Es 14. Gabiddel.
1 Di fraw mitt veisheit baut iahra haus uf,
avvah en unksheit veibsmensh fadaubt iahra's bei vass see dutt.
2 Sellah es ufrichtich lawft fircht da Hah,
avvah sellah mitt grummi vayya fa'acht een.
3 Es kshvetz fumm unksheida is en shtekka fa sei shtolsheit shtrohfa,
avvah's kshvetz funn selli mitt veisheit hald si aus di kfoah.
4 Vo kenn oxa sinn, datt is da frucht-kashta leah,
avvah funn di graft fumm ox kumd en grohsi eahn.
5 En shtandhaftichah zeiyah dutt nett leeya,
avvah en falshah zeiyah dutt immah leeya.
6 En shpoddah sucht fa veisheit un find see nett,
avvah eisicht kumd kshvind zu di ksheida.
7 Hald dich vekk fumm unksheida mann,
fa du griksht kenn eisicht funn sei vadda.
8 Ebbah es veisheit hott, hott di gawb fa da recht vayk gay,
avvah unksheidi leit fafiahra sich selvaht un gayn letz.
9 Unksheidi leit macha en kshpott funn sinda,
avvah ufrichtichi leit sinn froh fa fagevva sei.
10 Es hatz laynich vayst sei aykni dreebsawl,
un nimmand shunsht kann en dayl havva fumm hatz sei frayt.
11 'S haus fumm gottlohsa vatt zammah grissa,
avvah da tent fumm ufrichticha bleibt shtay.
12 Es is en vayk es recht seemd zumm mensh,
avvah im end fiaht's zumm doht.
13 Even vann ebbah lacht, kann sei hatz am vay du sei,
un frayt kann uf enda in dreebsawl.
14 Di gottlohsa vadda zrikk betzawld fa iahra vayya,
avvah en goodah mann zayld zufridda sei mitt seini.
15 En mann es nett zu shmeaht is glawbt ennich ebbes,
avvah en begawbdah mann denkt an vass eah am du is.
16 En mann mitt veisheit gebt acht un drayt vekk funn evil,
avvah en dummah mann gebt nix drumm un is unbekimmaht.
17 En mann es kshvind bays vatt dutt dummi sacha,
un en shlichtichah mann vatt kast.
18 Di dumma eahva yusht noch may dumheit,
avvah selli mitt veisheit sinn gekrohnd mitt eisicht.
19 Evili leit zayla sich nunnah bikka fannich di gooda leit,
un di gottlohsa an di deahra funn di gerechta.
20 Di oahma sinn nunnah gedu even bei iahra nochbahra,
avvah di reicha henn feel freind.
21 Sellah es nunnah gukt uf sei nochbah, sindicht,
avvah sellah es bamhatzich is zu di oahma is ksaykend.
22 Selli es im sinn henn fa evil du gayn ab funn di pawt,
avvah selli es im sinn henn fa goot du, finna leevi un shtandhaftichkeit.
23 Selli es hatt shaffa greeya ebbes gedu,
avvah selli es yusht shvetza diveyya vadda oahm.
24 Da krohn funn selli mitt veisheit is iahra reichheit,
avvah di dumheit fiaht yusht zu noch may dumheit.
25 En eahlichah zeiyah kann ebbah fumm doht halda,
avvah en falshah zeiyah is zvay-ksichtich.
26 Sellah es da Hah firchta dutt hott en shteikah glawva,
un sei kinnah vadda aus di kfoah kalda.
27 Di furcht fumm Hah is en shpring funn layva,
un hald ebbah aus em fang-shtrikk fumm doht.
28 Vann en kaynich feel leit hott, hott eah grohsi hallichkeit,
avvah unni feel leit kumd eah zu nix.
29 Ebbah es nett kshvind bays vatt hott veisheit,
avvah ebbah es kshvind bays vatt veist vi dumm es eah is.
30 En meind es fridda hott, gebt em leib ksundheit,
avvah fagunsht fafauld di gnocha.
31 Veah-evvah es di oahma nunnah drett, leshtaht Sellah es si gmacht hott,
avvah ebbah es bamhatzich is zu selli in noht, eaht Gott.
32 Da gottlohs bringd sei ayknah nunnah-fall bei's evil es eah dutt,
avvah even im doht sinn di gerechta gedrohsht.
33 Di veisheit is im hatz funn selli mitt eisicht,
un even zu di unksheida macht see sich bekand.
34 Gerechtichkeit haybt en folk uf,
avvah sinda bringa en shohm zu ennichi leit.
35 En kaynich hott frayt mitt en gnecht es veisheit hott,
avvah en shandlichah gnecht macht een bays.