Es 6. Gabiddel.
May Vanninga
1 Mei kind, hosht du fashprocha fa goot shtay fa dei nochbah?
Hosht du dei vatt gevva fa ebbah shunsht?
2 Voahsht du kfanga bei dei aykni vadda,
un bei vass du fashprocha hosht?
3 Dann du dess, mei kind, fa dich frei macha,
fa du bisht unnich deim nochbah sei hand kumma.
Daymeedich dich,
gay un hald oh dei nochbah bidda;
4 Alawb dei awwa nett eishlohfa,
un loss dei awwa-dekkel nett zu gay.
5 Mach dich frei vi en hash fumm hundah sei hand,
vi en fokkel aus di hand fumm fangah.
6 Gay zu di ummensa, du faulah mensh,
gukk an iahra vayya, un lann!
7 Si henn kenn ivvah-saynah,
kenn evvahshtah adda roolah.
8 Avvah doch doon si ess-sach shtoahra im summah,
un geddahra iahra ess-sach an di eahn.
9 Vi lang zaylsht du datt leiya, du faulah mensh?
Vann shtaysht du uf fumm shlohf?
10 Yau, noch en vennich shlohfa, noch en vennich leiya bleiva,
noch vennich di hend zammah du—
11 no kumd di oahmoot uf dich vi en rawvah,
un du hosht nix, grawt es vann du grawbt gvest veahsht.
12 En gottlohsah un nix-nutzichah mensh,
gayt rumm un sawkt leeya.
13 Eah blinkt sei awk, un gebt signs mitt sei fees,
eah mohshend mitt sei fingah,
14 diveil es eah am sich rishta is fa evil du mitt falshheit im hatz,
un fa shtreit shtroiya.
15 Fasell kumd druvvel uf een, bletzlich unni vanning;
uf aymol kumd fadauves uf een es nett kayld sei kann.
16 Es sinn sex sacha es da Hah hast,
un sivva es eah nett shtenda kann:
17 Shtolsi awwa, falshi zunga,
hend es unshuldich bloot fageesa,
18 en hatz es evili sacha shkeemd,
fees es kshvind shpringa fa shawda du,
19 En falshah zeiyah es leekt,
un ebbah es druvvel uf shtatt unnich breedah.
20 Mei kind, hald deim daett sei gebodda,
un gay nett geyyich vass dei maemm dich gland hott.
21 Binn iahra lanning immah uf dei hatz,
henk si um dei hals rumm.
22 Vann du lawfsht, gayn si diah foah,
vann du shlohfsht, vatsha si ivvah dich,
un vann du uf veksht, shvetza si zu diah.
23 Fa dee gebodda sinn en licht, es ksetz is helling,
un di famohninga fa recht do sinn da vayk fumm layva.
24 Si halda dich vekk funn en sindlich veibsmensh,
funn di glatt zung funn di aybrechich fraw.
25 Du nett lushta in deim hatz noch iahra shayheit,
un loss see dich nett fanga mitt iahra awwa-dekkel.
26 Fa en huah lost ebbah mitt yusht ay layb broht,
un en aybrechichi fraw nemd eem sei layva vekk.
27 Kann en mann feiyah drawwa in sei shohs,
un sei glaydah doon nett fabrenna?
28 Kann en mann uf haysi kohla lawfa,
unni sei fees fabrenna?
29 So is sellah es zu seim nochbah sei fraw gayt,
nimmand es si ohraykt zayld unkshtrohft bleiva.
30 Leit gukka nett hatt nunnah uf en deeb vann eah hungahrich is un shtayld
fa ebbes zu essa.
31 Doch vann eah kfanga vatt, muss eah sivva mohl so feel zrikk gevva;
eah muss alles gevva es eah hott in seim haus.
32 En mann es di ay brecht mitt en fraw, is nett oahrich ksheit;
eah dutt sei layva selvaht fadauva.
33 Eah vatt vay gedu un vatt fashand,
un sei shand vatt nett ausgrivva.
34 Fa en mann es jealous is veyyich sei fraw, vatt oahrich bays,
un is nett bamhatzich vann eah zrikk betzawld.
35 Eah zayld kenn geld nemma difoah,
un zayld nett zufridda sei even mitt feel kshenkah.