Es 11. Gabiddel.
1 Da Hah hast en vohk es uneahlich veekt,
avvah en eahlich gvicht is eem kfellich.
2 Vo shtolsheit is dann kumd glei shohm,
avvah veisheit is bei di daymeedicha.
3 Iahra unshuld fiaht di ufrichticha,
avvah iahra falshheit bringd di uneahlicha zu nix.
4 Feel geld helft nix am dawk fumm zann,
avvah gerechtichkeit hald dich aus di kfoah fumm doht.
5 Di gerechtichkeit funn di unshuldicha macht iahra vayk grawt,
avvah di gottlohsa falla bei iahra aykni ungettlichkeit.
6 Di gerechtichkeit funn di ufrichticha hald si aus di kfoah,
avvah di uneahlicha vadda kfanga bei iahra ayknah lusht.
7 Vann da gottlohs mensh shtaubt, dann is sei hofning faloahra,
di graft es eah sich falossa hott druff kumd zu nix.
8 Da gerecht mensh is aus di kfoah kalda funn druvvel,
un's kumd uf da gottlohs in seim blatz.
9 Da gottlohs mensh kann sei nochbah zu nix bringa mitt seim maul,
avvah deich eisicht doon di gerechta sich aus di kfoah halda.
10 Vann alles goot gayt mitt di gerechta, dann dutt di shtatt sich froiya,
un vann di gottlohsa umkumma, greisha di leit mitt frayt.
11 Da sayya funn di ufrichticha baut di shtatt uf,
avvah deich's maul funn di gottlohsa is see nunnah grissa.
12 En unksheidah mensh dutt sei nochbah nunnah,
avvah en ksheidah mensh bleibt shtill.
13 Ebbah es kshvetzah drawkt hald sacha nett ruich,
avvah ebbah es gedraut sei kann hald sei maul ruich.
14 Vo's kenn goodah roht hott, dann gayn di leit unnah,
avvah vo feel roht-gevvah sinn, datt sinn di leit aus di kfoah.
15 Veah goot shtayt fa en fremdah sei shulda, een zayld's shpeida,
avvah sellah es nett gleicht goot shtay fa ebbah, is bessah ab.
16 En goot-maynichi fraw grikt eah,
avvah unfashtendlichi mennah vadda yusht reich.
17 En bamhatzichah mann dutt sich selvaht goot,
avvah en unfashtendlichah mann dutt sich shawda.
18 En gottlohsah mensh fadeend lohn es nix veaht is,
avvah veah gerechtichkeit sayt, grikt en goodah lohn.
19 Veah shtandhaftich is in gerechtichkeit zayld layva,
avvah veah evil nohch gayt kumd um.
20 Da Hah hast mensha mitt falshi hatza,
avvah eah hott frayt mitt selli es unshuldich lawfa.
21 Du kansht dich falossa druff es di gottlohsa nett unkshtrohft gayn,
avvah selli es gerecht sinn vadda frei ksetzt.
22 Vi en goldichah ring in en sau iahra shnaut,
so is en shayni fraw unni goodah fashtand.
23 Vass gerechti leit vinsha shaft goot aus,
avvah di hofning funn di gottlohsa end in zann.
24 Ay-ebbah gebt geahn, un grikt yusht noch may;
en anrah haybt zrikk vass eah gevva sett, un vatt yusht noch oahmah.
25 Veah reichlich gebt, zayld goot ab sei,
un veah anri reichlich gebt zu drinka, zayld selvaht nett fadashta.
26 Ebbah es frucht zrikk haybt vatt faflucht bei di leit,
avvah sayya kumma uf sellah es es fakawft.
27 Veah goodes sucht, deah grikt goodes,
avvah veah evil sucht, deah grikt evil.
28 Veah sich falost uf sei feel geld zayld falla,
avvah di gerechta zayla vaxa vi en greeni blatt.
29 Veah druvvel in sei ayya haus bringd, zayld da vind eahva,
un da unksheit zayld en gnecht sei zumm mann mitt veisheit.
30 Di frucht funn di gerechta is en bohm funn layva,
un veah mensha sayla sammeld, hott veisheit.
31 Vann di gerechta greeya vass zu eena heaht uf di eaht,
vi feel may doon di gottlohsa un di sindah.