8
Minymaya katirra ngaratjunku
1 Yaṉangu tjuṯaya ngurrakutu yanu. Yiitjunya kutju puḻi yini Yalipatjalakutu yanu.
2 Ngarrirra tjiṉṯurringu paluru piyuku yanu Tjuwuku tjaatji tiṉakutu. Yaṉangu tjuṯa tjaatji palula tjungurrinytjala, Yiitjulu tjananya nyinarra nintiṉingi.
3 Paratji tjuṯangku, Muutjaku luwu nintilpayi tjuṯangkuṯarra minyma katirra Yiitjula yila ngaratjunu. Minyma palunya tjana witiṉu wati walytjawiyawana ngarrinyingka.
4 Palunya ngaratjunkula tjana Yiitjunya tjapiṉu, “Nintilpayi. Minyma ngaatja tjana nyangu miiṯa walytjawiyangka ngarrinyingka. Nganaṉatju palunya ngalya katirra ngaatjalpi ngaratjunu.
5 Muutjaku wangka yalatji ngaranyi, minyma palatja nganaṉa puḻingka rungkara mirrintankunytjaku. Nyaalytji nyuntu kuliṉi?, nganaṉa iluntankuku?”
6 Wangka panyapa paluru tjana Yiitjunya tjapiṉu yalatji kulira, “Tjinguru Yiitjulu watjalku, ‘Kuunyiya wanti!’ Yalatji paluru watjantjala nganaṉa ngula kuutawutjungka yalatji watjalku, ‘Yiitjulu Muutjaku luwu kilytjuntanu. Palurulanya watjaṉu kungka palunya rungkalwiyangku wantinytjaku.’ ” Yiitjulu tjananya kulira wangkawiyangku puparra mantangka wakaṉingi marangku.
7 Kutuya ngarala tjapiṉingka pakaralpi tjananya watjaṉu, “Tjinguru nyurrangarri kuya palyalwiya nyinanyi? Kuya palyalwiyangku kutju palunya puḻingka rungkantjaku.”
8 Piyuku puparra mantangka wakaṉingi marangku.
9 Palumpa wangka kuliraya kuṉṯarringu yalatji kulira, “Yuwa, ngayulu kuya palyalpayi.” Wati tjiḻpi tjuṯaya kuṉṯarringkula kutjuṯu kutjuṯu yankula waṉingu. Ngaṉṯilpiya yangupala tjuṯa kuṉṯarringkula yankula waṉingu. Kuṉṯarrirraya yuwankarra yankula waṉingu. Yiitjula ila minyma paluru kutju ngarangi.
10 Pakara paluru minyma palunya watjaṉu, “Minyma, yaṉangu tjuṯaya yaalytjirringu? Tjinguru kutju ngaranyi nyuntunya rungkara mirrintankukitja?”
11 Minyma palurulpi watjaṉu, “Mayutju, Wiyaya ngaranyi ngayunya pungkukitja.” Yiitjulu palunya watjaṉu, “Ngayuluṯarra wiyaṉanta pungku. Maa yarra!, kuya palunya palyantjawiyalpi nyina!”
Ngayulu tili nguwanpa nyinanyi
12 Palulanguru Yiitjulu Paratji tjuṯangka tjananya watjaṉu Tjuwuku tjaatji tiṉangka yalatji, “Yaṉangu tjuṯangku mungangka layiti nyakula tjungurringkupayi. Yalatji nguwanpa ngayulu layiti nguwanpa nyinanyi yaṉangu yuwankarrangku ngayunya nyakula tjungurringkula ngayuku wangka kulintjaku. Ngayuku wangka yaṉangungku kulira walytjarringkula paluru kana kutu nyinamalpa, wiya paluru kutu yunytjurriku kuya palyalkitja, wiya.”
13 Paratji paluru tjana Yiitjunya panypurangkula watjaṉu, “Nyuntu walytjangkunku watjaṉi, wiyawana. Wiyalatjunta wangka nyuntupaṉu kulilku. Kutjupa tjuṯangku nyuntu Katutjakuṉu nintingku watjantjala nganaṉatju tjanampaṉu wangka kulilku.”
14 Yiitjulu tjananya watjaṉu, “Yilta, ngayulu watjalpayi yaṉangu tjuṯangku ngayuku wangka kulintjaku. Ngayulu ngurra kutjupa ngurrara, manta ngurrara wiya, ngayulu tjukarurru watjalpayi, ngunytjinytjunkunytjawiya, ngurra palulakutu ngayulu piyuku yankuku. Nyurrangarri ngayuku ngurraku ngurrpa, wiyawananyurra kulilpayi, puṯu kulilpayi tjuṯa.
15 Nyurrangarri yalatji kulira wiyawana watjaṉi, ‘Yiitjunya manta ngurrara, Katutjakuṉu wiya.’ Yalatji yaṉangu tjuṯangkuṯarra kulira wiyawana watjaṉi. Ngayulu wiya yalatji kulira wiyawana watjaṉi.
16 Ngula kuutawutjungka ngayulu yaṉangu tjuṯa tjukarurru watjalku, wiyawana watjantjawiya. Ngayuku paapangkuṉi nintintjala ngayulu tjukarurru kutju watjalpayi, paluru ngayulawana nyinanyi. Paluruṉi watjara mantakutu wantirriyaṉu.
17 Luwu nyurrangarrimpa yalatji ngaranyi. Tjinguru yaṉangu kutjarrangku kuutawutjungkapaka wangka kutjupula watjalku. Wangka palunyanyurra kuliṉi, ‘Yuwa, wangka palunya tjukarurru ngaranyi, kutjarrangkupula watjantjala. Wiyapula kutjarrangku ngunytjinytjunanyi.’
18 Luwu palunya nguwanpa ngayuluṉa wangka tjukarurru watjalpayi. Ngayuku paapangkuṯarra wangka ngayukuṉuwana tjukarurrungku watjalpayi. Ngalitju kutjarrangku wangka kutju watjalpayi tjukarurru, ngayuku paapangku. Paluru ngayunya ngalya wantirriyaṉu.”
19 Tjana Yiitjunya tjapiṉu, “Yaalytjingka nyuntupa paapa nyinanyi?” Yiitjulu tjananya watjaṉu, “Nyurrangarri ngayuku paapaku walytja wiya nyinanyi, ngayuku walytjaṯarra wiyanyurra nyinanyi. Tjingurunyurra ngayuku walytja nyinarra ngayuku paapakuṯarra walytjanyurra nyinamara.”
20 Wangka panyapa Yiitjulu tjananya Tjuwuku tjaatji tiṉangka yunngu nintiṉingi, turaama manitjarra tjuṯangka ila. Tjuwuku mayutju tjuṯa ngurra palulawana parra ngarapayi. Wiya tjana Yiitjunya witiṉu Katutjalu yalatji kuliṉingitjangka, “Ngayuku katjangku tjananya kutuwarri nintintjaku. Ngula tjana palunya kala witira waralytjunkula mirrintankunytjaku.”
“Wiya nganaṉa ngurra palula tjungu nyinaku”
21 Yiitjulu tjanala yaṉangu tjuṯangka Paratji tjuṯangkaṯarra piyuku watjaṉu, “Ngurra kutjupakutu ngayulu yananyi. Ngurra palula ngayulu ankula nyinanyingka puṯutjunyurra ngurrira wanalku. Wiya nganaṉa ngurra palula tjungu nyinaku. Puṯutjunyurra ngurrira nyinarra mirrirriku. Mirrirringkula warungkalpinyurra kampamalpa kuulwara, wiyanyurra kana kutu nyinamalpa, wiya Katutjalu nyurrangarrimpa kuya waṉiku, wantiku nyurrangarrinya.”
22 Yaṉangu tjuṯangkuya watjara waṉingu, “Paluru watjaṉu puṯutjunyurra ngayunya ngurrira wanalku. Tjinguru paluru yankula walytjangkunku wakara mirrintanku.”
23 Yiitjulu tjananya piyuku watjaṉu, “Nyurrangarri manta ngurrara, kanya ngayulu ilkari ngurrara.
24 Wangka panyapa ngayulu nyurrangarrinya watjaṉu, mirrirringkula warungkalpinyurra kampamalpa. Ngayunya Katutjalu mantakutu wantirriyaṉutja nyurrangarri kulira wantinyingka Katutjalu nyurrangarrinya warungka waṉiku, wiya nyurrangarrimpa kuya waṉiku, wantiku nyurranya.”
25 Tjana Yiitjunya watjaṉu, “Wiya nyuntu ilkari ngurrara.” Yiitjulu tjananya watjaṉu, “Ilta, ngayulu ilkari ngurrara panyapa ngayulu nyurrangarrinya kutu watjalpayi.
26 Tjinguru ngayulu nyurrangarrinya kutu kuru watjalku. Yalatji wiya, kuru watjalwiyangkuṉa nyurrangarrinya wantiku. Paluruṉi watjantjala kutju ngayulu watjalku. Paluru tjukarurru watjalpayi, paluruṉi mantakutu watjara wantirriyaṉu.”
27 Paluru tjana wangka panyapa puṯu kuliṉu, wiya tjana kuliṉu yalatji, “Paapa Katutjalu Yiitjunya mantakutu wantirriyaṉu.”
28 Yiitjulu tjananya piyuku watjaṉu, “Ngula nyurrangarri ngayunya yaṉanguku katja watiyangka waralytjunkula kutju kulilku, ‘Palatja Kurayitjanya Katutjalu wantirriyaṉutja.’ Wangka yalatjiṯarranyurra kulilku, ‘Paluru yilta paapa Katutjalu nintintjala kutju tjakultjunkupayi, walytjangkunku kulira tjakultjunkunytjawiya.’
29 Yuwa, paluruṉi mantakutu ngalya wantirriyaṉu, paluruṉi ngayula tjungu nyinanyi. Palumpa wangka kutju ngayulu kulira tjakultjunkupayi. Paluruṉi kutu yaṉṯayaṉṯanmalpa.”
30 Wangka panyapa kulira yaṉangu tjuṯa palumpa walytjarringu.
“Nganaṉa waarrkana nguwanpa wiyalpi nyinaku”
31 Yiitjulu tjananya palumpa walytjarringutja tjuṯangka watjaṉu, “Ngayuku wangkakunyurra tjukarurru kutu nyinanytjaku. Yalatji kutu nyinarranyurra yilta ngayuku walytja tjuṯa nyinamalpa.
32 Ngayunya wantirriyalkitjangku yirriṯi Katutjalu wangka tjuṯa watjaṉu. Wangka palunya tjuṯakunyurra ninti nyinaku. Yalatjiku nintirringkula wiyalpinyurra waarrkana nguwanpa nyinaku.”
33 Kutjupa tjuṯangku Yiitjunya watjaṉu, “Nganampa mayutju yirriṯitja Yipuramanya nyinangu. Nganaṉa palumpa walytja ngaṉṯitja tjuṯa nyinanyi. Paluru kutju nganampa mayutju nyinanyi, nganaṉa palumpa waarrkana tjuṯa nyinanyi, wiya kutjupaku. Nyaaku nyuntu watjaṉu?, nganaṉa waarrkana nguwanpa wiyalpi nyinaku, nganaṉa wiya mayutju kutjupaku waarrkana nyinanyi.”
34 Yiitjulu tjananya watjaṉu, “Wangka ngaatjanyaya kulila! Mamulu watjantjala yaṉangungku kulira kuya palyalpayi. Yaṉangu paluru Mamuku waarrkana nyinanyi kuya palyalpayi.
35 Waarrkana wiya palumpa mayutjuku walytja tjuṯangka tjungu nyinaku, paluru tjanampaṉu walytjawiya ngurra kutjupangka yila nyinaku. Mayutju palumpa katja walytja kutju ngurra palula rawa nyinaku.
36 Katja palunya nguwanpa ngayulu Katutjaku katja nyinanyi. Ngayulu yalatji watjalku, ‘Nyurrangarri ngayuku wangka kulira mamuku waarrkana wiyalpinyurra nyinaku.’ Ngayulu wangka palunya nyurrangarrinya watjantjala iltanyurra mamuku waarrkana tjuṯa wiyalpi nyinaku.
37 Ngayulu kuliṉi nyurrangarri Yipuramaku walytja ngaṉṯitja tjuṯa nyinanyi. Yipuramanya wati palya nyinapayi, Katutjaku wangka kulilpayi. Palunya nguwanpanyurra palumpa walytja ngaṉṯitja tjuṯa palya nyinamara. Katutjaku wangka ngayulu watjantjala nyurrangarri kulira wantipayi. Ngayuku wangka kulira wantirra nyaakunyurra yunytjurringanyi ngayunya mirri pungkukitja?
38 Ngayuku walytja Katutjaluṉi nintintjala ngayulu nyurrangarrinya tjakultjunkupayi, kanya nyurrangarrimpa walytja mamungku nintintjala nyurrangarri ngayuku wangka wantirra kuya palyalpayi.”
39 Tjana watjaṉu, “Mamu paluru wiya nganampa walytja nyinanyi, nganampa walytja yurruntitja Yipuramanya nyinapayi.” Yiitjulu tjananya watjaṉu, “Yipuramaku walytja ngaṉṯitjanyurra nyinarra palyanyurra nyinamara, Yipuramanya nguwanpa.
40-41 Nyurrangarri yunytjurringanyi ngayunya mirri pungkukitja, Katutjaku wangka ngayulu nyurrangarrinya tjakultjunutjangka. Yipuramalu wiya Katutjaku wangka kulira wantipayi, wangka palulawana palya nyinapayi. Yilta nyurrangarrimpa walytja mamuku mayutju nyinanyi, nyurrangarri palunya nguwanpa kuya palyalpayi, Yipuramanya nguwanpa wiya.” Kanya tjana watjaṉu, “Wiya. Nganampa walytja yurruntitja Katutjanya nyinanyi, nganampa paapa.”
42 Yiitjulu tjananya watjaṉu, “Katutjanya nyurrangarrimpa walytja wiya nyinanyi, nyurrangarrimpa paapawiya. Nyurrangarri palumpa walytja nyinarra ngayukuṯarranyurra palya nyinamara. Paluru ngayuku walytja nyinanyi. Paluruṉi mantakutu ngalya wantirriyaṉu, wiya ngayulu walytjangku kulira ngalyanu.
43 Ngayuku wangkanyurra kulira wantinyi, puṯunyurra kuliṉi.
44 Yilta nyurrangarri nyinanyi mamuku mayutjuku walytja tjuṯa. Paluru nyurrangarrinya tjingapunganyingka kuliranyurra palumpa wangkawana kuya palyalpayi. Paluru kututja tjukarurruwiya nyinapayi. Paluru yaṉangu tjuṯa mirri pungkupayi. Paluru tjukarurru watjantjawiya kutjutja ngunytjinytjunkupayi. Kuwarri kutu paluru nyurrangarrinya yaṉangu kutjupa tjuṯaṯarra ngunytjinytjunanyi. Palunya nguwanpa nyurrangarri mirri pungkupayi nyinanyi ngunytjinytjunkupayiṯarra.
45 “Ngayulu Katutjakuṉu wangka tjukarurru kutu watjalpayi. Wiyanyurra Katutjaku wangka palunya kulilkitja yunytjurringanyi. Ngayuku wangkanyurra kulira wantipayi.
46 Tjinguru tjaampalangkunyurra kuliṉi ngayulungunytjinytjunkupayi, kuya palyalpayiṯarra. Yalatji kulira tjakultjurraṉi!, tjinguru ngayulu kuya palyaṉutjangka. Yalatji tjakultjunkukitjangkunyurra puṯu kuliṉi ngayulu tjukarurru kutu watjalpayi. Ngayuku wangkanyurra kulira walytjarringamara.
47 Yaṉangungku Katutjaku walytjangku nyinarra palumpa wangka kulilku. Nyurrangarri palumpa walytjawiyangku palumpa wangka kulira wantipayi, ngayuku wangkaṯarra nyurrangarri kulira wantipayi.”
Yiitjulu watjalku, “Ngayulu Yipuramanya nyakupayi”
48 Yaṉangu tjuṯangku Yiitjunya watjaṉu, “Nyuntu wiya Katutjaku wangka tjukarurru kuliṉi, nyuntu rama nyinanyi.”
49 Yiitjulu tjananya watjaṉu, “Ngayulu ramawiya. Ngayulu palumpa wangka nintira paapa walytja waḻkulpayi. Wangka palunya kuliranyurra ngayunya panypurangkupayi.
50 Ngayulu wiya yunytjurringanyi yaṉangu tjuṯangkuṉi waḻkuntjaku. Ngayuku paapa yunytjurringanyi ngayunya waḻkuntjaku. Paluru tjukarurru kulira ngayunya waḻkulpayi. Panypurangkupayi tjuṯaṯarra paluru tjukarurru kulira payira wantirriyalku.
51 Wangka ngaatjanyaya kulila! Yaṉangungku ngayuku wangka kulira tjukarurru kutu nyinanytjala Katutjalu palunya kana kutu yaṉṯayaṉṯanmalpa, paluru mirrirringkula piyuku kana nyinamalpa.”
52-53 Paluru tjana watjaṉu, “Yilta, nyuntu rama nyinanyi. Katutjaku wangka watjalpayi tjuṯa, Yipuramanyaṯarra yurrunpa Katutjaku wangkaku palya nyinarra mirrirringu, kana piyuku nyinanytjawiya. Nyuntu wiyawanangku watjaṉi. Nganaṉa nyinarra mirrirriku, piyuku kanarrinytjawiya. Nyaaku nyuntu yalatji watjaṉi?, ‘Yaṉangungku ngayuku wangka kulira tjukarurru kutu nyinanytjala Katutjalu palunya kana kutu yaṉṯayaṉṯanmalpa Yaṉangu ngayuku wangkawana tjukarurru nyinarra wiya kutu mirri ngarriku.’ Yipuramalungarri wiya wangka palunya nguwanpa watjaṉu. Nyuntun mungutja, nyuntu wangka panyapa watjalwiyangku wantimara.”
54-55 Yiitjulu tjananya watjaṉu, “Tjinguru ngayuluṉatju puḻkapunganyingka nyurrangarri watjalku, ‘Nyuntu walytjangku puḻkapunganyi, nyuntu mayutju tiṉawiya.’ Ngayuku paapangkuṉi mantakutu ngalya wantirriyaṉu palumpa waarrka palyantjaku. Paluruṉi puḻkapungkupayi. Nyurrangarri wiyawanangku watjalpayi, ‘Paapa Katutjanya nganampa mayutju tiṉa nyinanyi. Nganaṉa palumpa walytja tjuṯa nyinanyi.’ Wangka palunyanyurra ngunytji watjalpayi. Nyurrangarri wiya palumpa walytja tjuṯa nyinanyi. Ngayulu ngunytji wangkanytjawiya iltaṉa palumpa walytja nyinanyi. Paluruṉi watjantjala ngayulu palyalpayi.
56 Nyurrangarri watjalpayi, ‘Yipuramanya nganampa walytja yurruntitja.’ Paluru mantangka nyinarra yunypangku kulilpayi, ‘Kurayitjanya nganampa mayutju tiṉa ilta ngalyankuku mantakutu.’ Ngayuku ninti nyinarra paluru yunypa nyinangi.”
57 Tjana watjaṉu, “Yipuramanya wiya nyuntupa ninti nyinangi. Nyuntun kuwarritja palurunta yirriṯi nyinarra wiyarringu.”
58 Yiitjulu tjananya watjaṉu, “Wangka ngaatjanyaya kulila! Yipuramanya nyinanyingka yurrunpa ngayulu kutu nyinangi, paapa ngayukuku ngurrangka.”
59 Paluru tjana kuliṉingi, “Nganampa luwu ngaranyi, yaṉangu wiya palunya nguwanpa wangkanytjaku. Nganaṉa palatjanya puḻingka rungkara iluntankunytjaku.” Yalatji kulira tjana mulyarrarrirra puḻi mantjimantjiṉu Yiitjunya rungkara iluntankukitjangku. Paluru tjanampa kumpira yanu, wiya paluru Tjuwuku tjaatji tiṉangka parra ngarangi.