10
Tjiipi tjuṯaya mayutju tjanampaku ninti
1-2 Yiitjulu tjananya piyuku watjaṉu, “Wangka ngaatjanyaya kulila! Tjiipiku yaaṯangka tjiipiku mayutju kutju kiiṯawana tjarrpanyi, kiiṯa kanyilpayingku alytjurankunytjala. Tjiipi mulyaṯangku katipayi piinytjingka kaḻparra tjarrpanyi tjiipi mantjira katikitja, kiiṯa kanyilpayingku nyakutjipingka. 3-4 Kiiṯa kanyilpayingku alytjurananyi tjiipiku mayutju kutju tjarrpanytjaku. Mayutju wangkanytjala tjiipi tjuṯangkuya kulira mayutju walytjakutu ngalya tjalkaḻunganyi. Tjiipi tjuṯa yinitjarra nyinanyi palumpa. Tjiipiku mayutju tjuṯangkuya tjiipi tjuṯa yaaṯangka yunngu tjarrpatjunanyi, tjunguya mungangka ngarrinytjaku. Aaḻi mayutju paluru kiiṯa alytjurankula ngarala tjananya yaḻṯinyi. Yini watjantjala tjiipingku kulira mayutju walytjakutu ngalya tjalkaḻunganyi. Mayutjukutuya tjalkaḻungkula tjungurringanyi. Mayutju paluru yurrunpa yankula tjananya katiyananyi. Tjiipi tjuṯangku ngaṉṯiwana wanaṉi palumpa wangka kulira. Mayutju kutjupa wiya tjana wanarinanyi, tjana wangka kutjupa kulira tjalkaḻunganyi, mayutju palulamarra.” Yara ngaatjanya Yiitjulu tjananya watjaṉu wangka kutjupa nintilkitjangku. Yaṉangu tjuṯangku puṯuya kuliṉangi palumpa wangka, yara tjiipitjarra kutjuya kuliṉangi.
Tjiipiku mayutju palya
Tjana puṯu kulintjala Yiitjulu tjananya nintiṉu yalatji, “Wangka ngaatjanyaya kulila! Ngayulu kiiṯa kanyilpayi nguwanpa, ngayulu tjiipi tjuṯaku kiiṯa yalytjurananyi tjana tjarrparra palya ngarrinytjaku. Mulyaṯanytju tjuṯa kiiṯa palula tjana ngalya yankula ngarapayi, tjiipi tjuṯa mantjira katinytjaku. Tjana kiiṯangka ngarala wangkanytjala tjiipi tjuṯangku kulira wantipayi, tjanalakutu yankunytjawiya. Ngayuluṉa kiiṯa kanyilpayi nguwanpa nyinanyi, tjiipi tjuṯa tjananya ngayulu tjarrpatjunanyi, tjana tjarrparra ngurra palyangka ngarrinytjaku. Kiiṯa kanyilpayi nguwanpangku tjananya ngayulu yaṉangu tjuṯa Katutjaku ngurrangka tjarrpatjunanyi. Ngayuku wangka yaṉangu tjuṯangku kulira Katutjaku ngurrangka tjarrparra nyinaku, ngayulu tjananya kutu yaṉṯayaṉṯanmalpa. 10 Mulyaṯanytju tjuṯangkuya tjiipi mantjira katinyi iluntankunytjaku. Palunya tjananya nguwanpa wiya ngayulu nyinanyi. Ngayulu yaṉangu kana nyinatjunkupayi, wiya ngayulu mantakutu ngalyankula yaṉangu tjuṯa iluntananyi, warukutuṯarra iyantjaku, wiya. Ngayulu ngalya yanu mantakutu yaṉangu tjuṯangku ngayuku wangka kulintjaku. Tjana ngayuku walytjarringkula kana kutu nyinaku. 11 Ngayulu tjiipiku mayutju palya nguwanpa nyinanyi, yaṉangu tjuṯa ngayulu tjananya yaṉṯayaṉṯaṉi. Tjiipi tjuṯa nguwanpa ngayulu yilangku tjananya kutu yaṉṯayaṉṯaṉi, ngayulu wiya yaṉangu tjikipaka tjuṯaku nguḻurringkula tjiipi tjuṯanya wantikatiku. Ngayulu tjananya kutu yaṉṯayaṉṯanmalpa. Wiyaṉa tjanampa nguḻurriku tjana ngayunya iluntankunytjala. 12-13 Waarrkana tjuṯangku tjiipi tjuṯa kanyiṉi, mayutjungku tjananya payimilantjala tjana waarrkarringanyi. Papa tjikipaka tiṉangku tjiipi patjantjala, waarrkana paluru pungkukitjangku wantirra tjalkaḻunganyi. Paluru wiya tjiipi tjuṯa puraapawayi yaṉṯayaṉṯaṉi, maniku kutju kulilpayi.
14-15 “Tjiipiku mayutju palyangkuṉa tjananya yaṉṯayaṉṯaṉi. Tjiipiku mayutju tjiipi tjuṯaku ninti nyinanyi yinitjarra tjuṯaku. Yalatji nguwanpa ngayulu yaṉangu walytja tjuṯaku ninti nyinanyi. Ngayuku walytja paluru ngayuku ninti nyinanyi. Yalatji nguwanpa ngayuku paapatju ninti nyinanyi, ngayuluṯarra ninti nyinanyi ngayuku paapaku. Yuwa, ngayuku walytja tjuṯa, tjiipi tjuṯa nguwanpa ngayulu tjananya kutu yaṉṯayaṉṯanmalpa. Kutjupa tjuṯangku ngayunya yiluntananyingka ngayulu kutu tjananya kanyira kana nyinatjunku Katutjaku ngurrangka. 16 Ngayulu tjiipi kutjupa tjuṯaṯarra yaṉṯayaṉṯalku yaaṯa panyapangka tjana wiya kuwarri nyinanyi. Ngayulu tjananya yaḻṯinytjala kuliraya tjungulpi tjanala tjiipi panyapa tjuṯangka nyinaku, ngurra kutjungka. Ngayulu tjanampa tjiipi tjuṯaku mayutju nyinaku ulaataku.
Yara palunya Yiitjulu watjaṉu tjiipi kutjupa tjuṯa nguwanpa Tjuwuwiya tjuṯa yaṉṯayaṉṯantjaku. Yurrunpa palumpa walytja Tjuwu tjuṯa nyinangu, palulanguru Tjuwuwiya tjuṯa palumpa walytja tjuṯarringu. Tjuwu tjuṯaku Tjuwuwiya tjuṯakuṯarra Yiitjunya mayutju palya nyinanyi.
17 “Ngayuku paapa yunytjutju nyinanyi ngayulu yalatji kulintjala, ‘Paapangkuṉi watjantjala ngayulu kuya tjuṯaku nguḻurringkula tjalkaḻungkunytjawiya iluku, palulanguru ngayulu piyuku kanarriku.’ 18 Ngayulu unytjurringanyi ngayuku paapaku wangkawana mirrirrinytjaku. Wiya ngayulu paapanya watjalku, ‘Kutjupa tjuṯangkuṉi wiya mirri pungkunytjaku, nyuntu ngayunya yaṉṯayaṉṯala!, kana kutuṉa nyinanytjaku.’ Wangka panyapa watjantjawiyangku ngayulu yalatji watjalku, ‘Palyaṉiya kuwarri mirri pungku, ngula yilta ngayulu kanarriku.’ Yalatji ngayulu mirrirrinytjaku ngayuku paapangku kuliṉi.” 19-20 Wangka palunya kulira yaṉangu tjuṯangku puṯu kuliṉingi. Tjaampalangkuya watjaṉu, “Palatja rama mamutjarra, nganaṉa wiya palumpa wangka kulintjaku.” 21 Tjaampalangkuya watjaṉu, “Ramawiya palatja, paluru palya wangkanyi. Paluru Katutjakuṉu. Palumpa ngangkaritjarrangku paanga tjuṯa palyalpayi.”
Yiitjunyaya puḻitjarrangku rungkalkitjarriku
22-23 Yuḻṯa palula tuḻku tiṉa ngarangu, tawunu Tjarutjalumala.
Tjuwu tjuṯangku tjungurringkula yalatji kulilpayi, “Yirriṯi nganampa walytja yurruntitja tjuṯangku Katutjaku tjaatji tiṉa kuyara wantingutja kiliinamilara palyaṉu, yaṉangu tjuṯangku palula tjungurringkula Katutjanya waḻkuntjaku. Nganaṉa yalatji kulira palyara yunyparringanyi.”
Tuḻku palula Yiitjunyaṯarra tjungurringu tjaatji tiṉangka, warri tayimi ngaranyingka. Tjaatji palula tjayiṯiwana tjana yirriṯi puri waṯawara palyara ngaratjunu. Tjana puri palunya yini yalatji watjalpayi, “Tjalamunaku puri.” Puri palulawana Yiitjunya parra ngarangi. 24 Yaṉangu tjuṯangku puri palula tjungurringkula Yiitjunya tjapiṉu, “Nganaṉa puṯu kuliṉingi. Tjinguru nyuntu Kurayitjanya Katutjalu watjara wantirriyaṉutja nyinanyi, tjinguru wiya. Tjukarurru nganaṉanyatju nyuntu watjala!” 25 Yiitjulu tjananya watjaṉu, “Ngayulu nyurrangarrinya panyapa watjalpayi, wangka panyapanyurra kulira wantipayi. Ngayuku paapakuṉu ngangkaritjarrangku ngayulu miiṉṯa tjuṯa palyalpayi. Ngayulu yalatji palyantjala nyurrangarri nyakula tjukarurrungku kulinmara. 26 Nyurrangarri ngayuku tjiipi tjuṯa nguwanpa wiya nyinanyi, palulangurunyurra ngayuku wangka kulira wantinyi, ngayuku walytja tjuṯa wiyanyurra nyinanyi. 27 Ngayuku tjiipi nguwanpa tjuṯangkuya ngayuku wangka kulira tjukarurru ngayuku nyinanyi. 28 Ngayulu tjananya nyinatjunku ngayuku paapaku ngurrangka kana kutuya nyinanytjaku. Ngayulu tjananya yaṉṯayaṉṯara kutu kanyinmalpa, tjana ngayuku walytja kutu nyinanytjaku, ngayuku walytja tjingapunganyingka tjananya ngayuku wangka kulira tjana wantipayingka. 29 Ngayuku paapangkuṯarra tjananya yaṉṯayaṉṯara kanyinmalpa. Paluru tjananya nintilpayi ngayuku walytja tjuṯa nyinanytjaku. Kutjupangku tjananya puṯu tjingapungku ngayuku wangka kulilwiyangku wantinytjaku. Paapalu ngangkari tiṉatjarrangku tjananya yaṉṯayaṉṯanmalpa. 30 Ngalitju mayutju tiṉa kutjarra nyinanyi, ngangkari kutjutjarra.”
31 Yaṉangu tjuṯangku palumpa wangka kulira yalatji kuliṉingi, “Yiitjunya, Katutjanyaṯarra wiya mayutju tiṉa kutjarra nyinanyi ngangkari kutjutjarra, Yiitjunya yaṉangu kutju nyinanyi manta ngurrara. Paluru yalatji wiyawana watjara nganampa luwu kilytjuntananyi. Nganaṉa palunya rungkara yiluntankunytjaku.” Yiitjuku tjana ngurrkurringkula puḻi mantjiṉu, palunya rungkara yiluntankunytjaku. 32 Yiitjulu tjananya watjaṉu, “Ngayuku paapakuṉu ngangkaritjarrangkuṉa yaṉangu tjuṯa palyalpayi. Tjinguru nyurrangarri kuliṉi ngayulu tjananya palyalwiyangku wantimara? Nyaakunyurra puḻitjarrangku ngayunya rungkalkitja ngaranyi?” 33 Tjana palula watjaṉu, “Nyuntu tjananya palyaṉutjangka wiyalatjunta rungkaṉi. Nyuntu nganampa luwu kilytjuntanutjangka rungkalkulatjunta. Nyuntu wangka panyapa watjaṉu, ‘Ngalitju mayutju tiṉa kutjarra nyinanyi ngangkari kutjutjarra.’ Yalatji watjara nyuntu nganampa luwu kilytjuntanu. Nyuntu manta ngurrara, Katutjakuṉu wiya. Nyuntu panyapa watjalwiyangku wantimara.” 34-35 Yiitjulu tjananya watjaṉu, “Katutjaku wangka yirriṯitja ngarrinyi yalatji, ‘Yirriṯi, Katutjalu yaṉangu tjuṯaku mayutju tjuṯa nyinatjunu ngangkari tiṉatjarra.’ Katutjaku wangka palunya yilta ngarrinyi. 36 Mayutju palunya tjananya nguwanpa ngayulu ngangkari tiṉatjarra nyinanyi. Paapa Katutjalu ngayunya mantakutu ngalya wantirriyaṉu. Palulanguru ngayulu wangka panyapa watjara ngayulu wiya palumpa luwu kilytjuntanu. Palya ngayulu nyurrangarrinya watjaṉu, ngayulu Katutjaku katja nyinanyi. 37-38 Ngayuku paapangku ngangkaritjarrangku palyalpayi. Ngayulu palunya nguwanpa ngangkaritjarrangku palyantjawiyangka, nyurrangarri kulinmara yalatji, ‘Yiitjulu tjananya puṯu palyalpayi, paluru kuyakuya nyinanyi. Paluru ngunytji Katutjaku wangka watjalpayi, paluru Katutjakuṉu wiya.’ Kala, ngayulu palumpaṉu ngangkaritjarrangku palyalpayi. Yalatji ngayulu palyantjala nyakula nyurrangarri kulinmara yalatji, ‘Yiitjunya yilta Katutjakuṉu nyinanyi, palumpa ngangkaritjarra.’ Yuwa, ngayulu palumpaṉu ngangkaritjarrangku palyantjala nyurrangarri yalatji kulintjaku, ‘Yilta, Katutjanya Yiitjunyaṯarra mayutju tiṉa kutjarra nyinanyi ngangkari kutjutjarra.’ ”
39 Yaṉangu paluru tjana Yiitjunya puḻingka rungkalwiyangku wantirra kuliṉu palunya witilkitjangku. Witilkitjangkuya puṯu nyangu Yiitjuku, yaṉangu tjuṯalingku ngarala waṉinytjala, paluru yarrka yanu. 40 Karru Tjuutanala wirriḻi Yiitjunya yankula nyinangu. Ngurra palula yurrunpa Tjaanalu tjananya kapingka tjarrpatjunkula papatatjimilalpayi. 41-42 Yiitjulakutuya yaṉangu tjuṯa yankula tjungurringkupayi palumpa wangka kulintjaku. Tjuṯangkuya palumpa wangka kulira palumpa walytjarringu. Yaṉangu tjuṯangku watjara waṉingu, “Yiitjulu ngangkari tiṉatjarrangku yaṉangu tjuṯa palyalpayi, Tjaanalu wiya yaṉangu tjuṯa palyalpayi. Paluru wangka tjukarurru nganaṉanya tjakultjunkupayi Yiitjulakutu nintilkitjangku.”