Es 5. Gabiddel.
Da Yung Mann
1 Ich binn in mei goahra kumma, mei shveshtah, mei hochtzich-maydel;
ich habb myrrhe un shpeis zammah ksammeld.
Ich habb mei hunnich-rohsa un mei hunnich gessa,
un habb mei vei un millich gedrunka.
Di Yunga Mayt
Esset, diah es unsah freind sind;
drinket biss diah foll sind, diah es nannah leeb hend.
Es Yung Maydel
2 Ich habb kshlohfa avvah mei hatz voah vakkah.
Heich moll! Mei beleebdah is am ohglobba:
Da Yung Mann
Mach uf, mei shveshtah, mei beleebdi,
mei daub unni faylah in sich.
Mei kobb is nass fumm dau
un mei hoah funn di feicht funn di nacht.
Es Yung Maydel
3 Ich habb mei glaydah shund ausgedu,
favass sett ich si viddah ohdu?
Ich habb mei fees shund gvesha,
favass sett ich si viddah drekkich macha?
4 Mei beleebdah hott sei hand rei kshtekt deich's deah loch;
mei hatz hott ohkfanga globba fa een.
5 Ich binn ufkshtanna fa uf macha fa mei beleebdah,
mei hend henn gedrobst mitt myrrhe,
mei fingah voahra nass mitt myrrhe,
vi ich di deah uf gmacht habb.
6 Ich habb uf gmacht fa mei beleebdah,
avvah mei beleebdah voah nimmi datt.
Mei hatz voah bedreebt vo eah kshvetzt katt hott.
Ich habb ksucht fa een avvah habb een nett kfunna.
Ich habb een groofa avvah eah hott kenn andvat gevva.
7 Di vatsh-mennah henn mich kfunna
vi si rumm heah ganga sinn in di shtatt.
Si henn mich kshlauwa un vay gedu;
di vatsh-mennah uf di vand
henn mei shawl vekk gnumma!
8 Oh yungi mayt funn Jerusalem, ich frohk eich,
vann diah mei beleebdah finnet,
sawwet eem es ich matt binn mitt leevi fa een.
Di Yunga Mayt
9 Vi is dei beleebdah bessah es anri,
du shenshti unnich veibsleit?
Vi is dei beleebdah bessah es anri,
es du dess frohksht funn uns?
Es Yung Maydel
10 Mei beleebdah is shay un shteik,
eah shtayt raus unnich zeyya dausend.
11 Sei kobb is vi fei gold;
sei hoah is mitt curls
un so shvatz es en grabb.
12 Sei awwa sinn vi dauva
es bei em vassah sinn.
Si sinn gvesha in millich
un eiksetzt vi en keshtlichah shtay.
13 Sei bakka sinn vi blumma-goahra mitt balsam
es goodah kshmakk ab gay lost.
Sei leftz sinn vi lilya-blumma
es nass sinn mitt myrrhe.
14 Sei eahm sinn vi rooda funn gold
es eiksetzt sinn mitt keshtlichi shtay.
Sei leib is vi sheinich ivory,
es eiksetzt is mitt sapphire-shtay.
15 Sei bay sinn vi poshta funn marbel
es uf kohva sinn mitt goldichi fees.
Eah gukt shteik un shay
vi di cedars funn Lebanon.
16 Sei maul is sees
un alles an eem is leeblich.
Dess is mei beleebdah, mei freind,
diah yungi mayt funn Jerusalem.