Es 5. Gabiddel.
Vanning Geyyich Aybrecha
1 Mei kind, nemm acht funn mei veisheit,
un heich ab vass ich dich lann,
2 so es du vaysht vi fa dich oh zu shikka,
un di vadda funn dei leftz eisicht veisa.
3 Di leftz funn en anrah mann sei fraw sinn sees vi hunnich,
un iahra kshvetz is gladdah es ayl.
4 Avvah am end is see biddah vi gall,
un bringd shmatza vi en zvay-shneidich shvatt.
5 Iahra fees gayn nunnah zumm doht,
un iahra foos-dredda gayn grawt an's grawb.
6 See denkt nett an da vayk funn layva,
iahra pawda sinn grumm, avvah si vayst's nett.
7 Nau dann, mei kinnah, heichet mich ab,
un drayyet nett vekk funn di vadda es ich sawk.
8 Hald dich veit vekk funn so en fraw,
gay nett nayksht an di deah funn iahra haus,
9 so es du dei eah nett gebsht zu anri,
un dei yoahra zu di unbamhatzicha,
10 un so es fremdi dei graft nett greeya,
un vass du kshaft hosht difoah nett gayt zu anri.
11 Am end funn deim layva zaylsht du yammahra,
vann dei leib un layva fagayn.
12 Du zaylsht sawwa, “Vi oahrich habb ich kast recht ksetzt sei;
mei hatz hott zankes nunnah gedrayt.
13 Ich habb di shtimm funn mei teetshahs nett abkeicht,
un habb mich nett bekimmaht mitt vass si mich lanna henn vella.
14 Mei nohma is shiah goah zu nix kumma
fannich di gans fasamling.”
15 Dei fraw is vi en brunna mitt frish vassah,
drink vassah funn dei ayknah brunna un sistahn.
16 Sedda dei shpringa ivvah-lawfa in di shtrohsa,
un's vassah in da shtatt-shkveah?
17 Dee sacha sinn fa dich laynich,
un nett fa anri es fremd sinn.
18 So sei zufridda un ksaykend mitt deim brunna,
un froi dich mitt di fraw es du yung keiyaht hosht.
19 Si is leeblich un shay vi en hash,
loss iahra leevi dich gans zufridda macha,
loss iahra leevi dich fanga un dich hayva.
20 Mei kind, favass setsht du uf gnumma sei mitt en aybrechichi fraw?
Favass setsht du en anrah mann sei fraw in dei eahm nemma?
21 Fa yaydah mann sei vayya sinn uf fannich em Hah,
un eah vatsht awl sei pawda.
22 Di sinda funn en gottlohsah mann fanga een,
un eah vatt kohva mitt di shtrikk funn sei sinda.
23 Eah zayld shteahva veil eah sich nett selvaht meishtahra dutt,
un eah faliaht sei vayk deich sei aykni dumhayda.