18
Yiitjunyaya witilku
Katutjala wangkarra pinitji Yiitjunya, palumpa kutunguḻu tjuṯaṯarra pakara yanu. Karruwanaya tjurrurringu tjaṯakutu yankukitja. Karru paluru yini Kiturunanya. Tjurrurringkula tjana tjaṯangka maa tjarrpangu. 2-3 Tjaṯa palulakutu Yiitjulu palumpa kutunguḻu tjuṯa kututja katipayi wangkanytjaku. Tjuutatjanya tjaṯa palumpa ninti nyinangu. Paluru mayutju tjuṯangka tjungurringkula tjakultjunu, “Yiitjunya palumpa kutunguḻu tjuṯakunyu kuwarri tjaṯa palula nyinanyi.” Mayutju paluru tjana Tuḻkuku mayutju tiṉa tjuṯa nyinangu, Paratji tjuṯaṯarra. Paluru tjana Tjuutatjanya watjaṉu tjuulytji tjuṯa, yurrkunytji tjuṯaṯarra tjaṯa palulakutu katinytjaku. Tjana watjaṉu Yiitjunya witintjaku. Yalatjiya tjungu tjuulytji tjuṯa yanu. Paluru tjana tjangi tjuṯa katiyanangi. Tjana yankula Yiitjulakutu yilarringu. Tjaṯa palula nyinarra Yiitjulu yalatji kuliṉingi, “Kuwarriṉiya witira katiku kuutawutjungka wangkanytjaku. Palulanguru ngayunya tjana watiyangka waralytjura mirrintanku.” Paluru tjana yilarrinytjala Yiitjunya kutju yankula ngarangi, palumpa kutunguḻu tjuṯangka yurrunpa. Paluru tjananya tjapiṉu, “Nganakunyurra ngurriṉi?” Tjana watjaṉu, “Yiitjuku, Natjaritjanya ngurraraku.” Yiitjulu tjananya watjaṉu, “Ngayuluṉa ngaatja ngaranyi.” Tjuutatjanya tjanala tjungu ngarangi Yiitjunya nyunytjura nintintjaku. Yiitjulu watjaṉu, “Ngayuluṉa ngaatja ngaranyi.” Watjantjala, tjana tjuḻurrmankula ngaṉṯikutu punkaṉu, Yiitjunya yila kutju nyakula. Piyuku tjananya paluru tjapiṉu, “Nganakuranyurra ngurriṉi?” Piyuku tjana watjaṉu, “Yiitjukulatjura ngurriṉi, tawunu Natjaritjanya ngurraraku.” Yiitjulu tjananya watjaṉu, “Ngayulu panyapa nyurrangarrinya yurrunpa watjaṉu, ‘Ngayuluṉa ngaatjakunyu ngaranyi.’ Kala, ngayunya kutju nyurrangarri witila!, kanya ngaa tjuṯa tjananya wanti!” Yurrunpa palumpa paapanya Yiitjulu watjaṉu, “Ngayuku kutunguḻu tjuṯa ngayulu yaṉṯayaṉṯalpayi, ngayulu yunytjurringanyi tjana kutu ngayuku walytja tjuṯa nyinanytjaku.” Wangka yalatji kulira Yiitjulu tjuulytji tjuṯanya marrkuṉu palumpa kutunguḻu tjuṯa wantinytjaku, tjananya pungkutjipingkamarra, tjana kana palumpa walytja nyinanytjaku. 10 Tjaaman Piitanya tjuuḻa waṯawaratjarra ngarangi. Tjuuḻa palunyatjarrangku yurrkura pina kuntara waṉingu, tuḻkuku mayutju tiṉaku waarrkana. Yini paluru Malkatjanya. Malkatjanya pina wakutjayiṯi kuntara waṉingu. 11 Piitanya Yiitjulu marrkuṉu, “Tjuuḻa waṯawara wanti!, pawutjingka rayitpayiki tjurra! Palyaṉiya katirra tjitjantankunytjaku, ngayuku paapangku yalatji kuliṉi.”
12 Paluru tjana Yiitjunyalpi witira ruupatjarrangku mara kutjarra tayimapira, 13-14 katingu tuḻkuku mayutju tiṉaku ngurrakutu. Yanatjanya tuḻkuku mayutju tiṉa yurrunpa nyinangu. Kayapatjanyalpiya tjana ngaratjunu, tuḻkuku mayutju tiṉa nyinanytjaku. Kayapatja paluru Yanatjaku yuṉṯalpa kanyiṉangi, paluru Yanatjaku waputju nyinangu. Kayapatjanya tuḻkuku mayutju tiṉa nyinangu Yiitjunyaya witintjala. Kayapatjalu tjananya yurrunpa mayutju tjuṯangka miitingingka yalatji watjaṉu, “Palya tjana Yiitjunya witira mirrintankunytjaku, Ruumanya ngurrara tjuulytji tjuṯangkulanya Tjuwu tjuṯa nganaṉanya mirri pungkupayingka.” Paluru tjana Yiitjunya katirra ngaratjunu mayutju Yanatjala tjapintjaku.
Piitalu ngurrpa watjalku, “Ngayulu Yiitjuku ngurrpa”
15 Yiitjunyaya katiyananyingka Piitalu ngalitjulitju tjananya ngaṉṯiwanangku wanaranangi. Ngayulu tuḻkuku mayutju tiṉanya yurrunpa wangkapayi. Palumpa waarrkana tjuṯaku ngayulu ninti nyinangi. Palumpa waarrkanangkuṉi watjantjala, ngayulu kiiṯawana tjarrparra palumpa ngurrangka yaaṯangka yila ngarangi, Yiitjunyaya waaḻangka yunngu kanyiṉingka, 16 kanya Piitanya kiiṯangka paṯara ngarangi. Kungka waarrkana kiiṯangka ngarangi kiiṯa alytjurankupayi. Waarrkana palulakutu ngayulu yankula wangkangi Piitanya tjarrpatjunkunytjaku. Kungka paluru Piitanya tjarrpatjunu. 17 Yalatji paluru watjaṉu, “Tjinguru nyuntu Yiitjuku walytja nyinanyi.” Piitalu wiya watjaṉu, “Wiya, ngayulu ngurrpaṉa.” 18 Yurrkunytji panyapa tjuṯangku waarrkana tjuṯangkuṯarra waaḻa palulaya yaatjayiṯi waru kutjaṉu. Tjana nyinarra warungka wuumpirringangi, warri tayimingka. Piitanya yankula tjanalakutu warungka ila ngarangi wuumpirrikitja.
Tuḻkuku mayutju Yanatjalu Yiitjunya yilaṯu yilaṯu tjapilku
19 Tuḻkuku mayutjungku yini Yanatjalu Yiitjunya tjapiṉingi yalatji nguwanpa, “Nyuntupa kutunguḻu tjuṯaya yini ngananyaya nyinanyi? Nyuntu tjananya yaṉangu tjuṯa wangka nyaa nguwanpa nintilpayi?” 20-21 Yiitjulu palunya watjaṉu, “Nyuntu ngayunya wiya yalatji tjapintjaku. Yaṉangu tjuṯa nyuntu tjapintjaku. Ngayulu tjananya kutu nintilpayi tjaatji wiima tjuṯangka, tjaatji tiṉangkaṯarra, nyurrangarrila yilaṯarra ngarala kulintjala. Ngayulu kuliṉingi yaṉangu yuwankarrangku ngayuku wangka kulintjaku, nyurrangarri mayutju tjuṯangkuṯarra kulintjaku, wiyaṉa tjananya ngurra kutjupangka kutju nintilpayi nyurrangarri mayutju tjuṯangku kulilpayingkamarra.”
22 Yiitjulu tjananya panyapa watjantjala yurrkunytji kutjungku Yiitjunya marangku yuṉpa yatura yalatji marrkuṉu, “Nyuntu wiya tuḻkuku mayutjungka panyapa nguwanpa watjantjaku, wanti!” 23 Yiitjulu yurrkunytji palunya watjaṉu, “Tjinguru ngayulu ngunytjinytjunanyingka nyuntu watjanmara, yuṉpaṉi pungkuwiyangku. Ngayulu wangka tjukarurru watjaṉu, pungkuwiyangkuṉi nyuntu wantimara.” 24 Palulanguru mayutju Yanatjalu watjaṉu, tuḻkuku mayutju tiṉa Kayapatjalakutu katinytjaku. Wiya tjana Yiitjula ruupa palunya yarranu, tjana ruupa palunyatjarra Yiitjunya katingu.
Piitalu piyuku ngurrpa watjalku, “Ngayulu Yiitjuku ngurrpa”
25 Yiitjunya waaḻa palula yunngu ngaranyingka Piitanya tjungu tjanala ngarala warungka wuumpirringangi. Yaṉangu kutjupangku Piitala yila ngarala tjapiṉu, “Tjinguru nyuntu Yiitjuku walytja nyinanyi?” Piitalu ngurrparringkula watjaṉu, “Wiya. Ngayulu ngurrpaṉa.” 26 Wati kutjupa ngarangi, mayutju Kayapatjaku waarrkana. Paluru walytjara nyinangu waarrkana panyapaku, Piitalu pina kuntara waṉingutjaku, tjaṯa palula. Waarrkana paluru Piitanya watjaṉu yalatji, “Tjaṯa palula ngayuluṉanta nyangu palaku walytja tjuṯangka ngaranyingka.” 27 Piitalu piyuku ngurrpa wangkangu, “Ngayulu palaku ngurrpa.” Palulanguru tjuḻpu lukuluku mirrangu.
Mayutju Payilatala Yiitjunya ngaraku
28 Mungangka paluru tjana Yiitjunya katirra ngaratjunu Kayapatjala kutu tjapintjaku. Palulanguru aaḻi Tjuwu tjuṯangku piyuku Yiitjunya katingu mayutju Payilataku waaḻakutu. Payilataku kiiṯangkaya wiya tjarrpangu, yaatjayiṯi kutuya tjana ngarangu. Paluru tjana Tjuwu tjuṯangku yalatji kuliṉingi, “Nganaṉa wiya Tjuwuwiyaku ngurrangka yiniwayi tjarrpanytjaku, luwu nganampa yalatji ngaranyi. Nganaṉa tjarrpanytjala tuḻkuku mayutju tjuṯangku nganaṉanya yalatji watjalpayingka, ‘Nyurrangarri waaḻa palula tjarrparra luwu nganampa kilytjuntanu. Wiya nyurrangarri Tuḻku Patjuwupangka kuwarri ngalkunytjaku, wantiya!’ ” 29 Paluru tjana Yiitjunya kanyira waaḻangka paṯaṉingka mayutju Payilatalu pakara kiiṯakutu yankula tjananya tjapiṉu, “Kuya nyaa nguwanpa wati ngaangku palyaṉu?” 30 Tjana palunya watjaṉu, “Wati ngaatja palya nyinanyingka, nganaṉa witilwiyangku wantimara. Ngaangku yilta kuya palyalpayi. Nyuntu kuutawutjuku mayutju nyinanyi, wangka ngaaku kulira watjantjaku.” 31 Mayutju Payilatalu tjananya watjaṉu, “Ngayulu wiya watjantjaku, nyurrangarri palunya katirra ngaratjunkula watjantjaku, nyurrangarrimpaṉu luwuwanangka.” Tjuwu paluru tjana watjaṉu, “Luwu Ruumanya ngurrara tjuṯaku nyurrampa ngaranyi, wiya nganaṉa Tjuwuku luwuwanangka kuutawutjungka wangkarra mirri pungkunytjaku.” 32 (Tjuwu paluru tjana yunytjurringu, Ruumanya ngurrara tjuṯangku Yiitjunya watiyangka waralytjunkula mirrintankunytjaku. Yiitjulu yurrunpa watjaṉu, “Tjanakunyu ngayunya waralytjunkula mirrintanku.” Palumpa wangka iltarringu. Ruumanya ngurrara tjuṯangku palunya yilta watiyangka waralytjunkula mirrintanu.)
33 Payilatanya palumpa waaḻangka tjarrparra watjaṉu palumpa waarrkanangku ngalya katinytjaku. Yiitjunya ngaranytjala paluru yalatji tjapiṉu, “Nyuntu Tjuwu tjuṯaku tjanampa mayutju tiṉanya nyinanyi?” 34 Yiitjulu palunya tjapiṉu, “Panyapaṉin nyuntu tjapiṉu walytjangku kulira?, tjinguru kutjupa tjuṯangkuntaya panyapa tjakultjunu ngayunyatjarra.” 35 Payilatalu Yiitjunya watjaṉu, “Ngayulu Tjuwuwiya nyinanyi. Nyuntupa walytja tjuṯangkuṉiya wangka palunya tjakultjunu, tuḻkuku mayutju tiṉa tjuṯangku. Tjana nyuntunya ngalya katirra ngaratjunu. Kuya nyaa nguwanpa nyuntu palyaṉu?” 36 Yiitjulu watjaṉu, “Mayutju kutjupa ngayulu nyinanyi. Mayutju tiṉa manta ngurrara tjuṯa nguwanpa wiya ngayulu nyinanyi. Tjinguruṉa mayutju tiṉa manta ngurrara nguwanpa ngayulu nyinanyingka, ngayuku walytja tjuṯangku tjananya Tjuwu tjuṯaku mayutju tjuṯa pikangku pungamara, tjana ngayunya witira kanyilpayingka. Yuwa, ngayulu mayutju kutjupa nyinanyi, ilkari ngurrara.” 37 Mayutju Payilatalu tjapiṉu, “Nyuntu ilta mayutju tiṉa nyinanyi?” Yiitjulu watjaṉu, “Panyapa nyuntu tjukarurru watjaṉu. Mantakutuṉa ngalya yanu wangka tjukarurru tjakultjunkunytjaku. Yaṉangu kutjupa tjuṯangku wangka tjukarurru kulilkitja yunyparringanyi, tjana ngayuku wangkaṯarra kuliṉi, kanya kutjupa tjuṯa wiya wangka tjukarurruku yunyparringanyi.”
38 Payilatalu Yiitjunya watjaṉu, “Wiya ngali wangka tjukarurruku kulira pikarrinytjaku.” Payilatanya pakara kiiṯa palulakutu yankula tjanala mayutju tjuṯangka, yaṉangu tjuṯangkaṯarra watjaṉu, “Ngayulu puṯu wangkarra kuliṉi, wati paluru kuya palyantjawiya nyinanyi. 39 Ngayulu kututja puritjina watjara pakaltjingalpayi tjiilanguru, tuḻku Patjuwupanya ngaranyingka. Kuwarri tuḻku Patjuwupanya ngaranyi, wati palatja Tjuwu tjuṯaku nyurrangarrimpa mayutju tiṉa ngayulu pakaltjingara wantirriyalku, yilta?” 40 Rapangkuya watjaṉu, “Wiya palunya pakaltjingara wantirriyantjaku, wati kutjupa Parapatjanya tjiilangka nyinanyi, palunya pakaltjingara wantirriyala!” Parapatjalungarri yurrunpa kamanta ngurrara tjuṯa pikangku pungkupayi.