4
1-2 Ngayulu nyurrangarrinya piyuku nintilku. Wati wiyarringanyingka kamuru tjuṯangku palumpa mani yulytjaṯarra mantjilpayi. Wangka kutjupa palunya nguwanpa ngayulu nyurrangarrinya watjalku yalatji. Tjamulu palumpa tjamu wiima kanyilku, palumpa paapa maamaṯarra wiyarringutjangka. Tjamu paluru wiyarrikitjangku palumpa tjamu wiimangka watjalku yaṉangu kutjupangkura palunya kanyira ngula yungkunytjakura manta waaḻaṯarra kanyintjaku tiṉarringkula, tjamu palumpaṉutjanu. Palunyatjanu paluru pipirri tiṉarringutja mayutjulpi tjanampa palunya ngurrara tjuṯaku nyinaku. Tjamu tjiḻpi paluru wiyarringanyingka pipirri palunya paapa maama kutjupangku ngunytji yaṉṯayaṉṯanmalpa, pipirri kutu nyinanyingka. Yilta pipirri paluru tjamukuṉu manta waaḻakuṯarra mayutjulpi nyinaku. Pipirri nyinarra waarrkana mungutja nguwanpa nyinaku, mayutjuwiya. Ngula palumpa tjamungku watjara wantingutjangka tjamu wiima paluru tiṉarrirra yilta mayutju nyinaku tjamukuṉu manta waaḻakuṯarra.
3 Yara palunya nguwanpa nganaṉa waarrkana tjuṯa nguwanpa Muutjaku luwuwana nyinangi. Nganaṉa kutjupa tjuṯaku wangka kulira nyinapayi, wati waarrkanangku mayutjuku wangka kutju kulira nyinapayi nguwanpa.
4 Yirriṯi Katutjalu watjara wantingu ngula palumpa katja wantirriyalkitjangku. Tayimi palula yilta Katutjalu palumpa katja mantakutu wantirriyaṉu, kungkangka yutirrinytjaku. Tiṉarringkula katja paluru Muutjaku luwuwana tjukarurru nyinangi.
5 Nganaṉala luwu palulawana kutju nyinatjipingka, paluru mantakutu ngalyanu nganaṉala Muutjaku luwuwana nyinapayi tjuṯangka, Katutjaku wangka tjakultjunkula kuyalampa waṉinytjaku, nganaṉa Katutjaku walytja tjuṯalpi nyinanytjaku.
6 Kala, nganaṉa Yiitjukuṉu wangka kulira walytjarringkula kuwarri nganaṉa Katutjaku katja tjuṯa yuṉṯalpa tjuṯaṯarra nyinanyi. Nganaṉa yalatji nyinanytjala Katutjalu palumpa katjakuṉu kurrunpalanya tjarrpatjunu. Kurrunpa palurulanya nintilpayi yalatji, “Katutjanya yilta nyuntupa paapa nyinanyi.”
7 Pipirri wiima panyapa nguwanpa wiyanyurra waarrkana nguwanpa kutu nyinanytjaku luwu palulawana, Katutjaku ngulytjurrikitja. Pipirri tiṉarringutja nguwanpa nyurrangarrilpi kuwarri Yiitjukuṉu wangkatjarra kulira nyinanyi, yilta palumpa yuṉṯalpa tjuṯa, katja tjuṯaṯarra. Paluru yurrunpa watjara yiltangku nyurrangarrinya yaṉṯayaṉṯanmalpa.
Puṯuṉa kuliṉi, nyaarrikunyurra?
8 Yirriṯinyurra Katutjaku ngurrpa nyinangi. Katutjanya nguwanpa kutjupa tjuṯa nyurrangarri puḻkapungkupayi.
9 Kuwarrinyurra Katutjaku ninti nyinanyi. Wanyuṉaka kulila! Ngayulu yalatji watjanmara. Kuwarri Katutjanya nyurrangarrimpa kalyparringkula walytja nyinanyingka, nyaaku nyurrangarri palumpa wangka wantirra tjukurrpa kutjupa tjuṯa kulilpayi? Kuṉpu tiṉatjarrawiyaku waarrkana nyinakitjanyurra yunytjurringanyi.
10 Tjuwuku tuḻku tjuṯakutunyurra yankupayi, Tjarritiyi kutjupa Tjarritiyingka. Tuḻku kutjupangkanyurra tjungurringkupayi, pira kutjupa pirangka. Tuḻku kutjupangkanyurra tjungurringkupayi yiiya kutjupa yiiya kutjupangka. Kutunyurra tuḻkukutu yankupayi yalatji kulira, “Katutjanya nganampa yunypa nyinanyi kalypalpi, tuḻku tjuṯangka nganaṉa nyinangutjangka.” Kuwarrinyurra yalatji tuḻkungka nyinarra kutu yalatji kuliṉi. Katutjanya yaṉanguku wiya kalyparringkupayi tuḻkungka rawa nyinangutjangka, wiya.
11 Puṯuṉa kuliṉi nyurrangarri kutu Muutjaku luwu palulawana nyinanytjala. Ngayulu tjinguru nyurrangarrila irriṯi puṯu tjakultjunkupayi Yiitjukuṉu wangka.
12-13 Yirriṯi nyurrangarri Tjuwuwiya tjuṯa nyinarra Muutjaku luwuku ngurrpa nyinangi. Ngayuluṯarra wiya Tjuwuku luwuwana nyinapayi, Yiitjukuṉu wangka ngayulu kulira nyinapayi. Nyurrangarri kuwarri ngayunya nguwanpa nyinanytjaku, Muutjaku luwuwana nyinanytjawiya. Yirriṯi ngayulu nyurrangarrilakutu yankula miiṉṯa kutjupatjarra parra nyinapayi, rawa. Nyurrangarri ngayunya yaṉṯayaṉṯara ngayuku wangka kulilpayi, wiyanyurra yalatji watjalpayi, “Miiṉṯa nyinarra paluru ramaramarringu.”
14 Miiṉṯa ngayulu rawa parra nyinanyingka, wiya nyurrangarri ngayuku wangka kulira wantingu. Nyurrangarri ngayunya yaṉṯayaṉṯara yunyparringkupayi. Yaṉangu tjuṯa Yiitju Kurayitjaku yunyparringkupayi, yalatji nyurrangarri ngayuku yunyparringkupayi. Yaṉangu tjuṯangku ilkari ngurrara nyakula yunyparringkupayi, yalatji nyurrangarri ngayuku yunyparringkupayi.
15 Tjinguru ngayulu nyurrangarrila yulytja puntuku inkanyingka, nyurrangarri ngayunya puntura yungamara. Nyaarringutjangkanyurra kuwarri ngayuku yunypawiyalpi nyinanyi?
16 Tjinguru ngayulu nyurrangarrila wangka tjukarurru nintintjala nyurrangarri ngayuku yunytjuwiyarringanyi?
17 Paluru tjana wiyawana nintilpayi tjuṯa nyurrangarrimpa yunyparringkupayi ngulytjulkitja, Muutjaku wangkawananyurra nyinanyingka. Tjana yunytjurringanyi nyurrangarrimpa mayutjurrinytjaku yalatji, “Nganaṉa tjananya kutu nintilku Puulaku wangka wantirra Muutjaku wangkawana nyinanytjaku.”
18 Ngayulu nyurrangarrila nyinanytjawiyangka palyanyurra yaṉangu kutjupa tjuṯaku ngulytjurringkupayi. Tjana nyurrangarrinya Katutjaku wangka tjukarurru nintinmara.
19 Yirriṯi ngayulu nyurrangarrinya Yiitjukuṉu wangka nintintjala nyurrangarri palumpa walytja tjuṯarringu, ngayuku walytja tjuṯaṯarranyurra nyinanyi. Nyurrangarri Muutjaku wangkawana piyuku nyinakitja yunytjurringanyingka, ngayulu puṯu kuliṉi. Nyurrangarri Yiitjukuṉu wangkawana nyinanytjaku.
20 Wangka panyapa piipa ngaangka ngarrinytja ngayulu nyurrangarrinya marrkura wakaṉu tjukarurrulkitjangku. Ngayulu yunytjurringanyi nyurrangarrilakutu ankula purinypangku nintintjaku yiwarra kutjupawananyurra yankutjipingka.
Kungka Yayikanya kungka Tjaaranyatjarra
21 Kutjupa tjuṯa nyurrangarri yunytjurringanyi Muutjaku luwuwana nyinanytjaku. Luwu palumpanyurra wiyawanangku kuliṉi. Yalatji ngaranyi. Kulilaṉiya!
22 Katutjaku wangka yalatji ngarrinyi. Yipuramalu katja kutjarra mantjiṉu, kutjupa kungka waarrkanakuṉu, yini Yayikakuṉu, kutjupa palumpa miiṯa walytjakuṉu, yini Tjaarakuṉu. Yipuramaku miiṯa paluru waarrkanawiya nyinangi.
23 Kungka waarrkanakuṉu katja yurruntitja yutirringu, Yipuramanya kungka palula ngarringutjangka. Katja kutjupa yutirringu, palumpa miiṯakuṉu. Katutjalu yurrunpa watjaṉu katja palunya yutirrinytjaku, Tjaaranya wulkumanu tiṉa nyinanyingka.
24-25 Wati waarrkanangku, kungka waarrkanangkuṯarra mayutju kulira nyinapayi. Mayutjungku waarrkana tjuṯa kutu kanyilpayi tjana waarrkarrinytjaku. Palunya nguwanpa yaṉangu waarrkana nguwanpa tjuṯangku yirriṯi Muutjaku luwu kulira nyinapayi, mayutju nguwanpaku, waarrkana tjuṯaya nyinapayi luwu palulawana. Kungka paluru yini Yayikanya Yipuramaku waarrkana nyinapayi. Yayikaku pipirri tjuṯaṯarra tiṉarringkula waarrkana tjuṯa nyinapayi. Paluru tjana Muutjaku luwu nguwanpa kulira nyinapayi, wiyaya kuliṉu luwu palunya wantinytjaku. Ulkumanu paluru yini Tjaaranya, Yipuramaku miiṯa nyinapayi. Katutjalura watjaṉu ngula katja palumpa yutitjarrinytjaku. Palunya nguwanpa Katutjalu yaṉangu tjuṯa watjaṉu Yiitjunya ngula yutitjarrinytjaku. Luwu palunya Katutjalu Muutjanya yungu puḻi yini Tjaniyala. Puḻi paluru manta Yarapiyangka ngarangi. Luwu palunya nganaṉa Muutjaku luwu watjaṉi. Kungka paluru Yayikalu palumpa pipirri tjuṯangkuṯarra Muutjaku luwu kulira nyinapayi, wiyaya kuliṉu luwu palunya wantinytjaku. Tawunu Tjarutjalumanya ngurrara tjuṯangkuṯarra Muutjaku luwu kulira nyinapayi, waarrkana tjuṯangku mayutju kulira nyinapayi nguwanpangku.
26 Yiitju Kurayitjaku wangka kulilpayi tjuṯakulampa ngurra palya ilkaringka ngaranyi, ulkumanu Tjaaraku walytja ngaṉṯitja tjuṯaku ngurra. Nganaṉa Tjaaraku walytja ngaṉṯitja tjuṯa nguwanpa nyinanyi, ngurra palula nganaṉa nyinaku.
27 Palunya nguwanpa Katutjaku wangka yurrunpa tjunutja ngarrinyi yalatji,
“Yunyparrirra nyinanytjaku kungka pipirri mantjintjawiya.
Kungka paluru pipirri tjuṯalingkulpi mantjilku.
Pipirri maṉkurrpa nguwanpa kungka watitjarrangku mantjilku.”
Puulalu wangka palunya wakaṉu nganaṉa yalatji kulintjaku. Yiitju Kurayitjanya Tjaaraku, Yipuramaku walytja ngaṉṯitja nyinangi. Nganaṉa palumpa wangka kulira walytjarringkula Tjaaraku walytja ngaṉṯitja nyinanyi. Yilta Tjaaraku walytja ngaṉṯitja tjuṯalingkulpi nganaṉa nyinanyi, wangka palunya nguwanpa Tjaaralu ngaṉṯitja tjuṯa yutiṉu.
28 Ngayulu Puulalu nyurrangarrinya watjaṉi. Walytja tjuṯa, kulilaṉiya! Katja Yatjikanya Tjaaralulpi mantjiṉu Katutjalu Yipuramala katja nyinatjunkukitjangku watjaṉutjangka. Palunya nguwanpa Katutjalu watjaṉu palumpa katja nyinatjunkukitjangku. Paluru manta ngaangka yutirrinytjala nganaṉa palumpa wangka kulira palumpa walytjarringu.
29 Yirriṯi Yipuramaku katja pipirri wiima kutjarrangku pikangku pungu. Kungka waarrkanakuṉungku palumpa maḻanypa Yatjikanya pungu, Tjaaraku katja. Nganaṉanyaṯarra Tjaaraku walytja ngaṉṯitja tjuṯa Muutjaku luwutjarra tjuṯangku pungkupayi. Pungkupayi paluru tjana Yatjikanya katja pungkupayi nguwanpa nyinanyi.
30 Palunya nguwanpa Katutjaku wangka irriṯi tjunutja Yipuramala Katutjalu watjaṉutja yalatji ngarrinyi, “Kungka waarrkana palumpa katjaṯarra payira wantirriyala! Nyuntu wiyarrinytjala katja paluru wiya nyuntukuṉu yulytja mantjira nyuntupa ngurrangka nyinaku, katja kutjupa yalatji nyinaku, nyuntupa miiṯa walytjakuṉu.”
31 Walytja tjuṯa, kulilaṉiya! Nganaṉa palumpa miiṯaku yini Tjaaraku walytja ngaṉṯitja tjuṯa nyinanyi. Paapa Katutjalu nganaṉanya palumpa ngurrangka nyinatjunkula kana kanyilku.