Es 12. Gabiddel.
1 Ennich ebbah es eisicht leeb hott, gleicht recht ksetzt sei,
avvah ennich ebbah es nett gleicht recht ksetzt sei is dumm.
2 En goodah mann is kfellich zumm Hah,
avvah eah fadamd da mann es evil im sinn hott.
3 En mensh is nett shtandhaftich gmacht deich ungerechtichkeit,
avvah di vatzla funn di gerechta kenna nett raus gezowwa sei.
4 En goodi fraw is vi en krohn zu iahra mann,
avvah ayni es een fashohmd is vi grebs in sei gnocha.
5 Di gedanka es di gerechta henn sinn recht,
avvah da roht funn di gottlohsa is fafiahrich.
6 Di vadda funn di ungettlicha sinn en fall fa bloot fageesa,
avvah's maul funn di ufrichticha macht si frei.
7 Di gottlohsa vadda kshtatzt un zayla nimmi sei,
avvah's haus funn di gerechta shtayt shtandhaftich.
8 En mann vatt glohbt fa sei veisheit,
avvah en mann mitt en fashtatzti meind vatt fa'acht.
9 'Sis bessah fa nett hohch ohksenna sei mitt yusht ay gnecht,
es vi ebbah es grohs sei vill avvah eah hott kenn broht.
10 En gerechtah mann gebt acht uf sei fee,
avvah's hatz funn di gottlohsa is nett bamhatzich.
11 Veah-evvah es sei land shaft, zayld feel broht havva,
avvah veah unaydichi sacha nohch gayt, is nett shmeaht.
12 Di gottlohsa sucha yusht fa shawda du,
avvah di vatzel funn di gerechta bringd frucht.
13 En evilah mann vatt kfanga in sei aykni falshi vadda,
avvah di gerechta halda sich aus druvvel.
14 Feel goodes kumd zumm mann deich di frucht funn seim maul,
un deich di eahvet funn sei hend grikt eah vass eah fadeend hott.
15 Da unksheit mensh maynd sei ayknah vayk is recht,
avvah ebbah mitt veisheit nemd roht.
16 Vann en unksheidah mensh zannich vatt, veist eah's grawt,
avvah en shmeahdah mann fa'acht's vann ebbah veesht shvetzt zu eem.
17 Veah di voahheit sawkt, sawkt vass recht is,
avvah en falshah zeiyah sawkt leeya.
18 Vadda es zu kshvind kshvetzt sinn, shtecha vi en shvatt,
avvah di zung funn selli mitt veisheit, bringd hayles.
19 Leftz es di voahret sawwa, bleiva fa'immah,
avvah en zung es leekt, shtayt nett lang.
20 Selli es evil im sinn henn, henn falshi hatza,
avvah selli es goodes im sinn henn, henn fridda.
21 Nix shlechtes kumd ivvah di gerechta,
avvah di gottlohsa henn nix es druvvel.
22 Da Hah hast meilah es leeya,
avvah eah hott frayt mitt di shtandhafticha.
23 En shmeahdah mann hald zu sich selvaht vass eah vayst,
avvah en dummah mann veist vi dumm es eah is.
24 Di fleisich hand zayld roola,
avvah en faulah mensh vatt en gnecht.
25 En engshtlich hatz drikt en mann nunnah,
avvah en freindlich vatt gebt eem frayt.
26 Da gerecht is bessah ab es sei nochbah
avvah da vayk funn di gottlohsa dutt si fafiahra.
27 Da faul mann kocht's flaysh nett es eah fangd,
avvah da shtandhaftich mann gebt acht uf sei sach.
28 Im vayk funn gerechtichkeit is layva,
un in selli pawt is kenn doht.