Es 13. Gabiddel.
1 En boo mitt veisheit heicht ab vass sei faddah eem sawkt,
avvah en shpoddah nemd di shtrohf nett oh.
2 Di frucht funn en mann sei maul gebt eem goodi sacha,
avvah selli es fafiahra, vella yusht fechta.
3 Veah sei maul heet, hald sei layva aus di kfoah,
avvah veah sei kshvetz nett heet, kumd zu nix.
4 En faulah mann vill sach havva un eah grikt nix,
avvah di fleisicha greeya vass si vella.
5 Di gerechta hassa vass falsh is,
avvah di gottlohsa bringa shohm un shanda.
6 Di gerechtichkeit heet di ufrichticha,
avvah ungettlichkeit macht di sindah falla.
7 Ay mann lost oh eah is reich, un hott nix,
avvah en anrah lost oh eah is oahm, un is oahrich reich.
8 En reichah mann kann sei layva aus di kfoah kawfa,
avvah di oahma henn nix fa betzawla.
9 Es licht funn di gerechta brend fraylich,
avvah's licht funn di gottlohsa gayt aus.
10 Unnich di shtolsa is immah shtreit,
avvah veisheit is kfunna bei selli es roht nemma.
11 Reichheit es letz grikt voah, vatt vennichah un vennichah,
avvah ebbah es geddaht bei shaffa macht's vaxa.
12 Hofning es voahra muss, gebt em hatz angsht,
avvah en falanga es folfild is, is vi en bohm funn layva.
13 Veah's vatt fa'acht, bringd sich selvaht zu nix,
avvah veah's gebott fircht, grikt en fadeensht.
14 Di lanning es gevva is bei selli mitt veisheit, is en shpring funn layva,
un hald ebbah aus em fang-shtrikk fumm doht.
15 Goodi eisicht vatt hohch ohksenna,
avvah da vayk funn di gottlohsa is hatt.
16 En fashtendlichah mann dutt alles mitt eisicht,
avvah da unksheit mann veist vi dumm es eah is.
17 En gebodda-drawwah es nett gedraut sei kann, grikt leit in druvvel,
avvah aynah es gedraut sei kann bringd hayles.
18 Veah's nett ohnemd vann eah recht ksetzt vatt, hott oahmoot un shanda,
avvah sellah es es ohnemd is hohch ohksenna.
19 Vann en falanga folfild vatt, is es blesiahlich zumm hatz,
avvah unksheidi leit gleicha sinda nett falossa.
20 Veah mitt mennah funn veisheit lawft, grikt veisheit,
avvah veah rumm gayt mitt di unksheida dutt sich selvaht vay.
21 Druvvel gayt sindah nohch,
avvah di gerechta vadda zrikk betzawld mitt goodi sacha.
22 En goodah mann lost en eahbshaft zu sei kinds-kinnah,
avvah di reichheit funn di sindah gayt zu di gerechta.
23 Di oahma iahra feldah gevva feel ess-sach,
avvah deich unrecht vatt's vekk gnumma.
24 Veah da shtekka shpoaht mitt seim boo hast een,
avvah veah een leeb hott macht een heicha.
25 Da gerecht hott genunk zu essa fa een satt macha,
avvah da bauch fumm gottlohsa gayt hungahrich.