5
Yiitju Kurayitjaku walytjarringkula wiyanyurra Muutjaku luwuwana piyuku nyinanytjaku
Yiitju Kurayitjanya nganampa kuya waṉinytjaku waralyngarala mirrirringu. Nganaṉa palumpa wangka kulira walytjarringkula wiya Muutjaku luwuwana nyinanytjaku. Luwu palunya wantirra wiyanyurra piyuku luwu palulawana nyinanytjaku.
Tjaampalangkunyurra kuliṉi Muutjaku luwuwana watirrinytjaku. Wangka ngaatjanyaya kulila! Tjingurunyurra watirringkula Muutjaku luwuwana nyinarra wiya Katutjaku kalypa nyinaku. Puṯunyurra ngula watjalku kuutawutjungka yalatji, “Ngayulu Yiitjuku walytja nyinapayi.” Katutjaku kalyparrikitja nyurrangarri Muutjaku luwu yuwankarraku tjukarurru kutu nyinanytjaku. Yalatji tjukarurru kutu nyinanytjawiyangka Katutjalu nyurrangarrinya warukutu waṉiku. Tjingurunyurra Muutjaku luwuwana nyinarra wiyalpinyurra Yiitju Kurayitjaku walytja nyinaku, wiya. Palurulanya yaḻṯururringkula yaṉṯayaṉṯalpayi nganaṉa palumpa walytja yilta nyinanyingka. Katutjaku kurrunpangku nganaṉanya nintilpayi yalatji tjukarurrungku, “Nyuntu Yiitju Kurayitjaku wangka kulira walytjarringkunytjala, Katutjanya nyuntupa kalypa nyinanyi.” Ngula kuutawutjungka Katutjalulanya nyaa nguwanpa tjapilku? “Nyuntu Muutjaku luwuwana watirringu?” Wiyalanya wangka panyapa nguwanpa tjapilku. Wangka yalatji kutju palurulanya tjapilku, “Nyuntu yilta tjukarurru nyinapayi Yiitjuku? Yaṉangu kutjupa tjuṯa nyuntu yaṉṯayaṉṯalpayi tjukarurru nyinarra, yilta?” Wangka yalatji kutjulanya tjapilku, watirringutja kulintjawiyangku.
Yirriṯi palyanyurra Yiitjuku nyinangi, tjukarurru. Palulanguru wati kutjupangku tjaampala nyurrangarrinya tjingapungu Yiitjukuṉu wangka wantinytjaku. Katutjalu nyurrangarrinya ngulytjuṉu palumpa wangka Yiitjunyatjarra kulintjaku. Wati panyapanya tjingapungkupayinya Katutjalu wiya nyurrangarrilakutu palunya wantirriyaṉu nintintjaku. Yaṉangu tjuṯangku yalatji watjalpayi, “Pipirri kutjungku kuya kutu palyantjala pipirri kutjupa tjuṯangku tjungurringkula kuya yalatji palyalku.” 10 Yara yalatji nguwanpa wati wiyawana nintilpayi paluru nintintjala kutjupa tjuṯangkunyurra palumpa wangka kulira wiyawanalpi nyinatjipingka. Kala ngayulu kuliṉi, nyurrangarri yilta Yiitju Kurayitjaku walytja nyinanyi ngayuku wangka piipa ngaangka ngarrinytjanyurra kulilku. Ngayulu kuliṉi ngayuku wangka nyurrangarri kulira wati panyapaku wangka wantiku. Tjingapungkupayi palunya Katutjalu ngula kuutawutjungka payira yiyalku warukutu.
11 Yaṉangu tjaampalangku watjalpayi yalatji, “Puulalu Tjuwuwiya tjuṯangka watjalpayi, tjana Yiitjuku walytjarringkula Muutjaku luwuwana watirringkunytjaku.” Ngayulu wangka palunya wiya watjalpayi, tjana ngunytji kuliṉi. Tjinguru ngayulu Tjuwuwiya tjuṯa watirrinytjaku watjantjala Muutjaku luwutjarra tjuṯangku ngayunya wantimara, panypurangkuwiyangku. Tjana kututja ngayunya panypurangkupayi. Ngayuluṉa kutu yaṉangu tjuṯangka tjakultjunkupayi Yiitju Kurayitjanyatjarra, paluru watiyangka waralyngarala mirrirringutjangka. Yalatji nintingku kulira Muutjaku luwutjarra paluru tjana ngayunya kutu panypurangkupayi. Tjinguru ngayulu wangka Yiitjunyatjarra wantirra Muutjaku wangka kutu nintintjala, ngayunya tjana wantimara, panypurangkuwiyangku. Ngayulu wiya watjalpayi Yiitjuku walytja watirrinytjaku, tjana ngunytji wangka palunya watjalpayi. 12 Yunytjurringanyiṉa wiyawana nintilpayi tjuṯangku, walytjalungkuya puntura mikintankunytjaku, mikintjarraya nyinarra nyurrangarrinya wantinytjaku, wati palyantjawiyangku.
13 Walytja tjuṯa, wangka ngaatjanyaya kulila! Yiitju Kurayitjalu nyurrangarrimpa kuya waṉinytjala Katutjalu nyurrangarrinya ngulytjuṉu Yiitju Kurayitjaku wangkawana tjukarurru nyinanytjaku. Paluru nyurrangarrinya wiya ngulytjuṉu Muutjaku luwuwana nyinanytjaku. Wiyanyurra wiyawana yalatji kulintjaku, “Nganaṉa Yiitjuku walytjarringkula nganaṉa walytjangku kulira nyinanytjaku, Muutjaku luwuwana nyinanytjawiya.” Wiyanyurra walytjangku kulira kuya palyantjaku. Yiitjuku wangkawananyurra kulira yaṉangu kutjupa tjuṯa yaṉṯayaṉṯantjaku, nyakula wantinytjawiyangku. Yaṉangu kutjupa tjuṯaku yunytjurrirra waarrkana nguwanpangku tjanampa nyurrangarri tjukarurru palyantjaku. 14 Muutjaku luwu tjuṯalingku ngaranyi. Luwu palunya tjuṯa nguwanpa wangka tungku ngaatja ngaranyi, “Walytja yilatja yunytjurrirra yaṉṯayaṉṯantja nguwanpa, kutjupa tjuṯaṯarra nyurrangarri yunytjurrirra yaṉṯayaṉṯantjaku.” 15 Tjakulpa ngayulu kuliṉu tjaampalangkunyurra kutjupa tjuṯaku tuunlayiki nyinapayi, yunytjurringkula yaṉṯayaṉṯantjawiya. Yalatjinyurra kutu yunytjuwiya tjanampa nyinanytjala Yiitjuku walytja tjuṯa ngurra nyuntupaṉungka yankula parraṉi pilarripayingka, pikatjanu nguwanpa. Nyurrangarri yaṉṯayaṉṯantjaku tjananya yunytjurringkula.
Puulalu tjananya watjalku, “Katutjaku kurrunpangku nyurranya nintilku”
16 Wangka ngaatjanyaya Katutjaku kurrunpatjarra kulila! Katutjaku kurrunpangku nyurranya nintiṉingka kuliranyurra tjukarurru nyinanytjaku. Katutjaku kurrunpanyurra kulira puṯu kulilku kuya palyalkitjangku. 17 Nganaṉa Katutjaku kurrunpa kulilwiyangku wantirra walytjangku kulira kuya palyalpayi. Katutjaku kurrunpangkulanya kutu nintiṉi tjukarurru nyinanytjaku. Palumpa kurrunpa kulilwiyangku wantirra nganaṉa puṯu kulilku tjukarurru nyinakitjangku. 18 Katutjaku kurrunpangku nyurranya nintiṉingkanyurra kulira tjukarurru nyinaku yalatji kulira, “Ngayulu Katutjaku kurrunpa kulira tjukarurru nyinanyi, palyaṉa Muutjaku luwu kulilwiya nyinanyi.”
19 Yuwa, yaṉangungku Katutjaku kurrunpa kulilwiyangku wantirra walytjangku kulira kuya palyalpayi. Yaṉangu walytjangku kulira miiṯa walytja wantirra kungka kutjupa tjuṯangka kuya palyalpayi kuṉṯawiyangku nguwanpa. 20 Yaṉangu kutjupa tjuṯangku Katutjanya nguwanpa waḻkulpayi. Paluru tjana yaṉangu kutjupa yinkarra kuyalpayi. Yaṉangu kutjupa tjuṯaya kutjupa tjuṯaku kalyparrinytjawiya puntura tuunlayiki nyinapayi. Kutjupa tjuṯa mungutja tjuṯaku pikarringkula kuya nyinapayi. Kutjupa tjuṯangku yaṉangu kutjupa yungkuwiyangku mangarri, yulytja maniṯarra walytjangku kanyilpayi. 21 Yaṉangu kutjupa tjuṯangku kutu kulilpayi yulytja mangarri maniṯarra kanyilkitjangku. Yaṉangu kutjupa tjuṯangku waama pulakinaṯarra tiṉa tjikira turaangkarringkupayi. Turaangkarringkula tjana pika pungkula kutjupa tjuṯangka kuya palyalpayi. Yirriṯi ngayulu nyurrangarrinya pinangkatjunu yalatji. Kuya palunya tjuṯa palyantjawiyanyurra tjukarurru nyinanytjaku. Kuya yalatji kutu palyantjala Katutjalu wiya yaṉangu palunya ngulytjura yaṉṯayaṉṯalku.
22-23 Katutjaku kurrunpangku nganaṉanya nintilpayi palya nyinanytjaku. Nganaṉa kurrunpa palunya kulira yaṉangu tjuṯaku palya nyinaku. Nganaṉa kurrunpa palunya kulira tjanampa yunytjurringkula nyinaku. Nganaṉa kurrunpa palunya kulira yunypa nyinaku. Kurrunpa palunya nganaṉa kulira Katutjaku kalypa nyinaku. Nganaṉa kurrunpa palunya kulira yaṉangu kutjupa tjuṯaku kaangkinytji nyinaku pikarrinytjawiya. Kurrunpa palunya nganaṉa kulira tjukarurru watjalku yaṉangu kutjupaku palyalkitjangku. Yalatji watjara nganaṉa yilta tjukarurru palyalku. Kurrunpa palunya nganaṉa kulira waarrkana nguwanpa nyinaku, nganaṉa wiya mayutju nyinakitja yunytjurringkula nyinaku. Tjinguru yaṉangu kutjupangku nganaṉanya tjingapungku kuya palyantjaku, nganaṉa kulira wantiku tjukarurru nyinakitjangku. Katutjaku kurrunpangku nintintjala nganaṉa kulira wangka palunya tjuṯa nguwanpa nyinarra nganaṉa wiya Katutjaku luwu kilytjuntanku. 24 Yirriṯi nganaṉa walytjangku kulira kuya palyara nyinapayi. Kuwarri nganaṉa Yiitju Kurayitjaku walytjarringkula tjukarurru nyinanyi. 25 Katutjaku kurrunpalanya tjarrpanyingka, nganaṉa Katutjaku walytjarringkula kana nyinaku palumpa ngurrangka. Kurrunpa palurulanya nintintjala nganaṉa kutu kulira tjukarurru nyinanytjaku yalatji. 26 Walytjalungku wiya waḻkuntjaku yalatji, “Ngayuluṉa Yiitjuku walytja palyalingku nyinanyi, Muutjaku luwu kulilwiyangku wantirra.” Wiya wangka palulawana kulira walytjangku puḻkapungkunytjaku. Nyuntu Katutjaku kurrunpa kulira palya nyinanytjaku walytjangku puḻkapungkunytjawiya. Nganaṉa wiya yaṉangu kutjupa tjaarramapintjaku, nganaṉa palya palumpa nyinanytjaku.