3
Wati Nikatimatjanyara yankula Yiitjula wangkaku
1 Wati Nikatimatjanya Tjuwu tjuṯaku mayutju Paratji nyinangi, Tjuwuku luwuku ninti.
2 Paluru Yiitjulakutu mungangka yanu wangkakitja. Yankulara wirrkara Yiitjula wangkangu, “Nintilpayi. Nganaṉatju ninti nyinanyi Katutjalunta ngalya wantirriyaṉu nganaṉanyatju nintintjaku. Nganaṉatju kuliṉi nyuntu Katutjakuṉu ngangkaritjarrangku yaṉangu tjuṯa palyalpayi.”
3 Yiitjulu palunya watjaṉu, “Wangka ngaatjanya kulila! Yaṉangu piyuku yutitjarrirra kutju, Katutjaku walytja tjuṯangka tjungurringkula nyinaku. Katutjalu palunya tjananya ngulytjura yaṉṯayaṉṯanmalpa.”
4 Nikatimatjalu watjaṉu, “Yaalytjiyaalytji wati tjiḻpi piyuku yutitjarringanyi? Wiya maamangka wiḻangkarringkula piyuku yutitjarriku.”
5 Yiitjulu palunya watjaṉu, “Wangka ngaatjanya kulila!, maṯupurra. Yaṉangu papatatjirringkula piyuku yutitjarringanyi, Katutjaku kurrunpa tjarrpanytjala. Yalatji piyuku yutitjarrinytjala Katutjalu yaṉangu palunya ngulytjulku palumpa walytja tjuṯawana nyinanytjaku.
6 Nganaṉa paapanguru maamanguru yutitjarringkula mantangka kana nyinanyi. Katutjaku kurrunpa nganaṉala tjarrpangutjangka nganaṉa piyuku yutitjarriku palumpa walytja tjuṯa kana kutu nyinanytjaku, palumpa katja tjuṯa, yuṉṯalpa tjuṯaṯarra.
7 Nyuntu piyuku yutitjarringkula nyinanytjaku. Wangka yalatji ngayuluṉanta watjaṉutjangka wiya nyuntu puṯu kulintjaku.
8 Katutjaku kurrunpa nyuntula tjarrpangutjangka kutju nyuntu piyuku yutitjarringkula kana kutu nyinaku. Nyuntu waḻpa warri wangkanytjala kulira puṯu kulilpayi, ‘Tjinguru waṉmatjanu waḻpa warri wangkanyi, tjinguru yilatjanu. Yaalytjingka wiyarringanyi?’ Waḻpa palunya nguwanpa Katutjaku kurrunpa nganaṉala tjarrpanytjala nganaṉa nyakunytjawiya, paluru walytjangku kulira yaṉangungka tjarrpanyi. Katutjalu palumpa kurrunpangkuṯarra yaṉangungka tjarrparra ngulytjuṉi, kana kutu nyinanytjaku.”
9 Nikatimatjalu watjaṉu, “Yaalytjiyaalytji Katutjaku kurrunpangku yalatji palyaṉi?”
10 Yiitjulu Nikatimatjanya watjaṉu, “Tjuwu tjuṯa tjananyan nyuntu nintilpayi, nintingkun tjukarurrungku ngayuku wangka kulinmara.
11 Wangka tjukarurruṉanta watjaṉi. Nintingkulitjunta wangka panyapa nintiṉi, paapa Katutjaluṯarra. Yaṉangu tjuṯangkunyurra ngalimpaṉu wangka kulira wantipayi.
12 Mantangka yaṉangu tjuṯangku kuliṉi wangka kapitjarra, wangka waḻpatjarra, wangka pipirri yutitjarrinytjatjarra. Wangka palunya tjuṯa nyuntu puṯu kuliṉingi. Ngayulu puṯu kuliṉi wangka kutjupa yilkaritjatjarra nintilkitjangku, nyuntu wangka panyapa puṯu kuliṉutjangka.
13 Yaṉangu wiya ilkarikutu Katutjaku ngurrakutu kaḻpangu, palumpa ngurraku yaṉangu ngurrpa. Kutju wiya kutju ninti nyinanyi, ngayuluṉa yaṉanguku katja. Ilkaringuruṉa ngalya tjarukatingu.
14 Mayutju Muutjalu ngurra kapiwiyangka waralytjunu piḻkaṯi nguwanpa yayina. Palunya nguwanpa ngayunyaṉiya, yaṉanguku katjaṉi waralytjunku.
15 Ngayulu waralyngarangitjangka, ngaṉṯi yaṉangu tjuṯangku ngayuku wangka kulilku. Kulira walytjarringkula tjana kana kutu nyinamalpa.”
16 Ngayulu Tjaanalu piipa ngaatjanya wakaṉi, wangka yalatjiṯarra, “Katutjanyalampa yaṉangu yuwankarraku yunytju nyinarra palumpa katja kutjulampa mantakutu wantirriyaṉu, waralyngarala mirrirrinytjaku. Katutjalu wantirriyalkitjangku kuliṉu yaṉangu tjuṯangku palunya Katutjaku katjanya kulira kana kutuya nyinanytjaku, kutu mirri ngarrirra wiyarrinytjawiya.
17 Katutjalu katja palunya mantakutu ngalya wantirriyaṉu yaṉangu yuwankarraku kuya waṉinytjaku, nganaṉa palumpa ngurrangka kana kutu nyinaku, wiya palunya wantirriyaṉu nganaṉanya yalatji watjantjaku, ‘Nyurrangarri kutu kuya palyantjala, ngula kuutawutjungka Katutjalu nyurrangarrinya watjalku warungka waṉikitjangku.’ Wiya yalatji watjantjaku palumpa katja ngalya wantirriyaṉu. Palunya wantirriyaṉu aṉangu tjuṯangku palumpa wangka kulira kana kutuya nyinanytjaku.
18 Yaṉangungku palumpa wangka kulintjala wiya Katutjalu kuutawutjungka watjalku warungka waṉikitjangku. Yaṉangu tjuṯangku Katutjaku katjakuṉu wangka kulira wantinyingka Katutjalu kuwarri kuliṉi yaṉangu palunya tjuṯa warungka waṉikitjangku.
19 Ngula Katutjalu yaṉangu tjuṯa kuutawutjungka watjalku. Tjinguru yaṉangungku mantangka ngayukuṉu wangka kulira walytjarringutjangka Katutjalu watjalku palumpa ngurrangka nyinatjunkukitjangku. Yaṉangu tjuṯangku palumpaṉu wangka kulira wantipayi. Palumpa wangka yalatji wantirra paluru tjana kuya kutu palyara nyinanyi. Ngula Katutjalu tjananya watjalku warungka waṉikitjangku.
20 Yaṉangungku kutu kuya palyalkitjangku Katutjaku katjakuṉu wangka kulira wantiku yalatji kulira, ‘Ngayulu wiya Yiitjukuṉu wangka kulira tjukarurrurriku. Palunya wantirra ngayulu kuya kutu palyara nyinamalpa. Tjinguru Katutjaluṉi wantiku kuru watjalwiyangku.’
21 Yaṉangungku tjukarurru nyinakitjangku Katutjaku katjakuṉu wangka kulilku yalatji, ‘Ngayulu Yiitjuku wangka kuliṉi paluru Katutjaku walytja. Ngayuluṉa Katutjaku tjukarurru palyaṉutjangka, palya yaṉangu tjuṯangku kulintjaku.’ ”
22 Palulanguru Yiitjunya palumpa kutunguḻu tjuṯaṯarra manta Tjuutiyalawana yanu ngurra wiima tjuṯawana. Ngurra palula tjuṯawana Yiitjulu tjananya yaṉangu tjuṯa kapingka tjarrpatjunkula papatatjimilalpayi.
23 Tjaanalu tawunu Yananala yaṉangu tjuṯa tjananya kutu kapingka tjarrpatjunkula papatatjimilalpayi. Kapi tiṉa ngurra palula ngarringi. Tawunu palula yila tawunu Tjalimanya ngarangu. Yaṉangu tjuṯangku kutu Tjaanalakutu yankula tjapilpayi kapingka tjarrpatjunkula papatatjimilantjaku.
24 Ngula Yirutaku waarrkana tjuṯangku Tjaananya witira katirra tjiilangka tjarrpatjunu.
25 Tjaanalu tjananya kapingka tjarrpatjunkula papatatjimilaṉingka palumpa walytja tjuṯangka wati kutjupalpi Tjuwu tjungurringu. Paluru tjana wangkarra waṉingi, yaṉangu tjukarurru papatatjimilantjaku. Wati Tjuwu paluru wangka kutju wangkarra pikapikarripayi, kanya Tjaanaku waarrkana tjuṯangku wangka kutjupa wangkarra pikapikarripayi, tjunguya.
26 Palulanguru Tjaanaku walytja tjuṯangku Tjaanalakutu yankula watjaṉu, “Nintilpayi. Wati panyapa tjungu nyupali wangkangi karru Tjuutanala wirriḻi. Nyuntulanyatju wangka panyapa watjaṉu wati palunyatjarra. Kuwarrilatju kuliṉu wati paluru tjananya yaṉangu tjuṯa kapingka tjarrpatjunkula papatatjimilaṉi. Yaṉangu tjuṯalingku palulawana tjungurringanyi.”
27 Tjaanalu tjananya watjaṉu, “Katutjalu watjaṉutjangka kutju paluru tjananya kapingka tjarrpatjunkula papatatjimilaṉi.
28 Tjingurunyurra wangka panyapa kuliṉi?, ngayulu nyurrangarrinya watjaṉutja. Ngayulu yalatji watjaṉu. Ngayulu wiya Kurayitjanya Katutjalu watjara wantirriyaṉutja. Katutjaluṉi watjaṉu yaṉangu tjuṯa paṯara kanyira nintintjaku yalatji, ‘Ngula Katutjalu nyurrangarrimpa mayutju Kurayitjanya ngalya wantirriyalku.’ ”
29 Tjaanalu tjananya piyuku watjaṉu, “Ngayulu Yiitju Kurayitjaku puntura yunypa nyinanyi paluru Katutjaku waarrka palyaṉingka, yara ngaa nguwanpa marutju palumpa yunypa nyinanytja nguwanpa. Watingku miiṯa yaḻṯikitja nyinanyingka palumpa marutjura puntura yunypa nyinanyi.
30 Yaṉangu tjuṯangkulpi yunyparringkula palumpa wangka kulintjaku mayutju tiṉakuṉu, kanya yaṉangu tjuṯa wiya ngayula tjungurringkula yunyparrinytjaku, ngayulu mayutju tiṉa wiya nyinanyi.”
Katutjaku katja yalatji nyinanyi
31 Tjaanalu tjananya palumpa walytja tjuṯangka piyuku watjaṉu, “Ilkaringuru paluru ngalyankula mayutju tiṉa nyinanyi. Manta ngurrara tjuṯa nganaṉa ngatalpa nyinanyi. Ngayulu manta ngurrara kanya paluru ilkari ngurrara nyinanyi.
32 Paluru ilkaringka nyinarra Katutjakuṉu wangka kulira yaṉangu tjuṯangka tjakultjunkupayi. Yaṉangu tjuṯangku palumpa wangka kulira wantipayi.
33 Yaṉangu kutjupa tjuṯangku palumpa wangka kulira walytjarringkupayi. Tjana walytjarringkula nintingku kulilpayi, ‘Katutjalu tjukarurru watjalpayi, ngunytjinytjunkunytjawiya.’
34 Yiitju Kurayitjanya Katutjalu palumpa kurrunpa tjarrpatjunkula wantirriyaṉu palumpa wangka tjakultjunkunytjaku.
35 Paapa Katutjanya palumpa katjaku yunytju nyinanyi. Katja palunya paluru mayutju tiṉa nyinatjunu yuwankarraku.
36 Yaṉangungku Katutjaku katjakuṉu wangka kulira walytjarringkula kana kutu nyinamalpa. Yaṉangungku katja palumpaṉu wangka kulira wantinytjala Katutjalu kuutawutjungka watjalku palunya warungka waṉikitjangku. Paluru wiya Katutjaku ngurrangka kana kutu nyinamalpa, wiya.”