3
Jesús icha importante que Moisés
1 Mexinxin, hermanos, jaha ra ẍo ocoroa ra ixin Dios jointtaguinhi ra chojní jehe, tsjehe ra jian ngain Jesucristo ixin jehe tti representanté Dios para ixin ján na, co jehe tti dána icha importante de ngain tti dotticaon na.
2 Ixin Jesús jehe vanchehe jian cain tti rinao Dios, mexinxin Dios chjé ẍa jihi. Inchin Moisés cai vanchehe jian cain ẍa que jehe vechonda para ixin chojní Dios.
3 Pero Jesús jiquininxin icha tsosayehe que Moisés, jañá inchin tti nchechjian ná nchia icha jiquininxin tosayehe jehe que nchia mismo.
4 Cada nchia chonda que tonchjian nchia de ná chojni, pero Dios jehe tti joinchechjian cain cosa que jí.
5 Jamé, Moisés cjoi jian ninchehe ẍé Dios ngayé chojní Dios. Co jehe chonda ẍa de vandache chojni de ixin quehe rrojinchehe Dios después ngain na.
6 Pero Cristo, ixin jehe Xenhe Dios, jehe chonda joachaxin de ttetonhe chojní Dios, co mé ján na mismo, si ján na ndoa sonttoho na sigue jian sotticaon na co si rrochonda na confianza ngain jehe cainxin tiempo hasta ndasenhe na co si sonttoho na sigue c̈hjoin tsonoa na ixin techonhe na tti jian que sayé na de ngain Dios.
Dios rinao que chojní jehe sinchejogaha
7 Mexinxin ndac̈ho Espíritu Santo ngain tti jitaxin Palabré Dios:
Jai, si jaha ra ttinhi ra tti ndac̈ho Dios,
8 dintteha ra cha de ngain ansean ra, inchin vintte tti chojni judío que vitticaonha na tti ttetonha Dios.
co jehe na joinao na viconxin na paciencié Dios are vacji na ngagaha jna tti ẍonhi chojni jí.
9 Mexinxin ndac̈ho Dios ngain Palabré:
Nttiha nigoelitoa ra ẍanc̈hjen vaquenanxin na prueba
masqui vicon na cain cosa que janha jointtaha ngoixin tti cuarenta nano que jehe na sacjoi na nttiha.
10 Mexinxin janha coñaho ngain chojni mé,
co ndac̈hjan: “Cain tiempo ndadiguitján na de ngain ansén na,
co rinaoha na datsoan na tti nttiha que janha tjagoa na.”
11 Mexinxin, janha coñaho ngain na co ndattjan na conixin ná juramento,
que ixin jehe na c̈hoha rroguiji na tti rrojinchejogaha na conixin janha.
12 Hermanos, ttjiho ra cuidado que ni ná de jaha ra rrochondaha ra ansean ra jianha que sac̈hjendehe Dios que jichon, co isitticaonha ra ngain jehe.
13 Sino que cada nchanho ncheanimá chó ra, ná ra co ná ra are ẍa jí tiempo, para que ni ná de jaha ra sitticaonxinha ra ngain cosa jianha, co ansean ra tsochaha para ngain Dios.
14 Ixin si ján na sonttoho na sigue hasta ndasenhe na, de rrochonda na tti confianza que ján na techonda na desde are nacoexinxon na gotticaon na, cottimeja ján na rrochonda na parte ngain Cristo.
15 Jañá ndac̈ho ngain tti jitaxin Palabré Dios:
Jai, si jaha ra ttinhi ra tti ndac̈ho Dios,
dintteha ra cha de ngain ansean ra inchin vintte tti chojni que vitticaonha na tti ttetonha Dios.
16 Co, ¿quexehe tti chojni que coinhi na tti ndac̈ho Dios co después vitticaonha na? Mé cjoi cain tti chojni judío que Moisés joantsjexin de ngain nonttehe Egipto.
17 Co ¿quensen Dios coñao ngain ngoixin tti cuarenta nano? Mé ngain tti ẍajeho chojni judío que joinchehe jianha, tti chojni que ndavenxin ngagaha jna tti ẍonhi chojni jí.
18 ¿Co quensen ngain tti ndac̈ho Dios conixin ná juramento que c̈hoha tsji na tti rrojinchejogaha na ngain Dios? Mé ngain ẍajeho chojni judío que vitticaonha tti ttetonha Dios.
19 Mexinxin ján na ttinxin na que jehe na c̈hoha joiji na nttiha ixin jehe na vitticaonha na Dios.