱንꬃናን አይሁደ ማቆሰ አሱንꬅ ዋይዝ ይእ ፈትላ ዋጽንቶደስ ዳንዳኤ?» ያጋዘ ኦጭትስ ማል እንጎደስ ቡቱንትዳ።
ማህ አይሁዱንꬅ የሱሳ ኤካንጽ እጽዳና ጾዘ ቆፋ ማቅካይዛኖ ኦህነ። ይና Ꮉንዳና የሱስ ክርስቶሳ ባጋራ ቆንጭደ አꬎ ኬሃትꬅ ግዳ አስ ኮች ኡባ ኤክንቶደ ፋና። ማቆ የዝን፥ አይሁዱንꬅ የሱሳ ኤኮደ ዎደ ዮኦዳኖ ጳዉሎሳ አማናነ። ዉርሱꬅተ ጳዉሎሳ አማኖ ደኦ ዋይዝ የሳደስ ቤዛኮ ኦህነ። ጾዝስ ኦቾደ ባዝ፥ አማንዘ አሱንꬅ ፋ ካትስን ፋ ግዳ ፈታይ ፈታይስ አዳትꬃራ ኦቾደባዝን ዎዝና ጋꬃ መꬍንትደ ኦጭዘባዝ ቆንጭዝ ኦህነ።
ኣፈ ቆፉንꬅ
ገለ ቆፋ 1:1-15
ሮመ ኪታ ኦማ ቆፋ 1:16-17
አስ ናአስ አቶትꬅ ኮሹዛኖ 1:18—3:20
ጾዘ አስ አሽዘ ኦገ 3:21—4:25
ክርስቶሳ ግዳ በንትዘ ክለ ደኦ 5:1—8:39
እስራኤለስ ጾዘ ቆፋ 9:1—11:36
አማንዘ አሱንꬅ የስ 12:1—15:13
ጻꬅ ቆፋን ሳር 15:14—16:27
1
1 የሱስ ክርስቶሳ አሮ ማቅደ፥ ሐዋረ ማቃደ ጋራ ጼግንትደፓን ጾዘ ዎንገለ ሳባኮደ ጋራ ዶርንትደ ጳዉሎሳ ኪትደ ኪታ።
2 ጾዚ ጋማ ዎደፓ ቲኖ ፋ ናቡንꬅ ባጋራ እንጎዳ ያጋይደ ጾዘ ጌሽ ማጻፍተ ጻፍንትዳ።
3 Ꮉይ ዎንገልዘ አሾራ ዳዉተ ኮቻፓ የልንትደ፥ ጾዘ ናአ፥ ኑ ላꬄ የሱስ ክርስቶሳስ።
4 ማህ ኤ ፋ ጌሽ አያናራ Ꮉይቆፓ ደንዲ፥ ጾዘ ናአ ማቅዳኖ ዳማ ዎልቃራ ቤዝዳ።
5 ኤ ባጋራ አይሁደ ማቆሰ አሱንꬅ ኡባ፥ አማኒ ኪትንቶደ ጋር ክርስቶሳ ሱንꬅት ግሾ ጾዘ አꬎ ኬሃትꬅን ሐዋረትꬅ አደትꬅ ዎልቃ ኑ ኤክዳ።
6 የሱሳ ክርስቶሳስ ማቃደ ፋና ጼግንትደ አሱንꬃፓ ባጉንꬅ ይንታና።
7 ሮመ የዘ፥ ጾዚ ይቅስንትዙንꬃና ኤስ ጌሽ ዎርዣ ማቃደ ፋና ዶርዱንꬅስ።
ጾዘ ኑ አደፓን ላꬄ የሱስ ክርስቶሳፓ አꬎ ኬሃትꬅን ሳሮትꬅ ይንትስ ማቀ።
ጋላታን ዎሳ
8 ኡባፓ ቲኒ፥ ይን አማንታ ሳአ ኡባ ስንትደ ግሾ የሱስ ክርስቶሳ ባጋራ ይን ግሾ ታ ጾዛ ጋላታነ።
9 ታኒ ኤ ናአይ ዎንገለባዝ ኩሙꬅ ዎዝንተ ኦህዘ ጾዘ፥ ታኒ ታ ዎስተ ኡባ ዎደ ይንታና ቆፕዛንስ ኤ ማርካ።
10 ዉርሱꬅተ፥ ጾዘ ቆፋ ማቅኮ፥ ታኒ ይንታጎ Ꮉንጎደስ ኦገ ታስ ጊጎደ ፋና ኡባ ዎደ ዎሳነ።
11 ታኒ ይንትስ አያና አንጆ ሻኮደስን ይንታና በአደስ አሙꬋነ።
12 ይናን፥ ታኒ ይን አማንተን፥ ማህ ይን ታ አማንተ ምንጎደ ፋናስ።
13 ታ እሹንꬆ፥ ታኒ አይሁደ ማቆሰ አሱንꬃፓ ኣፈ ደንግዳን ፋና፥ ይንታፓን ኣፈ ደንጎደስ ይንታጎ Ꮉንጎደስ ቆፕዳ፥ የዝን ካይንትዳ።
14 ግርኬ አሱንꬅስን ግርኬ ማቆሰ አሱንꬅስ ማህ ጭንጩንስስን ቦዙንꬅስ ታስ ጋለ የነ።
15 ይኒ ግሾ፥ ሮመ የዘ ይንትስን ዎንገለ ኦሆደስ አሙꬋነ።
ዎንገለ ጾዘ ዎልቃ
16 ቲንꬊ አይሁዱንꬃና፥ ማህ አይሁደ ማቆሱንꬃናን አማንዘ ኡቡꬃና አሾደስ ዎንገለ ጾዘ ዎልቃ ማቅደ ግሾ ታ ዎንገለራ ዬልꬎኦስ።
17 ጽሎ አማኖራ ደኦ የሳዳ ጋእንት ጌሽ ማጻፍተ ጻፍንትዳ። ዎንገለ ጾዘ ጽሎትꬅቶ ቆንጭዝዳ፤ ቲኖፓ ዉርሱꬅ የሎደስ አስ ጽልꬍዘ አማኖራ።
አሱንꬅ ኢታትꬅ
18 ቱርታ ኤርንታመ ፋና ፋ ኢታ ኦቻራ ካምዘ አሱንꬃላ አፋ ናጋራ ኡባላ አፋ፥ ጾዘ Ꮉንቆ ሳሎፓ ዎꬎዳ።
19 ጾዚ ኡንትስ ቆንጭሳደስ ቤዘባዝ ቆንጭዝደ ግሾ ኡን ጾዘ ባዝ ኤራነ።
20 አላመ መꬍንትደፓ ደንꬂ፥ አስስ በንቶሰ ጾዘ Ꮉኖ፥ ይናን ኤ መዽና ዎልቃን ጾዘትꬅ ኤ መትꬅተ ቆንጪ የዘ ግሾ አሱንꬅ ፋ ኢታትꬅትስ ምክናተ ማቅዘ ባዝ ባያ።
21 ኡን ጾዛ ኤርተራ፥ ኤዛ ቦንችካያን ጋላትካያ። ኡን ቆፍታ ማዶሰ ባዝ ማቅዳ፤ ኡን ቆፖሰ ዎዝንታ ꬉምዳ።
22 ኡን ፋና ጭንጩንꬃና ጋነ፥ የዝን ቦዙንꬃና።
23 ኡን Ꮉይቆሰ ጾዛ ጎይኖዳኖ አሺ፥ Ꮉይቅዘ አስ መꬎን፥ ላንዳን፥ ጾꬅን ሳዛራ ጎቹንትዘ ባዝ አዝዝ መꬍደ ምስለ ጎይናነ።
24 ይኒ ግሾ፥ ኡን ፈታይ ፈታይራ ኢታ ባዝ ኦቺ፥ ፋ ጋልቶ ካዉሾደ ጋር ጾዚ ኡን ዎዝንቶ አሙꬍዘ ቱና ኦቻስ ኡንታና ኦልዳ።
25 ይና Ꮉንዳና ኡን ጾዘ ቱርቶ ዎርዶ ላምደ ግሾን መꬍደ ጾዛ አሺ፥ መꬍንትደ ባዝ ጎይንደ ግሾ። ጾዚ መዽናስ ጋላትንትዳ። አምንኤ።
26 ይኒ ግሾ፥ ጾዚ ኡንታና ቱና አሞትꬅስ አꬂ እንግዳ። ኡን ማቹንꬅ ፋስ ቤዝዘ ꬊራꬃራ የልንትዛኖ አሺ፥ ቤዞሰ ባዝ Ꮉኒ ማቻ ማችራ የልንታነ።
27 ይኒ ጋር፥ ꬊራꬅ ፋስ ቤዝዘ ማችራ የልንትዛኖ አሺ፥ ꬊራꬅ ꬊራꬃራ የልንታነ። ꬊራꬁንꬂ ፈታይ ፈታይራ አሞትꬃራ ኤጽንቲ፥ ዬልዘ ባዝ ኦችዳ። ፋ ኦችደ ባላ ኦችትስ ቤዝዘ ፍርዳ ኤክዳ።
28 ኡን ጾዛ ኤርተራ፥ መለ አቶ የዝን ኤ ባዝ ቆፖደስ ኮያንጽ እጽደ ግሾ ቤዞሰ ባዝ ኦቾደ ጋር ጾዚ ኡንታና ማዶሰ ቆፋስ አꬂ እንግዳ።
29 ኡን ቆሄራ፥ ኢታትꬃራ፥ ዥምባራራ፥ ገነራ፥ ቅናተራ፥ ሸምፖ ዎራ፥ ላለራ፥ ጭሞራን ኢታ አሞራ ኩምዳ። ኡን ዝግርዙንꬃና፥
30 አስ ሱንꬅ ኢስዙንꬃና፥ ጾዝ እጽዙንꬃና፥ ጫዥዙንꬃና፥ ኡትርዙንꬃና፥ ጬቅዙንꬃና፥ ኢታ ባዝ ኦቾደስ ኮይዙንꬃና ፋ አዳይስን እንትስን ኪትንቶሱንꬃና፥
31 ቲሮሱንꬃና፥ ቃላ ላምዙንꬃና፥ ሲቆ ባይዙንꬃና፥ ይቅስሞ ባይዙንꬃና።
32 Ꮉንስ ፋና ኦችዙንꬅስ Ꮉይቆ ቤዛነ ጋዘ ጾዘ ህገ ኤርተራ፥ Ꮉኖ ኦቻነ። ኡን ፋ ፋስ ኦችዛኖ ጻላላ ማቅካይዝን ኦችዘ መሉንꬃናን ልከ ጋእ ናሻነ።