138
Tanksgivin Prayer
David Song
1 My God, I tank Yu with all my heart;
I go sing yor praiz for where evry oda gods dey.
2 I bow kon woship Yu for yor holy temple.
I dey praiz yor name,
bikos of yor faithfulnes and love wey nor dey fail;
bikos Yu don make yor promise and e high pass di sky.
3 Wen I pray, na wons Yu dey ansa mi!
Yu enkourage mi kon give mi strent.
4 My Oga God, di king for di whole eart go tank Yu,
bikos all of dem go hear yor words.
5 Yes! Dem go sing about God ways,
bikos en glory dey great well-well.
6 Even doh God dey great,
E dey kare for di pipol wey dey honbol demsef,
but doz wey dey karry body up, e dey give dem shance.
7 Even doh trobol gada round mi,
Yu still kom save mi.
Yu protet mi from my enemies wey dey vex for mi
and yor rite hand kon save mi.
8 God go fight for mi.
My Oga God, yor love wey nor dey fail, go dey forever,
so make Yu nor rijet di pipol wey Yu kreate by yorsef.